Bernhard-Schlegel

Johann Bernhard Schlegel Ƒe Agbemeŋutinya

Johann Bernhard Schlegel
Ƒe Agbemeŋutinya

Mawunyadɔgbedela Johann Bernhard Schlegel nye Eʋegbelɔ̃la aɖe si tsɔ eƒe agbe ke ɖe Eʋegbea sɔsrɔ̃.

Johann Bernhard Schlegel, nye mawunyadɔgbedela alo dutanyanyuigblɔla tso Württemberg, du si me mawunyadɔgbedela xɔŋkɔ geɖe tso.

Ede suku le Basel eye Dziehe Dzamani Mawunyadɔgbedede Ƒe Habɔbɔ si le Bremen dɔe ɖe Kluviƒuta le Afrika.

Johann Bernhard Schlegel Ƒe Ɖevimenɔɣi

Wodzii le Tedoxe 2, 1827 dzi le Belsen, eye edzilawo léa be na wo viwo ŋutɔ.

Eƒe tagbɔ kɔ ŋutɔ le sukunusɔsrɔ̃ me le gɔmedzesuku. Eye nɔa si nye mawuvɔ̃la hã ƒã lɔlɔ̃ na Kristotɔwo ƒe nyateƒea ɖe eƒe dzi me.

Egblɔ le eƒe agbemeŋutinya me be zɔhɛ vɔ̃ɖiwo te kpɔ be yewoable ye de nu vɔ̃ ɖe sia ɖe ƒomevi me. Esi Bernhard Schlegel dzudzɔ sukua dede la, eƒe sukutatɔ ƒoe ɖe nɔa nu be wòana wòayi sukua dede dzi, gake ɖekakpuivi la melɔ̃ ɖe edzi kura o. Esi Schlegel gbe nɔa ƒe nuxlɔ̃ame ta la, wohe to nɛ hedee teladɔ me.

Schlegel Tɔtɔ Kura

Ʋiʋli blibo nɔ eya amea me, menya ne yeasubɔ Mawu loo yeati yeƒe zɔhɛ vloeawo ƒe agbe baɖa nɔnɔ yome o. Eya ŋutɔ ŋlɔ bena: “Mawu se nɔnye ƒe gbedodoɖa vevie la, Kristo ƒe amenuveve ɖu dzi.”

Esi wòdzudzɔ hadede kple eƒe zɔhɛ vloeawo la, menye dzu kple vlodoame vi aɖee wolɔ ƒui o abe ale si eya ŋutɔ hã nɔ mɔ kpɔm nɛ ene.

Teladɔsɔsrɔ̃ Kple Mawunyadɔgbedede Ƒe Suku Dede

Ewu teladɔsɔsrɔ̃ la nu esime wòxɔ ƒe 16, eye wòzɔ mɔ yi Basel. Ekpɔ dɔ le dɔwɔƒe aɖe si te ɖe Basel ŋu. Emegbe wòva di dɔ le Basel ŋutɔ. Le afi sia la, eva nya nu tso mawunyadɔgbedede alo dutanyanyuigbɔgblɔ ƒe dɔa ŋuti nyuie. Ale wɔ didi vevi aɖe nyɔ ɖe eme be yeazu mawunyadɔgbedela. Ebia be yeado go kple Basel Mawunyadɔgbedede ƒe Kɔmiti la, eye wowɔ ɖoɖo do go kplii.

Le ƒe 1847 me la, woxɔe ɖe mawunyadɔgbesuku la me. Ewu ƒe 6 ƒe nusɔsrɔ̃ blibo la nu le afi sia dedie. Eƒe nunana nyuiwo kple veviedodo gã la na wòzu sukuvi nyuitɔwo dometɔ ɖeka enumake. Le eƒe xɔlɔ̃wɔwɔ kple dzimekɔkɔ ta la, eteƒe medidi o eƒe nufialawo kple sukuvi bubuwo va ka ɖe edzi bliboe. Efɔna fɔŋli ga 4 nɔa kplɔ̃ ŋuti nɔa Hebrigbe kple Helagbe siwo sɔsrɔ̃ vivia enu wu la srɔ̃m. Eƒe mawunyagbɔgblɔwo dea ƒuto me na eƒe nyaselawo ŋutɔŋutɔ.

Schlegel Zu Mawunyadɔgbedela

Le ƒe 1853 me la, woɖoe ɖe Dziehe Dzamani Mawunyadɔgbedede Ƒe Habɔbɔ si le Bremen. Habɔbɔ sia ɖoe be yeadɔe ɖe mawunyadɔgbedeƒe le Kluviƒuta le Ɣetoɖoƒe Afrika. Ezã eƒe vovoɣiwo le Bremen tsɔ srɔ̃ Eŋlisigbe geɖe wu. Edze mɔ le Dzome 1853 me eye wòva ɖo Christiansburg le Dzove 1854 ƒe domedome. Esia nye ɣleti ɖeka ƒe mɔzɔzɔ.

Mawunyadɔgbedela Zimmermann ŋlɔ tso eŋu be: “Nyemekpɔ ame aɖeke si ti kpo dze mawunyadɔgbededɔa me enumake eye wòyi edzi le eƒe agbe me katã kple dzonɔameme sia tɔgbi kpɔ o.” Woɖoe mawunyadɔgbedela le Keta, du aɖe si le egbegbe Ghana me.

Schlegel To Eʋegbe La Ŋɔŋlɔ Vɛ

Ŋutsu kalẽtɔ sia tso ɖe dɔ ŋu kpla. Etso ɖe dutagbe kple degbea hã sɔsrɔ̃ ŋuti enumake. Menye nu vie wònye be wòasrɔ̃ Eʋegbea ƒe gbeŋutisewo o. Esrɔ̃ gbea memie, eye wòto Eʋegbe la ŋɔŋlɔ vɛ.

Eléa nuŋlɔti kple pepa ɖe asi nɔa to ɖom Eʋeawo ne wole woƒe dzewo ɖom. Esea woƒe nyawo eye wòŋlɔa wo ɖi. Eteƒe medidi o eva kpɔ Eʋevi ɖekakpui bibi aɖewo kpe ɖe eɖokui eŋuti le dɔ sia wɔwɔ me. Ke hã esi meɖu tu na Eŋlisigbe o ta la, ewɔ vodada geɖewo. Gake dzi meɖe le eƒo o.

 Yayra Geɖewo Do Tso Eƒe Dɔawo Me

Yayra geɖewo do tso eƒe dzigbɔɖi kple kutrikuku me na Eʋeawo. Gake meŋlɔ eƒe dɔ vevitɔ si nye mawunyagbɔgblɔ na Eʋeawo la be o.

Ɖevi siwo le suku la me koŋue wòfiaa nu sia nu nyuie, eye eƒe nufiafiawo doa dzidzɔ na wo.

Le Ademakpɔxe 1855 me la, Schlegel ƒe lãme gblẽ vevie. Taɖuame sesẽ aɖe ɖe kpe nɛ. Edzo yi Akropong ɖaɖi ɖe eme le afi ma. Esi wòhaya la, etrɔ gbɔ va Keta le Afɔfiɛ 1856 me.

Ewɔ dɔ sesĩe eye wòte ŋu ŋlɔ nuxlẽgbalẽ wu enu, eye woɖoe ɖe eƒe habɔbɔa be wòata. Eyi edzi le nu srɔ̃m tso Eʋegbea ŋuti nunya hã ŋu vevie. Ale wɔ le Dasiamime 1856 me la, eŋlɔ agbalẽ si dzi wòda ŋkɔ ɖo be: “Eʋegbe me nyawo kple lododowo nu ƒoƒo ŋuti nunya vevi.” Eƒe dɔ sia xɔ ŋkɔ ŋutɔ vevietɔ esi wònye ƒe eve kple afã pɛ koe nye ema wòva Eʋenyigba dzi.

Schlegel Ʋu Yi Eʋeawo Dome

Enye dzidzɔ nɛ be wodɔ mawunyadɔgbedela Knecht be wòava wɔ dɔ kpli ye. Mawunyadɔgbedela Knecht ye ŋlɔ Schlegel ƒe agbemeŋutinya. Ame eve siawo se vivi na dɔa ɖekae.

Schlegel xɔe se bliboe be hafi mawunyadɔgbededɔa nakpɔ dzidzedze la, ele be mawunyadɔgbedelawo nanɔ dumevi dzidziwo dome. Egblɔ be nyagbɔgblɔ na wo le kplɔ̃ ta ɖeɖe mesu na esia wɔwɔ o. Ele be mawunyadɔgbedela naɖe gbeƒã na amewo le woƒe agbe me nuwɔnawo wɔƒe kple woƒe dɔwɔƒewo. Wokpɔe be Anyako, du si me amewo sɔ gbɔ ɖo wu le nuto ma me la sɔ na dɔ sia wɔwɔ ŋutɔ. Woƒle anyigba si le teƒe nyui aɖe le afi ma.

Schlegel Ʋu Yi Waya

Le Afɔfiɛ 1857 ƒe nuwuwu la, ezɔ mɔ yi Waya, eye wònɔ afi ma va se ɖe ƒe si kplɔe ɖo ƒe Dzome me. Eyi eƒe gbegɔmeɖeɖedɔa dzi le afi ma, eye wòtsa ɖaɖe gbeƒã le nuto vovovowo me. Ewɔ dɔ le suku si le nuto ma me hã me. Le ƒe ma ke me la, ewu Biblia ŋutinyawo ƒe agbalẽ aɖe gɔme ɖeɖe nu eye wòɖoe ɖe wo de be woata. Eɖe Yohanes ƒe nya nyui gbalẽ wɔdɔɖeamedzi la hã gɔme ɖe Eʋegbe me. Ke hã eva de dzesii be ale si yebui tsã be Wayagbe lae nye Eʋegbe adodoetɔ la mele teƒe o.

Ɖekakpui aɖe si woyɔna be Christian, si kpena ɖe eŋu ŋutɔ le eƒe gbegɔmeɖeɖedɔa me la hã va gblẽe ɖi dzo. Schlegel ɖe mɔ na ɖekakpuia be wòayi aɖasrã nɔa si le dɔ lém la kpɔ, gake ɖekakpuia megatrɔ gbɔ va egbɔ o. Ɖekakpuia ƒe nuwɔna sia te ɖe edzi vevie, eya ta ebia be woagbugbɔ aɖo ye ɖe Anyako. Eyi eƒe gbegɔmeɖeɖedɔwo dzi le du sia me, eye wòwu nya nyui gbalẽ eneawo gɔme ɖeɖe ɖe Eʋegbe me nu. Nya nyui gbalẽ eneawoe nye Mateo, Marko, Luka kple Yohanes.

Dɔ Aɖeke Menye Dɔ Gugu O

Eyi edzi nɔ gliwo kple lododowo nu ƒom ƒu tso nutoa me vi dzidziwo gbɔ. Zi geɖe la, ewɔa dɔ va se ɖe zãtiƒe. Ƒãa hafi wòɖina ɖe eme le ŋdɔkutsu dzatsɛ gɔ̃ hã me.

Aleke gbegbe teladɔ si Schlegel srɔ̃ ɣemaɣi la va ɖe vi nɛe nye esi. Gbe ɖeka exɔlɔ̃ Knecht to nyatoƒoe be yeƒe awuwo kple awudziwuiwo le ŋu kpem na ye. Eteƒe medidi o Schlegel kpe ɖe eŋu. Woƒle awutɔvɔwo le Keta, eye nɔvi eve siawo nɔ awuwo tɔm va se ɖe esime awu sɔ gbɔ ɖe wo si zã.

Schlegel Ɖe Srɔ̃

Schlegel ƒe didi vevi si wòɖe gblɔe nye be yeadi be yeanɔ Afrika ƒe 10 hafi atrɔ ayi yewo de.

Ɣemaɣi la, eƒe lãme sẽ ŋutɔ, ale be ebia tso eƒe kɔmitia si be woaɖe mɔ na ye yeaɖe srɔ̃. Le Anyɔnyɔ 1858 me la, ezɔ mɔ yi Christiansburg be yeaɖaɖe yeƒe ŋugbetɔ Lydia Stöcklin si tso Basel. Dzomee woɖe srɔ̃a.

Eteƒe medidi o srɔ̃a Lydia va kpɔe be Afrikae yeva vavã! Asrã alo atikesi sesẽ aɖewo ɖe kpe nɛ. Schlegel nɔa eŋu le dɔba dzi zã kple keli. Lydia ƒe lãme va sẽ gla.

Schlegel Ƒe Dɔléle Kple Eƒe Ku

Gake eteƒe medidi o Lydia ŋutɔ hã gava zu dɔnɔdzikpɔla, elabe srɔ̃a Schlegel ŋutɔ hã gadze dɔ. Eƒe taɖuame xoxoa gatrɔ gbɔ.

Esi wobia tso Schlegel si be wòayi mɔkeke la, egbe. Eƒe zɔhɛ Knecht va ƒoe ɖe enu ale be mawunyadɔgbedede ƒe dzo ganyɔ ɖe eme. Eya kple eƒe zɔhɛ wode sɔ dzi dze mɔ.

Mɔzɔzɔa te ɖeɖi eŋu vevie, ege le sɔ dzi zi eve sɔŋ, eye wòku ƒe enyi zi geɖe le mɔa zɔzɔ me. Esi wòtrɔ gbɔ la, dɔlélea te eŋu. Esi ɖɔkita aɖeke mele Anyako o ta la, eɖoe be yeagayi Akropong. Mawunyadɔgbedela Plessing ƒoe ɖe enu wòva Keta boŋ, elabe ele bɔbɔe wu be wòaɖo tɔdziʋu le Keta ayi Akropong. Dɔa ɖi tsi ɖe eŋu hafi wòva ɖo, eye eƒe dɔlélea nɔ nyanyram ɖe edzi gbe sia gbe.

Schlegel ƒe nɔnɔmea nye nuxaxa na srɔ̃a kple mawunyadɔgbedela geɖewo, eye wonɔ eŋu le dɔba dzi va se esime wòmia nu kpoo le Damɛ 1, 1859 dzi. Schlegel xɔ ƒe 32 pɛ ko ɣemaɣi.

Johann Bernhard Schlegel Ƒe Agbemeŋutinya Read More »

Gottlob-Christoph

Gottlob Christoph Däuble

Gottlob Christoph Däuble

Gottlob Christoph Däuble ƒe ŋutinya

Dzidzɔ gã aɖe ŋutɔ wònye be wota Eʋegbe Biblia le Xexemeʋa Gbãtɔ wɔɣi. Biblia sia le vi geɖe ɖem va se ɖe egbe sia na Eʋeawo le afi sia afi si wole. Wometutu Mawu ƒe ŋkɔ le Biblia sia me o.

Gake ame kawoe tsɔ wo ɖokuiwo ke be woate ŋu awɔ dɔ sia ade goe? Wo dometɔ ɖekae nye aƒetɔ Gottlob Christoph Däuble. Esi woɖe Eʋegbe Biblia gɔme la, eyae kpe ɖe osɔfo Yakob Spieth ŋuti wogbugbɔ xlẽe to eme le ƒe 1898 me. Ame kae wònye? Na míakpɔe ɖa.

Gottlob Christoph Däuble Ƒe Ƒometɔwo

Gottlob Christoph Däuble nye Yakob Däuble (Jakob Däuble) kple srɔ̃a Luise ƒe viŋutsu mawunyadɔgbedela, si wogayɔna be dutanyanyuigblɔla gbãtɔ. Wodzii le Sindelfingen le ƒe 1822 me.

Gottlob Christoph Däuble fofo Jakob Däuble ʋu tso Hasslach si te ɖe Herrenberg ŋu va nuto si woyɔna be Gerlingen me le ƒe 1841 me. Ƒome siwo le Gerlingen bubu aɖeke metsɔ viŋutsu kple vinyɔnu geɖe ke na mawunyadɔgbededɔa wu Däuble ƒomea o. Aƒetɔ Yakob Däuble nye nufiala eye vi wuiɖekɛ nɔ esi wòkplɔ va nuto sia me. Via ŋutsu etɔ̃ va zu mawunyadɔgbedelawo eye via nyɔnu eve hã va zu mawunyadɔgbedelawo srɔ̃wo.

Gottlob Däuble Megaxa Xɔ Asrafo Ƒe Hehe O

Aƒetɔ Gottlob Däuble nye avɔlɔ̃la bibi hã. Enɔ lalam be woayɔ ye na “asrafo ƒe hehexɔxɔ.” Esi menye ƒe blaeve viwo katãe woate ŋu ayɔ na asrafo ƒe hehexɔxɔ o ta la, wodaa akɔ. Ame sia ame si da xexlẽme kɔkɔ aɖe le akɔdadaa me la, wonaa mɔe be magaxɔ asrafo ƒe hehe o.

Däuble da xexlẽdzesi kɔkɔ si nye 216. Esia wɔe be megaxa xɔ asrafo ƒe hehe o. Ekpɔe be Mawu ŋutɔe nye ema le mɔ tam na ye. Eka ɖe edzi be eyra ɖe ɖoɖo si le ye si be yeazu mawunyadɔgbedela la dzi.

Nu Si Ʋã Jakob Däuble Wòtsɔ Via Gottlob Na

Aƒetɔ Jakob Däuble, si nye Gottlob Christoph Däuble fofo la, nɔviŋutsu aɖe si le Gerlingen xlɔ̃ nui be ne medi be yeadze agɔ le Württemberg-fia dzi o la, ke netsɔ via ŋutsu ɖeka na wòawɔ dɔ le Ɖela la ƒe nuŋeŋedɔa me.

Le ƒe 1843 me la, Gottlob Christoph Däuble tsɔ eɖokui na be yeawɔ mawunyadɔgbededɔa eye woxɔe ɖe Basel. Le ƒe 1848 me la, woɖoe ɖe Ɣetoɖoƒe Bengal.

Dɔ Nyui Si Wòwɔ Na Eʋeawo

Aƒetɔ Däuble wɔ akpa vevi aɖe le Eʋegbe Biblia la gɔme ɖeɖe me.

Wowu Eʋegbe Biblia ƒe akpa si amewo lɔ̃a yɔyɔ be Nubabla Yeye la gɔme ɖeɖe nu le ƒe 1877 me.

Le ƒe 1898 me la, aƒetɔ Gottlob Christoph Däuble si ganye osɔfo hã kpe ɖe osɔfo Yakob Spieth ŋuti wogbugbɔ Biblia la xlẽ to eme nyuie hafi wova tae.

Eya ta ne èlé Eʋegbe Biblia xoxoa ɖe asi egbea la, ɖo ŋku edzi be ame aɖewoe wɔ dɔ sesĩe hafi wotae. Eya ta xlẽe wòaɖe vi na wò. Wò hã wɔ nane wòaɖe vi na ame bubuwo.

Gottlob Christoph Däuble Ƒe Ku

Numekukuwo megana míenya nu boo tso eƒe agbenɔnɔ ŋuti o. Le kpɔɖeŋu me, nyatakakawo na míenya be enɔ Bengal, gake míeganya nu boo aɖeke tso du bubu siwo me wòanya yi ŋu o.

Eku le Afɔfiɛ 13, 1853 (April alo avril 13, 1853).

Gottlob Christoph Däuble Read More »

Dzifa Gomashie

Aƒenɔ Abla Dzifa Gomashie

Aƒenɔ Abla Dzifa Gomashie

Aƒenɔ Dzifa Gomashie le eƒe ɔfis.

Aƒenɔ Abla Dzifa Gomashie nye Ghana nyɔnu fefewɔla, filmwɔla, filmŋlɔla kple dunyagblɔla.

Enye Tsaɖiɖi ƒe Dudɔnunɔla ƒe Kpeɖeŋutɔ tso ƒe 2013 va se ɖe ƒe 2017 me. Ame bubu va xɔ ɖe eteƒe esi Ghana Dukplɔla John Dramani Mahama si tso Dukɔa ƒe Demokrasi Habɔbɔ (NDC) me meɖu dzi le akɔ si woda le ƒe ma me la me o.

Aƒenɔ Gomashie Ƒe Agbemeŋutinya Kpui Aɖe

Wodzi Aƒenɔ Gomashie le Akra (Accra), tɔa ŋkɔe nye Aƒetɔ Patrick Dotse Gomashie, eye nɔa ŋkɔe nye Helen Gomashie. Wodzii le  Siamlɔm 25, 1965 dzi. Ewu sekɛndrisuku nu le St. Louis Senior High School le Kumasi. Le esia megbe la, ede Ghana Yunivɛsiti, afi si wòxɔ ɖaseɖigbalẽ le Fefewɔƒe ƒe Aɖaŋudɔwo me kple ɖaseɖigbalẽ le Fefewɔƒewo Dzi Kpɔkpɔ me. Emegbe eva xɔ “Xexemenunya Ƒe Masta” (Master of Philosophy) ɖaseɖigbalẽ le Afrikatɔwo Ƒe Nusɔsrɔ̃wo me le Afrikatɔwo ƒe Nusɔsrɔ̃wo Ƒe Dɔwɔƒe.

Aƒenɔ Gomashie Ƒe Dᴐwᴐnawo

Aƒenɔ Gomashie ƒe fefewɔdɔ dze egɔme le ƒe 1985 me esime wòva ge ɖe Aɖaŋufefewɔlawo Ƒe Habɔbɔ (Talents Theatre Company) me. Ekpɔ gome le fefe siwo gbɔna me: Black Star, Mambo, Chaka the Zulu, Jogolo kple The Third Woman me. Ewɔ akpa vevi aɖe hã le film geɖewo me siwo dometɔ aɖewoe nye: Ghost Tears, House of Pain kple Heart of Gold hã me.

To vovo na fefewɔdɔa la, eɖo nuɖuɖudzraƒe aɖe si woyɔna be ‘Mama Dzifa’s Kitchen’ le Ashale Botwe, gake megale dɔ wɔm fifia o.

Aƒenɔ Gomashie ŋlɔa GTV si nye Ghana-dukɔa ƒe tividɔwɔƒe ƒe fefe si wona ŋkɔe be Le Dzo Gbɔ (By The Fire Side) ƒe fefewɔgbalẽwo. Eya ŋutɔ hã kpɔa gome le fefeawo wɔwɔ me. Ɖe wotrɔ asi le fefe sia ŋuti be woatsɔ ade dzi ƒo na ɖeviwo be woanɔ nu xlẽm ahatu nuxexlẽŋutetewo ɖo.

Akpa Si Wòwɔna Le Dunyagbɔgblɔ Me

Le ƒe 2013 me la, Dukplɔla John Dramani Mahama ɖoe wòzu Tsaɖiɖi, Aɖaŋudɔwo Kple Dekɔnuwo ƒe Dudɔnunɔla ƒe Kpeɖeŋutɔ. Enɔ ɖoƒe ma ʋuu va se ɖe esime woɖu woƒe dunyagblɔha NDC dzi le akɔ si woda le ƒe 2017 me la me.

Le ƒe 2020 me la, eɖu dzi le Sewɔtakpekpe ƒe akɔ la me le Dukɔa ƒe Demokrasi Habɔbɔ (NDC) ƒe ŋkɔ me le Anyiehe Ketu (Ketu South) eye wògakpɔtɔ nye Sewɔtakpekpemetɔ fifia.

Aƒenɔ Abla Dzifa Gomashie Read More »

Vinɔkɔ Akpalu si nye hakpanyaŋlɔla gãtɔ si nɔ Eʋenyigba dzi

VINƆKƆ AKPALU—Eʋeawo Ƒe Hakpanyaŋlɔla Gãtɔ

VINƆKƆ AKPALU
Eʋeawo Ƒe Hakpanyaŋlɔla Gãtɔ

Vinɔkɔ Akpalu le eƒe xɔ mɔnu

Vinɔkɔ Akpalu lae nye papa tsitsi si le ketea me
Hakpanya viviwo le Eʋeawo si. Wodzia ha siawo le azãɖuƒewo, kuteƒewo kple wɔna vevi bubuwo me.

Eʋeawo mefena le hakpanyawo ŋuti kura o, eye wodea asixɔxɔ hakpanyaŋlɔlawo hã ŋuti ŋutɔ.
Togbɔ be hakpanyaŋlɔlawo de ha le Eʋenyigba dzi hã la, hakpanyaŋlɔla ɖeka aɖe ya ƒo wo katã ta: Eyae nye Vinɔkɔ Akpalu. Míagblɔ eƒe agbemenya vi aɖe ko ne nàse.

Wodzi Vinɔkɔ Akpalu

Wodzi Vinɔkɔ Akpalu le ƒe 1888 me lɔƒo le Tsiame si te ɖe Anyako ŋu le Volta Nutome. Akpalu fofo ŋkɔe nye Kpodo Ahiamadi. Aƒetɔ Ahiamadi nɔ Fiaxo, si didi kilometa 10 tso Aŋlɔgã gbɔ. Dadaa Ehi, ya nye Anyakovi dzidzi, eye eya hã nɔ ƒukpo bubu aɖe dzi.

Vinɔkɔ Akpalu si nye hakpanyaŋlɔla gãtɔ si nɔ Eʋenyigba dzi

Wodzi Akpalu le nɔnɔme madeamedziwo me. Eƒo nu tso nya siawo ŋuti le eƒe hakpanyawo dometɔ ɖeka me. Ɣleti etɔ̃ do ŋgɔ na edzidzi la, aʋa dzɔ le Anyako. Abe ale si wònɔna le ŋkeke mawo me ene la, futɔ siwo nye Europatɔwo do ŋɔdzi na Anyakotɔwo be yewoatɔ dzo woƒe dua. Eya ta eva hiã be Anyakotɔwo nasi. Akpalu dada, si fɔ fu ɣleti adee nye ema la, si dzo le Anyako yi Tsiame, afi si wòdzi Akpalu le.

Akpalu Fofo Ƒe Asitsatsa

Aƒetɔ Kpodo Ahiamadi, Akpalu fofo, nye asitsala. Etsɔa adzɔnuwo abe atama, aha, tu, ɖu kple avɔ ene yia Eʋenyigba ƒe dzigbenutowo me. Ne etrɔ gbɔna la, eƒlea rɔba kple detsiƒonu va dzrana. Enɔ asitsatsa sia dzi ƒe geɖe. Esi wònye be asitsatsa dea ame dzi ɣemaɣi wu agbledede ta la, aƒetɔ Kpodo metsi dzi kura ɖe anyigbaƒeƒle ŋu o. Esia va de via ŋutsu Akpalu fukpekpe geɖe me emegbe.

 

Akpalu Ƒe Ayaɖuɖuwo

Esi Akpalu fofo nye asitsala kple mɔzɔla ta la, eya ŋutɔ mete ŋu he via o. Wogblẽ Akpalu ɖe dadaa kple eƒe ƒometɔwo gbɔ. Dadaa ku esime wònye ŋutsuvi dzaa ko, eye wòva tsi eƒe ƒometɔ aɖe si me. Ƒometɔ sia sẽ ŋuta le Akpalu ŋu ale gbegbe be ɖeko wòva si dzo le egbɔ.

Ɣeaɖewoɣi la, etsia dɔmeɣi. Awu ʋɛ aɖewo koe nɔ esi. Togbɔ be ele nenema hã la, wozi edzi wòwɔa dɔ sesẽ le aƒea me wu ɖevi bubuawo. Nyateƒee, wosẽ ŋuta le eŋu ale gbegbe be eƒe nu wɔ nublanui na eɖokui eye wòɖe eƒe seselelãmewo gblɔ le hakpanyawo me.

Akpalu Zu Hakpanyaŋlɔla

Kaka Akpalu naxɔ ƒe blaeve vɔ atɔ̃ la, ezu hakpanyaŋlɔla kple hafiala. Zi geɖe la, eƒoa ɖeviwo nu ƒu le ƒuta hefiaa hadzidzi wo. Eteƒe medidi o, eƒe nuwɔna sia he ame tsitsiwo ƒe susu. Gake eƒe hadzidziwo to vovo na ʋuƒoƒo kple haƒoƒo siwo katã nɔ anyi ɣemaɣi.

Eva trɔ asi le eƒe hawo ŋuti ale be woate ŋu aƒo ame tsitsiwo ƒe ʋu si woyɔna ɣemaɣi be Atigo alo Dekɔ la ɖe wo dzi. Ɣemaɣi la, melɔ̃ ɖe edzi gbã be ye ŋutɔe ŋlɔ yeƒe hakpanyawo o. Ɖe wògblɔ boŋ be ye fo si dzia haawo la tɔe, elabena woxɔe se be hakpanyaŋlɔlawo ƒe agbe va wua enu ɖe fukpekpe me godoo. Eya ta be ame nagblɔ be yenye hakpanyaŋlɔla la, efia be ele eƒe agbe kple dzidzɔkpɔkpɔ dem afɔku me. Gake emegbe la, eva lɔ̃ ɖe edzi bliboe be ye ŋutɔ kpa haawo, be nu si be yeadzɔ ko nedzɔ.

Akpalu ɖe srɔ̃ zi ade gake medze edzi o. Srɔ̃nyɔnuawo dometɔ aɖewo gblẽe ɖi le vimadzimadzi ta; bubuwo hã ku. Via nyɔnu ɖeka kolia si wodzi nɛ le eƒe srɔ̃ɖeɖe gbãtɔ me hã va ku emegbe.

VINƆKƆ AKPALU—Eʋeawo Ƒe Hakpanyaŋlɔla Gãtɔ Read More »

Togo-nyɔnu hadzila bibi xɔŋkɔ si ƒe gbe ganya sena egbea.

Bella Bellow Hadzila Gbevivitɔ La

Bella Bellow
Hadzila Gbevivitɔ La

Togo-nyɔnu hadzila bibi xɔŋkɔ si ƒe gbe ganya sena egbea.

“Bella,” si fia “nyonyo, atsyɔ̃” le Helagbe, Spaniagbe, Italiagbe kple Portugalgbe me lae nye Togo-nyɔnu hadzila gãtɔ ƒe ŋkɔ. Hadziŋkɔ si amewo lɔ̃a yɔyɔ na nyɔnu sia lae nye Bella Bellow. Ɛ̃, ŋkɔa nya se abe nyɔnu sia ƒe gbe vivi la ke ene.

Gake ame kae nye Bella Bellow? Eƒe hawo dometɔ aɖewo ɖe? Aleke gbegbe eƒe ŋkɔ de du? Na míakpɔe ɖa.

Ame Si Woyɔna Be Bella Bellow

Ðewohĩ èse eƒe hadzidzi aɖewo kpɔ, eye eƒe hadzidziwo léa dzi na wò. Ate ŋu adzɔ be mènyae kura o. Bella Bellow nye egbegbe Togo hadzilawo ƒe mɔtala kple hadzila si ƒe ŋkɔ Afrikatɔwo meŋlɔna be o.

Bella Bellow ƒe ŋkɔ ŋutɔŋutɔe nye Georgette Nafiatou Adzoavi. Wodzii le Dzove 1, 1945 le Tsevie, si nye du aɖe si didi tso Lome si nye Togo ƒe fiadu la gbɔ kilometa 35. Gake Agoué-Nyivé koŋue wònɔ le eƒe ɖevime. Georgette ƒe tagbɔ kɔ ŋutɔ le gɔmedzesuku kple sekɛndrisuku siaa. Esi wòwu sekɛndrisukua nu la, eyi Abidjan ɖasrɔ̃ agbalẽŋɔŋlɔdɔ le Côte d’Ivoire le suku si woyɔna be École des Beaux-Arts.

Bella Bellow Dze Hadzidzi Gɔme

Le ƒe 1963 me la, Bella dzi ha vivi aɖe zi gbãtɔ amewo se le sukuzã aɖe ɖuƒe. Eƒe tugbedzedze, eƒe gbe vivi kple dzo si le eme na be ɖeko wonɔa ekpem na azã xɔŋkɔwo kple sukuzã geɖewo. Ɛ̃e, Bella ƒe ŋkɔ de asi nyɔnyɔ me le Lome kple eƒe golɔgoewo me.

Bella ƒe nufialagã siwo le Beaux-Arts dometɔ ɖeka de dzesii be hadzidzi ƒe ŋutete gã aɖe le eme, eya ta ekplɔ Bella de asi na Gérard Akueson, si ƒe ŋkɔ de du le show-biz me. Akueson va zu Bella ƒe dɔdzikpɔla, eye wona hadziŋkɔ nyɔnu dzetugbe sia be Bella Bellow. Bella Bellow ƒe hadzidziwo zu léameɖebomenu blibo.

Bella Bellow Ƒe Ŋkɔ Te Nyɔnyɔ

Ale si Bella Bellow ƒe gbe vivina ta la, Benin ƒe Dukplɔla Hubert Maga kpee le ƒe 1965 me be wòadzi ha le Dahomey, si woyɔna egbea be Benin, ƒe Ɖokuisinɔnɔzã la dzi. Le ƒe 1966 me la, ekpɔ gome le Xexeme Katã Ƒe Ameyibɔ Hadzilawo Ƒe Azã me le Dakar si nye Senegal ƒe fiadu la me. Eƒe hadzidzia na be amewo katã ƒe tame ble fu, gbɔgblɔ bu ɖe wo, eye eƒe nu lé dzi na wo vavã. Ame sia ame agblɔ na wò be eƒe hawo vivina ŋutɔ. Vavãe, gbe vivi la hae wodzina kplii. Ɖetugbui la dzia ha eteƒe mekɔna o. Ŋutsuwo kple nyɔnuwo siaa melɔ̃na be yewoatso le yewoƒe zikpuiwo dzi ne wole eƒe hawo sem o.

Bella Bellow tea ŋu ɖea seselelãme ɖe sia ɖe ƒomevi gblɔna le eƒe hadzidziwo me. Eƒe hadzidzi aɖewo ana nase vivi le lãme, nàlé blanui, nakpɔ dzidzɔ eye ɖewo hã ana be nàyi ŋugble me blibo. Anyiehe Afrika nyɔnu hadzila Miriam Makeba ƒe hawo doa dzidzɔ na Bella ŋutɔ. Bella tsaka hadzila sia ƒe atsyãwo kple Togotɔwo ƒe hadzimɔnuwo, trɔ asi le wo ŋu tsɔ ɖe hadzidzi ƒe atsyã yeye ɖe go.

Xexeme Katã Ƒe Ameyibɔ Hadzilawo Ƒe Azã

Le azã sia dzi la, Bella Bellow ƒe ŋkɔ de du le xexea me godoo. Afrika bliboa di be yease eƒe gbe. Kotonutɔwo, Dakartɔwo, Bamakotɔwo, Akratɔwo, Niameytɔwo, Ouagatɔwo le to dzi be yewoase eƒe gbe.
Azãɖuƒea yɔ gbagba. Amewo ƒo zi ɖe teƒea kple susu ko be yewoase nyɔnu dzetugbe gbevivinatɔ sia ƒe gbe.

Esi wòɖo kpea dzi la, amewo fɔ ŋku ɖe edzi dzoɣlii. Ɣesiaɣi si wòdze ha aɖe gɔme la, amewo tsona ɖe tsitre, nɔa aseye tsom eye ne ewu ha aɖe nu la, wogatsona ɖe tsitre nɔa asikpe ƒom kakaka. Ɛ̃e, Bella ɖo asi azã bliboa dzi.

Gérar Akuesson, si nye eƒe dɔdzikpɔla kplɔe yi Paris. Afi siae Bella Bellow ƒe didi vevi aɖe va eme nɛ le. Esia va eme esi wokpee wòva dzi ha le fefewɔƒe xɔŋkɔ si woyɔna be Olympia. Ha vivi siwo gbegbe wòdzi le Olympia na be eƒe ŋkɔ nyɔ ganyɔ ɖe edzi. Fifia ya la, eƒe ŋkɔ le amewo katã nu le xexea me godoo.

Ezɔ mɔ ɖadzi ha le du vovovowo me. Eyi ɖadzi ha le Hadzila Xɔŋkɔwo Ƒe Azã si woɖuna le Rio de Janeiro le Brazil. Wɔna sia yi edzi le Brazil ƒe Maracana Bɔlƒoƒe, eye vavalawo wu ame akpe alafa ɖeka. Gbe ma gbe la, àsusu be anyitsi wode eƒe gbe me. Azã ma ɖuɣie woda ŋkɔ ɖe edzi be “Afrika-nyɔnu Bluz-dzila” eye Eurapatɔwo dia eƒe gbe be yewoase kple eƒe ŋkume be yewoakpɔ.

Du siwo me wòyi ɖadzi ha le la dometɔ aɖewoe nye Athens le Hela, Split le Yugoslavia, Rennes le France, Berlin le Germania, Guyana kple Guadeloupe.

Bella Bellow ɖe eƒe disk gbãtɔ Rockya ɖe go le Paris.

Bella Ƒe Ha aɖewo

Bella Bellow ƒe ha wɔdɔɖeamedziwo dometɔ ɖekae nye Blewu. Enye ha wɔblanui blefulãmename aɖe. Enana be amegbetɔ yia tame le etsɔ si gbɔna la ŋuti. Eƒe ha aɖewo hãe nye Ewɔa kple Lafoulou. Eƒe ha si nye Nye Dzi ya doa dzidzɔ na ŋutsuwo koŋ. Egblɔ le ha ma me be: “Nyemaflu wò gbeɖe o! Afi si nàyi la, nye hã mayi. Afi si woaɖi wò ɖo la, afi mae maku ɖo. Ku gɔ̃ hã mate ŋu ama mía dome o.”

Eye eƒe hadzidzi si Togotɔ geɖewo nya nyuie lae nye Denyigba. Edzi ha vivi sia tsɔ kafu woƒe denyigba si nye Togo.

Eƒe Ƒomegbenɔnɔ Kple Eƒe Ku

Esi Bella Bellow trɔ gbɔ va Togo la, eva ɖe ʋɔnudrɔ̃la Théophile Jamier-Lévy eye wodzi nyɔnuvi ɖeka kolia si ŋkɔe nye Nadia Elsa.
Bella Bellow ku le Dzome (Décembre alo December) 10, 1973 le ʋufɔku aɖe me. Etrɔ tso wo de yina Lome, eye afɔku sia va dzɔ ɖe wo dzi le teƒe si te ɖe Lilikɔƒe ŋu le Ziɔ-nutoa me. Bella ku le ʋufɔku ma me esime wòxɔ ƒe 28 pɛ ko.

Esiae nye Georgette Nafiatou Adzoavi si ƒe hadziŋkɔe nye Bella Bellow ƒe ŋutinya kpui aɖe. Àte ŋu ase eƒe ha aɖewo le nyatakakakpɔƒe sia.

Bella Bellow Hadzila Gbevivitɔ La Read More »

error: Mɔɖeɖe meli o !!
Scroll to Top