Adoglo kple akpɔkplɔ le atadigble me

Adoglo Kple Akpɔkplɔ

Adoglo Kple Akpɔkplɔ

Adoglo kple akpɔkplɔ le atadigble me

Eva me gbe ɖeka bena Adoglo kple Akpɔkplɔ wonye xɔlɔ̃ veviwo eye tsi metsana toa wo dome o. Gbe ɖeka la, dɔ va to eye agblemenukuwo tsrɔ̃ keŋ le agblewo dzi. Esia wɔe be lãwo megakpɔa nu ɖuna o. Egawɔe bena lã geɖewo tsrɔ̃ gɔ̃ hã. Gbe ɖeka Adoglo nɔ tsa ɖim ʋuu henɔ nu si wòaɖu la dim. Kasia, eva ke ɖe atadigble gã aɖe ŋuti.

Esi wòkpɔ atadigblea la, ekpɔ dzidzɔ ŋutɔ elabena ekpɔ eƒe nuɖuɖu vevitɔ. Esia ta eda akpe na Mawu. Etrɔ, nye kɔ kpɔ afi sia afi gake mekpɔ ame aɖeke o. Ale wòge ɖe agblea me hede asi atadi la ɖuɖu me. Eɖui ʋuu va se ɖe esime wòɖi ƒodo nyuie. Etrɔ dzo le mamlɛa gbɔ elabena dɔ mewua ame wotɔa dzo texɔ o. Eyi ɖagblɔ afɔ nyui si wòyi ɖakli la na exɔlɔ̃ Akpɔkplɔ. Akpɔkplɔ ɖe kuku nɛ be le ŋufɔke la ye hã yeayi agble la me kplii. Adoglo lɔ̃ ɖe edzi nɛ.

Vavã esi ŋu ke la, xɔlɔ̃ eveawo dze mɔ. Esi woɖo afi ma la, Adoglo dze aye eye wògblɔ na Akpɔkplɔ bena wòanɔ agblemɔa dzi kpɔm ne yeayi aɖagbe atadi la vɛ, ke ne agbletɔ gbɔna la, nelia aku wòayɔ ye. Ame dɔ me manya. Akpɔkplɔ lɔ̃ ɖe edzi nɛ. Adoglo yi agblea me eye wòde asi atadi la ɖuɖu me. Akpɔkplɔ nɔ mɔa dzi kpɔm kple susu bena ye xɔlɔ̃ la agbe atadi la vɛ, ye hã yeaɖu ɖe godoo. Adoglo nɔ agblea me eye wònɔ nua ɖum, nɔ eɖum kasia, agbletɔe nye esi va do. Akpɔkplɔ de asi akulialia me nɔ exɔlɔ̃ la yɔm gake mese eŋkɔ o.

Esi agbletɔ la va la, elé Akpɔkplɔ eye wòde asi eƒoƒo me. Akpɔkplɔ gblɔ nɛ be ye xɔlɔ̃e kplɔ ye vɛ. Agbledela kplɔ Akpɔkplɔ yi be wòafia exɔlɔ̃ la ye. Esi woɖo afi ma la, wodi Adoglo ʋuu ɖeɖi te wo ŋu. Adoglo si dzo xoxo. Dɔ me ve agbletɔ la eye wògaƒo Akpɔkplɔ ʋuu eƒe ŋutigbalẽ xɔ abi keŋ eye eƒe dzime hã ɖo kpo. Esia ta nenye be miekpɔ akpɔkplɔ egbegbe la, eƒe ŋutigbalẽ mezrɔ̃ o eye eƒe dzime hã ɖo kpo ɖo.

Esia tso Aƒetɔ S.K. Amegashie ƒe Gligbalẽ me.

 

Adoglo Kple Akpɔkplɔ Read More »

Yiyi Kple Ɖetsyɔ̃evi ŋuti gli.

Yiyi Kple Ɖetsyɔ̃evi

Yiyi Kple Ɖetsyɔ̃evi

Yiyi Kple Ɖetsyɔ̃evi ŋuti gli.

Gbe ɖeka míeli ko la, dɔ gã aɖe va to. Dɔ la nu sẽ ale gbegbe be Yiyi kple viawo mekpɔ naneke woaɖu o. Yiyi ƒe viwo yi afɔdzi de ge gbe ɖeka eye woyi ɖado go Ɖetsyɔ̃evi ƒe viwo hã le afɔdzideƒe la.

Esi wonɔ afɔdzi la dem la, Yiyi ƒe viwo mete ŋu nɔ edem o, elebena naneke menɔ dɔ me na wo o. Evɔ la, wokpɔ be Aɖetsyɔ̃evi ƒe viwo ya nɔ afɔdzia dem ŋutɔ. Esi woyi aƒe me la, Yiyi ƒe viwo yi ɖagblɔ nu si dzɔ la na wo fofo. Yiyi tso enumake yi ɖe Ɖetsyɔ̃evi gbɔ hebiae be wòafia afi si wòle nuɖuɖu la kpɔm le la ye hã. Ɖetsyɔ̃evi gblɔ ale si exɔlɔ̃ xeviwo kplɔnɛ yia atsyãti si le tɔ dome la mee eye wogbea atsyã nɛ la na Yiyi. Yiyi da akpe nɛ hedzo yi aƒe me kple dzidzɔ,             

Esi ŋu ke ŋdi kanya la, Yiyi fɔ dzaa yi ɖe xeviawo gbɔ hebia tso wo si be woakplɔ ye ayi atsyãti la tee. Eɖe kuku na xeviawo be woaɣe xefu aɖewo na ye hã, ne yeatsɔ adzo kpli wo ayi teƒe lae. Xeviawo lɔ̃ ɣe fuawo na Yiyi eye wòkplɔ wo ɖo yi teƒe la.

Teƒe la ɖoɖo kple maɖomaɖo ko la, Yiyi do ɣli be, ‘Tso! Fofonye ƒe atsyã boŋ mieva le ɖuɖum gbe sia gbea? Kpɔ ɖa, netsɔ na mi. Mibu le afi sia hafi mami ta!’ Xeviawo ƒe mo koe wɔ yaa. Womenya nu si woawɔ o, eya ta ɖeko wodzo kpoo hegblẽ Yiyi ɖeka ɖe afi ma. Gake hafi woadzo la, wo dometɔ ɖe sia ɖe nyɔ eƒe fu le Yiyi ŋu hetsɔ dzoe.

Yiyi lia ati la heɖu atsya la ʋuu va se ɖe esime ɖeɖi te eŋu. Azɔ dzodzo zu agba nɛ. Etsi tɔ dome. Ewɔ ɖɔɖɔɖɔ ɖiɖi ɖe tɔ la me eye wòbia tso lo si be wòakɔ ye atso tɔ lae.

Lo kɔ Yiyi tso tɔ la va ɖo go ɖeka dzi eye wògale agbagba dzem be yeakɔe ayi go mamlɛa dzie. Kasia, Yiyi gblɔ na lo be neɖe abla elabena eƒe dzodome le ʋeʋẽm na ye. Esi lo se nya sia la, dɔ me vee ŋutɔ eya ta lo tsɔ Yiyi do ɖi ɖe tɔ la me enumake eye wòdo le ete.

Afi ma Yiyi ŋuklẽla la ku ɖo nublanuitɔe.

Esia tso Aƒetɔ S.K. Amegashie ƒe Gligbalẽ me. 

Yiyi Kple Ɖetsyɔ̃evi Read More »

Akpɔkplɔ kple akpaviã eveawo le yame

Akpɔkplɔ Kple Akpaviã Eveawo

Akpɔkplɔ Kple Akpaviã Eveawo

Akpɔkplɔ kple akpaviã eveawo le yame

Akpɔkplɔ kple akpaviã eve aɖewo nɔ anyi gbe aɖe gbe. Xɔlɔ̃ etɔ̃ siawo wɔa nu sia nu ɖekae. Wokpena ɖe wo nɔewo ŋu hã le mɔ vovovowo dzi. Le ɣeyiɣi aɖe me la, ku sesẽ aɖe va ɖi si he dɔwuame va anyigba blibo la dzii. Tsi aɖeke hã meganɔ anyigba ma dzi woano o. Eya ta wova ɖoe bena yewoadi anyigba bubu si dzi yewoate ŋu akpɔ nuɖuɖu kple tsi le la; ne menye nenema o la, yewoaku.

Ke gbe ɖeka la, akpavia eveawo dze mɔ hena anyigba la didi. Le ŋkeke eve megbe ko la, wotrɔ gbɔ kple dzidzɔnya be yewokpɔ anyigba nyui aɖe.Xɔlɔ̃ etɔ̃ siawo va dzra ɖo azɔ hena dzodzo. Esi aʋala mele akpɔkplɔ si wòadzo abe xevi ene o ta la, woɖoe be yewoadi ati aɖe ne akpɔkplɔ la nalé kple eƒe nu eye yewo xevi eveawo hã yewoalé ati la ƒe nu eveawo ɖekaɖeka  ahadzo kplii ayi anyigba yeye la dzi.

Akpɔkplɔ kple akpaviã eveawo va dze mɔ la azɔ. Esi woyi yame vɔ keŋ la, ewɔ nuku na akpɔkplɔ ŋutɔ elabena emae nye zi gbãtɔ si wòdzo yi yame kpɔ. Eya ta esi wòkpɔ anyigba hekpɔ etɔ lã bubuwo ɖaa la, edi vevie be yeagblɔ na wo be yee nye akpɔkplɔ gbãtɔ si dzo yi yame kpɔ. Kasia, eƒe nu ɖiɖi le atia ŋu eye wòge hebu ɖe etɔawo.             

Esiae he xɔlɔ̃ vevi siawo ƒe kaklã vɛ.

Esia tso Aƒetɔ S.K. Amegashie ƒe Gligbalẽ me.    

Akpɔkplɔ Kple Akpaviã Eveawo Read More »

Amegbetɔwo

Anyigbadzitɔwo Ɖo Biliɔn 8 Le Ademakpɔxe 15, 2022

Anyigbadzitɔwo Ɖo Biliɔn 8 Le Ademakpɔxe 15, 2022

Amegbetɔwo

Dukɔ Ƒoƒuwo ƒe habɔbɔ ka nya ta be anyigbadzitɔwo ƒe agbɔsɔsɔ ɖo ame akpi akpe 8 (miliɔn akpe 8 alo biliɔn 8 alo miliya 8) togbɔ be anyigbadzitɔwo ƒe vidzidzi ƒe agbɔsɔsɔme le ɖiɖim hã. Ebu akɔnta hã be le ƒe 2080 va se ɖe ƒe 2089 me la, anyigbadzitɔwo ƒe agbɔsɔsɔ aɖo akpi akpe 10.4, si fia miliɔn akpe 10.4.

Le Anyigbadzitɔwo Ƒe Agbɔsɔsɔme Ŋkeke si woɖu le Siamlɔm (July alo juillet) 11, 2022 dzi la, habɔbɔ si nye Anyigbadzitɔwo Ƒe Agbɔsɔsɔme Ŋuti Mɔkpɔkpɔ 2022 ka nya ta be anyigbadzitɔwo ƒe agbɔsɔsɔ aɖo akpi akpe 8 (biliɔn 8 alo miliya 8) le Ademakpɔxe (November alo Novembre) 15, 2022 dzi. Egblɔ hã be Indiatɔwo ƒe agbɔsɔsɔ ava to Kinatɔwo (China alo Chine) ƒe agbɔsɔsɔ ŋu le ƒe 2023 me.

Dukɔ Ƒoƒuawo ƒe Agbalẽŋlɔlagã António Guterres gblɔ be: “Anyigbadzitɔwo Ƒe Agbɔsɔsɔme Ŋkeke si míaɖu ƒe sia me dze ƒe ɖedzesi aɖe me. Ƒe sia mee woadzi anyigbadzitɔ biliɔn enyilia. Míeɖua ŋkeke sia tsɔ ɖoa ŋku ale si anyigbadzitɔwo le hamehame gake mí katã míenye amegbetɔƒome ɖeka dzi. Míetsɔe ɖoa ŋku ŋgɔgbedede wɔnuku siwo va eme le atikewɔnyawo me hã dzi. Ŋgɔgbedede siawo wɔe be amegbetɔwo ƒe agbenɔƒewo va le didim ɖe edzi fifia. Ewɔe hã be funɔwo kple vidzĩ siwo kuna le vidziɣi la ƒe agbɔsɔsɔ dzi ɖe kpɔtɔ ale gbegbe. … Le ɣeyiɣi ma ke me la, ŋkeke sia ɖoa ŋku edzi na mí be agba le mí katã dzi be míalé be na míaƒe anyigba la. Eganye ɣeyiɣi be míabu ŋugbe siwo míedo na mía nɔewo siwo dzi míete ŋu wɔ o la hã ŋu.”

Anyigbadzitɔwo ƒe agbɔsɔsɔ ƒe azɔlime ɖiɖi kura tso ƒe 1950 me. Fifia anyigbadzitɔwo ƒe dzidziɖedzi ɖiɖi ale gbegbe megade alafa me mama 1 le ƒe 2020 me o. Dukɔ Ƒoƒuawo ƒe akɔntabubu yeyetɔ ɖee fia be anyigbadzitɔwo ƒe agbɔsɔsɔ aɖo akpi akpe 8.5 (miliɔn akpe 8.5 alo biliɔn 8.5 alo miliya 8.5) le ƒe 2030 me. Egblɔ be aɖo akpi akpe 9.7 le ƒe 2050 me, eye wòaɖo akpi akpe 10.4 le ƒe 2080-awo me eye wòanɔ nenema va ɖo ƒe 2100 me.

Anyigbadzitɔwo Ƒe Agbɔsɔsɔme Ŋuti Mɔkpɔkpɔ 2022 gblɔ hã be anyigbadzitɔwo ƒe vidzidzi ɖiɖi kpɔtɔ zã ŋutɔ le ƒe blaeve kple edzivɔ siwo va yi nyitsɔ la me le dukɔ geɖewo me. Egbea anyigbadzitɔwo me mama ɖe etɔ̃ me ƒe akpa eve le dukɔ siwo me nyɔnuwo megadzia vi ale o me. Le dukɔ mawo me la, nyɔnu ɖeka megatea ŋu dzi vi eve o. Ne ele alea la, ke efia be dukɔa me tɔwo madzi ɖe edzi kura o. Wobu akɔnta be dukɔ 61 me tɔwo ƒe agbɔsɔsɔ aɖiɖi kpɔtɔ alafa me mama 1 alo esi wu nenema le ƒe 2022 kple 2050 dome. Nu siawo katã tso ale si nyɔnuwo megale vi dzim ale le nuto mawo me o alo ale si amewo le ʋuʋum le nuto mawo me la gbɔ.

Wobu akɔnta be anyigbadzitɔwo ƒe agbɔsɔsɔ ƒe dzidziɖedzi si ayi edzi va ɖo ƒe 2050 me ƒe afã atso dukɔ 8 pɛ ko me: Kongo Kinsasa, Egipte, Etiopia, India, Nigeria, Pakistan, Filipine kple Tanzania. Wole mɔ kpɔm be dzidziɖedzi si ayi edzi le ƒe 2050 me ya ƒe afã kple nu vi aɖe atso dukɔ siwo le Afrika ƒe anyiehe Sahara.

Liu Zhenmin, si nye Dukɔ Ƒoƒuawo ƒe Agbalẽŋlɔlagã ƒe kpeɖeŋutɔ si kpɔa Ganyawo Kple Hadomegbenɔnɔnyawo Gbɔ gblɔ be: “Ƒomedodo si le amewo ƒe dzidziɖedzi kple ŋgɔyiyi ƒe nyawo dome te kame eye wòɖe alɔ vovovowo hã. Amewo ƒe dzidziɖedzi kabakaba na ahedada kple dɔwuame ɖeɖe ɖa, lãmesẽ kple sukudede ƒe ɖoɖowo dodo ɖe ŋgɔ ƒe kuxiwo dzi ɖe edzi heva le sesẽm ŋutɔ.

Le go bubu me la, Ŋgɔyiyi Ƒe Ɖoɖo Siwo Magblẽ Dzɔdzɔmenuwo Dome O Ƒe Taɖodzinuwo, vevietɔ esiwo ku ɖe lãmesẽ, sukudede kple nyɔnuwo kple ŋutsuwo ƒe sɔsɔminasɔe nyawo ŋu gbɔ ɖoɖo ŋuti ana be vidzinyawo kple anyigbadzitɔwo ƒe agbɔsɔsɔme ƒe dzidziɖedzi si le ɖiɖim la ƒe kuxia dzi naɖe kpɔtɔ.”

Le Afrika ƒe anyiehe Sahara dukɔ akpa gãtɔ, Asia, Latin Amerika kple Karib ƒe akpa aɖewo la, dukɔmeviwo ƒe akpa si le ŋusẽ me awɔ dɔ (tso ƒe 25 va ɖo ƒe 64) la le dzidzim ɖe edzi le vidzidzi ƒe agbɔsɔsɔme si dzi le ɖeɖem kpɔtɔ le nuto mawo me le ŋkeke siawo me la ta. Ale si ƒe siawo xɔlawo dzi ɖe edzi la ana be dukɔ siawo me tɔ ɖekaɖekawo ƒe ganyawo nadzi ɖe edzi kabakaba. Nenye be dukɔwo di be yewoado tsɔtsɔe ganyawo ƒe amedzidede sia la, ele be woaƒo ga geɖe ɖe dumeviŋgɔyiyidɔwo me. Esiawo dometɔ aɖewoe nye be woana lãmesẽnyawo kple sukudenyawo nade dumevi ɖe sia ɖe dzi wu ƒe ka kee amea ɖaxɔ o. Tsɔ kpe ɖe esia ŋu la, ele be woana dukɔmeviwo nakpɔ dɔ nyui awɔ eye woaxe fe na wo nyuie.

Wobu akɔnta be anyigbadzitɔ siwo xɔ ƒe 65 kple edzivɔ adzi ɖe edzi tso alafa me mama 10 le ƒe 2022 me ava ɖo alafa me mama 16 le ƒe 2050 me. Wobu akɔnta be le ɣeyiɣi ma me la, ame siwo xɔ ƒe 65 kple edzivɔ asɔ gbɔ wu ɖevi siwo mekpɔ xɔ 5 la zigbɔzi eve. Woasɔ gbɔ wu ɖevi siwo mekpɔ xɔ ƒe 12 o la hã zigbɔzi eve. Ele be dukɔ siwo me ame tsitsiwo le gbɔ sɔm le wu la nade ɖoɖo aɖewo to me. Wo dometɔ kɔdziyiyifemaxee kple dɔnɔwo gbɔ kpɔkpɔ ɣeyiɣi didi. Eye hafi woate ŋu awɔ esia la, ele be hadomeɖoɖowo kple dzudzɔxɔledɔmeɖoɖowo nanyo ɖe edzi kura.

Le xexea me godoo la, amewo ƒe agbenɔƒee nye 72.8 le ƒe 2019 me, esia nye dzidziɖedzi si ade ƒe 9 kloe tso ƒe 1990 me. Esi amewo ƒe kuku dzi le ɖeɖem kpɔtɔ la ta la, wokpɔ mɔ be agbenɔƒe adzi ɖe edzi ava ɖo ƒe 77.2 le ƒe 2050 me. Ke hã le ƒe 2021 me la, amewo ƒe agbenɔƒe le dukɔ madeŋgɔwo me tsi megbe ƒe adre sɔŋ ne wotsɔe kplɔ anyigbadzitɔwo katã tɔ le mama dedie nu.

KOVID-19 dɔ vɔ̃a gblẽ nu le anyigbadzitɔwo ƒe agbɔsɔsɔ ƒe dzidziɖedzi sia ŋu le go etɔ̃ me. Anyigbadzitɔwo katã ƒe agbenɔƒe ɖiɖi va ɖo ƒe 71.0 le ƒe 2021 me. Le dukɔ aɖewo me la, dɔ vɔ̃a ƒe tɔtrɔ vovovoawoe anya na be dukɔmeviwo ƒe agbɔsɔsɔ dzi ɖe kpɔtɔ ɣeyiɣi kpui aɖe. Ke hã le dukɔ geɖewo me la, ewɔ abe dɔ vɔ̃ sia megblẽ naneke kura le dukɔmeviwo ƒe agbɔsɔsɔ ŋu o ene. Dɔ vɔ̃a ɖo asi amegbetɔwo ƒe azɔlime katã dzi, mɔzɔzɔ ayi duta hã le eme.

Anyigbadzitɔwo Ɖo Biliɔn 8 Le Ademakpɔxe 15, 2022 Read More »

Ave Gãwo Me Yetso

Ave Gãwo Me Yetso

Nyɔnu nublanuitɔ aɖe.

Ave gãwo me yetso;

Yedo ɖe dzogbe hã tsi le ye ƒom.

Ame siwo nye dadavitɔwo,

Woyɔ wo ɖe xɔ me nya gbem na wo.

Ku, wò nya menyo o!

Miganɔ ewɔm o;

Minyae be Mawugãe dzim.

Mebe, maxlẽ fu ɖe ha me,

Yewo tɔwo, maxlẽ fu ɖe ha me.

Wolé gbetɔ blibo dzra ɖe tsitrenu,

Wo viwo heɖu!

Nyawo katã dzɔ ɖe ye dzi.

Atsuwo nanɛ, Tsɛwo nanɛ,

Wole kpɔkpɔm alea;

Vi kple nɔ woyi awɔba.

Ave Gãwo Me Yetso Read More »

Afrikatɔ si lé blanui

Menya Be Meble Xoxo

Menya Be Meble Xoxo

Afrikatɔ si lé blanui

Nye ŋutɔ menya be meble xoxo;

Menye ame ye lagado o.

Nye ŋutɔ menye be meble xoxo;

Menye ame ye lagado o.

Amewo ƒe nu vevie, gbɔya wòtsie;

Amewo ƒe nu dimakpɔe, gbɔya wòtsie;

Kle le dzo sim ƒe dzo gaƒo kle.

Ame malɔ̃ tsitse agbadze dzi wòdɔa

Medɔ agbadze dzi; megbe tsitse dɔ agbadze dzi

Mebe manɔ ati gã ɖome ne ʋedzi meƒom o.

Mele ati gã ɖome tsie ʋedzi gaƒom.

Mitsi na adela gã kemie be,

Ne ekpɔm megatsɔ tu ɖe ŋunye o;

Nyee le avea me le wowom.

Bobofo megatsɔ tu o;

Nyee le avea me le wowom.

Menya Be Meble Xoxo Read More »

Ameyibɔ ŋutsu aɖe le kɔsɔkɔsɔ me

Aʋa Sim Loo!

Aʋa Sim Loo!

Ameyibɔ ŋutsu aɖe le kɔsɔkɔsɔ me

Aʋa si ame mesia kpɔti o.

Kpɔti nenɔ anyi duawo nava nya.

Mezu kpɔti ƒomenyewo ku gblẽm ɖi.

Mebe mado dzaléle ne aʋa magasim o.

Medo dzaléle tsie aʋa sim loo!

Aʋa sim loo! Aʋa sim loo! Aʋa sim loo!

Nya aɖe medo tsie aʋa sim loo!

Aʋa sim loo! Aʋa sim loo! Aʋa sim loo!

Anye ne nye kple ahevinyewo míado dali.

Dzɔgbenyee te num, ne mewɔ lemɔ zã?

Dzɔgbenyee te num, aga maɖo ɖa?

Ame tɔwo gale bublum si ʋedzi loo!

Si ʋedzi loo! Si ʋedzi loo! Si ʋedzi loo!

Anyigba ɖe gbe tsie mianyɛ xoxo.

Aʋa Sim Loo! Read More »

Nyɔnu aɖewo le ɣe ɖum vevie

Akpalu Ƒe Agoha

Akpalu Ƒe Agoha

Nyɔnu aɖewo le ɣe ɖum vevie

Agoha nyui le ʋua me,

Madzi na Baɖugbeawo woase.

Agoha nede ne mítso!

Keke Alada ke, Akpalu gbɔna.

Ga menɔa amewo nu o;

Sɔwo nu ga nɔna.

Gbagameʋu, ʋua, ɖu teŋge, teŋge;

Agoha nyui le ʋua me,

Madzi na Baɖugbeawo woase.

Mebena, miɖo dzi ɖe Mawu ŋu!

Migayi ha dzi ge miaɖo boŋu o

Tsyɔ̃evi vi la, Mawue kplɔnɛ.

Agoha nyui le ʋua me,

Madzi ne Baɖugbeawo woase.

Agoha nede ne mítso!

Keke Alada ke Akpalu gbɔna.

Ga menɔa amewo nu o.

Sɔwo nu ga nɔna.

Gbagameʋu, ʋua ɖu teŋge, teŋge;

Sɔwo nu ga nɔna.

Gbagameʋu, ʋua ɖu teŋge, teŋge;

Madzi na Baɖugbeawo woase.

Akpalu Ƒe Agoha Read More »

Gbɔtsu sue aɖe le ahuhɔ̃e me kpɔm

Gbɔ̃tsu Sue La

Gbɔ̃tsu Sue La

Gbɔtsu sue aɖe le ahuhɔ̃e me kpɔm

Gbe ɖeka la, gbɔ̃tsu sue aɖe va aƒe ƒe ʋɔtru, si le ʋuʋu la nu, eye wòyi ɖe aƒea me. Eti kpo ge ɖe xɔ la me, eye wòkpɔ nu nyuiwo le afi ma fũu.

Gbɔ̃tsu sue la ƒe mo wɔ yaa le nu siawo ƒe nyonyo ta eye wòke ŋku le nu kpɔ gãa. Esi wòdi be yeakpɔ nu sia nu tsitotsito ta la, ede ablegɔ dzi. Ke esia mesɔ gbɔ nɛ o, eya ta wòde kplɔ̃ dzi le xɔa me. Wotsɔ ahuhɔ̃e gã aɖe ku gli ŋu le kplɔ̃ la gbɔ lɔƒo. Nu ka gbɔ̃tsu kpɔ? Ekpɔ eɖokui le ahuhɔ̃e la me hesusu be gbɔ̃tsu bubu aɖee di be yeatu dzo ye.

Dzi ku gbɔ̃tsu sue la le gbɔ̃tsu evelia sia kpɔkpɔ me, eye wòdo ɣli be, “Gbɔ̃tsu sue, va ne mítu dzo mía nɔewo!” Gbɔ̃tsu sue la kɔ eɖokui ɖe dzi, tsi tsitre ɖe eƒe megbefɔwo dzi, eye wòtu dzo gbɔ̃tsu si wòkpɔ le ahuhɔ̃e la me. Kasia ahuhɔ̃e gã la ge va dze gbɔ̃tsu sue la dzi eye wògbã tsayaa. Enumake aƒea tɔ ge ɖe xɔa me, ede ka gbɔ̃tsu sue la, eye fefe la nu tso.

Gbɔ̃tsu Sue La Read More »

Afiwo le takpekpe me

Dadi Kple Afiwo

Dadi Kple Afiwo

Afiwo le takpekpe me

Gbe ɖeka la, afiwo va ɖo xaxa me. Dadi be yealé wo aɖu. Eya ta afiwo ƒo ƒu, eye wode aɖaŋu. Tsitsitɔ gblɔ bena, “Aleke wɔ ge mí katã míele? Mí katã míele kuku ge le ŋkeke kpui aɖe megbe.”

Afi aɖe gblɔna: “Menya aɖaŋu nyui aɖe. Mina míatsɔ nyawowoe aɖatsi ɖe kɔ na adadi la, hafi ne evaɣi naɖo. To nyuiwo li na mí katã, eye hafi ne wòava kpɔ mí la, míasi ayi ɖe míaƒe dowo me. Gake ame kae atsɔ nyawowoe la atsi kɔ nɛ? Ele na wò bena nàwɔ esia!” Egblɔ bena, “Nyea, nyemate ŋu ado dzi awɔ esia o.” Eye afi mamlɛawo hã gblɔ bena, “Míawo hã míate ŋu awɔ esia o.”

Ale dadi la gatsi anyi womete ŋu de nyawowoe kɔ nɛ o.

Dadi Kple Afiwo Read More »

error: Mɔɖeɖe meli o !!
Scroll to Top