Aflatovi nye amagbe aɖe si wɔa dɔ geɖe na mí.

Aflatovi Le Kpuie Do Gawu

Aflatovi Le Kpuie Do Gawu

Aflatovi nye amagbe aɖe si wɔa dɔ geɖe na mí.

Aflatovi nye amagbe alo gbe aɖe si ŋkɔ meɖina kura le amagbewo alo gbewo dome o. Nu ka tae míele fu kpem le eyɔm be gbe alo amagbe? Susu la koe nye be amewo menya afi si yewoadae ɖo o. Ame aɖewo be gbe ye wònye, eye ame bubuwo hã be amagbe woayɔe.

Togbɔ be ame geɖe bua aflatovi le xexea me godoo be enye gbe hã la, menye gbe alo amagbe ƒoasie o. Ɛ̃e, kesinɔnu blibo amagbe sia nye. Le nyati sia me la, míakpɔ dɔ vovovo siwo gbe sia dana, ale si woɖanɛ ɖuna kple nu siwo ŋuti míakpɔ nyuie le le gbe sia zazã me.

Aflatovi Ƒe Dzɔtsoƒe

Aflatovi nye gbe aɖe si vuna ɖe anyigba, mekɔna o, eƒe amakpawo le suesuesue, gake wotri ŋutɔ. Eƒe seƒoƒo nɔa aŋutiɖiɖi. Gbe sia tso Persia kple India kaka ɖe xexea me katã. Ewɔna le anyigba xɔdzowo kple fafawo siaa dzi nyuie. Zi geɖe la, wokpɔnɛ le abɔwo, gli gbagbãwo kple aɖukpowo gɔ̃ hã dzi.

Nu Si Ta Wòdaa Dɔ Geɖe

Nunyiame vevi gbogbo aɖewo le gbe sia me. Wo dometɔ aɖewoe nye vitamin A, C kple E kpakple tomenu abe magnesiɔm, kalsiɔm, kple potasiɔm ene. Ami si woyɔna be Omega-3 gbogbo aɖe hã le eme, esia wɔe be amagbe sia to vovo na gbe alo amagbe bubuwo. Míakpɔ dɔ siwo wòdana dometɔ aɖewo.

Aflatovi Tea Ŋu Daa Nutete Kple Tetedɔwo

Amenyinu siwo woyɔna le yevugbe me be flavonoid kple alkaloid le gbe sia me, esiawo wɔnɛ be wotea ŋu zãnɛ wòwɔa dɔ nyuie le nutete kple tetedɔwo dada me. Tetedɔ siawo dometɔ aɖewoe nye ƒunukpeƒetetedɔ, dɔkɔ alo blikɔ, kple ŋutigbalẽdɔléle.

Ŋutilãtakpɔnuwo Le Aflatovi Me

Ŋutilãtakpɔnuwo le eme, eye wokpena ɖe ŋutilã ŋu wòwɔa avu kple  lãmenugbagbevi gblẽnuwo.. Amagbe sia nana be ameti bliboa nɔa lãmesẽ me.

Aflatovi Kpɔa Ame Ta Tso Dzidɔwo Si Me

Numekukuwo ɖee fia be ami si woyɔna be omega-3 gbogbo si le aflatovi me nana wòtea ŋu ɖiɖia ʋusɔgbɔdɔ (blood pressure alo tension artérielle alo ʋumasinyuiedɔ) kple kolesterɔl sɔgbɔ ƒe nugbegblẽ le ame ŋuti dzi kpɔtɔ. Kolesterɔl nye ʋumenu si nana be ʋua tea ŋu wɔa ʋumenugbagbevi dzĩwo. Gakpe ɖe eŋu la, potasiɔm le aflatovi me zã. Potasiɔm kpɔa ame ta tso dzidɔ si me. Enana be ʋu ƒe sisi nɔa ɖoɖo nu, eye esia wɔnɛ be ʋusɔgbɔdɔ alo ʋumasinyuiedɔ meɖea fu na ame o. Gawu la, enana be lãkusiwo alo lãwawo hã nɔa lãmesẽ me.

Enana Be Nuɖuɖu Wɔa Dɔ Le Dɔ Me Nyuie

Esi wònye atsa alo atsakiti ƒomevi aɖe le aflatovi ƒe amakpawo alo aŋgbawo me ta la, enana nuɖuɖu wɔa dɔ le dɔ me nyuie. Eléa atsidada alo atsidɔdɔ nu, enana woyia nugodo nyuie edziedzi, eye wòtsia dɔgbometetedɔwo nu.

Edoa Ŋusẽ Dɔlélenutsiŋutetewo

Aflatovi nana be ame ƒe dɔlélenutsiŋutete me gasẽna ɖe edzi. Vitamin kple anyigbamenu gbogbo siwo le amagbe sia me kpakple eƒe dɔlélenutsiŋutete na wònye kpeɖeŋutɔ vevi aɖe na amegbetɔwo. Ekpɔa ame ta tso dɔlékuiwo kple dɔlélewo si me.

Ƒunukpeƒetetedɔ kple Ƒunukpeƒeveame

Ŋutete le aflatovi si be wòakpe nutete kple tetedɔwo dzi. Eɖea vevesese kple tete si ƒunukpeƒetetedɔ kple ƒunukpeƒeveamedɔ hena vanɛ la hã dzi kpɔtɔ. Amagbe alo gbe sia zazã edziedzi ate ŋu aɖe vevesese kple tete si tsoa dɔ siawo gbɔ la dzi kpɔtɔ. Ana be ame nate ŋu aʋã eƒe kpeƒewo bɔbɔe wu.

Edaa Ŋutigbalẽmedɔwo

Ne wotu aflatovi hesisii ɖe ŋutilã ƒe akpa si ŋutigbalẽmedɔ aɖe lé la, etea ŋu wua dɔlélea le teƒea. Etea ŋu nana be ŋutifieame kple ŋutilã ƒe ʋusrãdodo nu tsona.

Nuɖuɖu Ƒe Dɔmawɔmawɔ Nyuie Le Dɔ Me

Atsa alo atsakitsi ƒomevi aɖe le gbe alo amagbe sia me. Esia nana be nuɖuɖu wɔna dɔ le dɔ me na ame nyuie. Ale wɔ aflatovi tea ŋu ɖea nuɖuɖu ƒe dɔmawɔmawɔ nyuie le dɔ me na ame dzi kpɔtɔ.

Ʋusɔgbɔdɔ Kple Kolesterɔl

Ami si nye Omega-3 kple potasiɔm si le aflatovi me wɔe be wòtea ŋu ɖea ʋu ƒe sisi akpa kple kolesterɔl ƒe agbɔsɔsɔ dzi kpɔtɔ. Ezazã le nuɖuɖu me edziedzi ate ŋu aɖe ʋusɔgbɔdɔ kple dzidɔ dzi kpɔtɔ.

Suklidɔ Alo Aɖuɖɔvividɔ

Numekuku gbãtɔwo ɖee fia be aflatovi ate ŋu aɖiɖi sukli ƒe agbɔsɔsɔ le ʋu me dzi kpɔtɔ le ame siwo léa suklidɔ alo aɖuɖɔvividɔ gome. Gake ehiã be woagawɔ numekuku geɖe wu be woase eƒe dɔwɔwɔ kple eƒe agbɔsɔsɔme si sɔ woazã gɔme nyuie wu.

Nya Aɖe Le Amagbe Sia Si Ɖe Kansadɔ Ŋu

Ɖeko numekuku tso akpa si aflatovi wɔna le kansadada me dze egɔmee nye ema. Ke hã, numekuku gbãtɔwo de dzi ƒo ŋutɔ. Nu ka tae? Elabe wokpɔ kersetin (quercetin) kple kaempferol kple esiawo ƒomevi le amagbe sia me. Nu siawo nye ŋutilãtakpɔnuwo eye wotea ŋu ɖea tete dzi kpɔtɔ. Esiae ate ŋu awɔe be woatsi lãmenugbagbevi siwo wɔa kansa la ƒe dɔwɔwɔ nu kura.

Aflatovi La Ŋu Dɔwɔwɔ

Míate ŋu awɔ aflatovi ŋu dɔ le mɔ vovovowo nu.

Eƒe Mumu Ɖuɖu

– Tsɔ aflatovi ƒe amakpa alo aŋgba mumu kɔ ɖe salada alo nuɖuɖu ɖe sia ɖe si me woate ŋu ade amagbee me nàɖu.

–  Toe alo tui le mɔ̀ me nàfia eƒe tsi ano.

– Wu aflatovi ɖe detsi, atadi alo nugbagba, alo nu tɔtɔewo dzi atsɔ aɖo atsyɔ̃ na wo alo atrɔ woƒe ʋeʋẽ.

 Aflatovi La Zazã Le Nuɖaɖa Me

– Tsɔ aflatovi kple ayo tsaka nàtɔ le ami me atsɔ akɔ ɖe ba, ɖewohĩ dzeteba kple bubuawo ene dzi.

– Fie tsi aflatovi nàtsɔ akpe ɖe nu kpekpe si nèɖa la ŋuti aɖu, elabe amenyinu geɖe le eme.

– Kɔ aflatovi ɖe koklozi kple esiawo tɔgbi dzi natɔ abe ale si nèkɔa amagbe bubuwo ɖe koklozi dzi tɔna ene.

 Aflatovi La Zazã Le Atikewɔwɔ Me

– Tsɔ aflatovi ƒe amakpa ƒuƒu de tsi dzodzo me wòaɖe ɖe eme nyuie nàno, ana wò dzi nadze eme bɔkɔɔ, eye wòade wò lãmesẽ hã dzi ŋutɔ.

– De aflatovi vinega alo ami me wòaɖe ɖe eme nyuie nàzãe le dzodoƒe alo adee aha sesẽ me wòaɖe ɖe eme nyuie nàzã abe gbetike ene.

– Tu aflatovi alo to eƒe amakpawo nàtsɔ aɖo ŋutilã ƒe akpa si te dzi ale be vevesese la nu natsi.

Kpɔ Nyuie Le Aflatovi Ŋu Le Esiawo Me

Wogblɔna be aflatovi megblẽa naneke le ame ŋuti ne wozãe le ŋuɖɔɖo me o. Gake ame aɖewo hã be enana lãme gblẽa yewo alo mexɔ dɔ me na yewo o. Eya ta anyo be nàbia mɔfiame tso kɔdzidɔwɔlawo alo gbetikenyalawo gbɔ hafi atso nya me be yeazãe loo alo yemazãe o. Esia le vevie ŋutɔ nenye be numaxɔamedɔ (allergy) le ŋutiwò. Eya ta anyo be nyɔnu funɔwo kple nyɔnu siwo le no nam vi la nakpɔ nyuie le amagbe sia zazã ŋuti. Ele be woabia gbe woƒe ɖɔkitawo alo gbetikewɔlawo woalɔ̃ ɖe edzi na wo hafi woazãe.

Le nyataƒoƒo me la, aflatovi nye dzɔdzɔmetike si woate ŋu azã le mɔ vovovowo nu, ŋusẽ le eŋu, eye viɖe vovovowo le eŋu le atikewɔwɔ me. Aflatovi kpea tete alo tetedɔwo dzi, ŋutilãtakpɔnuwo le eme, ŋutete le esi be wòaxe mɔ na kansadɔ va se ɖe afi aɖe. Ne èzãa amagbe maxɔŋkɔ sia le wò nuɖaɖa, tiinono kple bubuawo me la, àkpɔ eƒe viɖewo eye ànɔ lãmesẽ aɖe si nu me.

Eya ta tee kpɔ, ɖewohĩ esia asɔ na wò, eye wòakpɔ wò kuxi ɖefuname aɖe gbɔ. Ɖo ŋku edzi be menye dɔyɔƒee degbea.org ƒe nyatakakakpɔƒe sia nye o, ke boŋ ɖe wòku nu me tso teƒeteƒewo.

Kpɔ nyati siawo hã:

Hɔ̃sugogo Be Aklãdɔwo Neɖe Ke!

Defetsui Ƒe Viɖewo Sɔ Gbɔ Loo

 

Aflatovi Le Kpuie Do Gawu Read More »

Defetsui alo dzegbesui

Defetsui Ƒe Viɖewo Sɔ Gbɔ Loo!

Defetsui Ƒe Viɖewo Sɔ Gbɔ Loo!

Defetsui alo dzegbesui

Defetsui alo degbesui nye gbe ʋeʋĩ aɖe si wozãna ŋutɔ le anyigba xɔdzowo dzi. Le kpɔɖeŋu me, gbe sia xɔ ŋkɔ ŋutɔ le Benin, Nigeria, Ghana, Togo, Kamerun kple Madagaskar. Nenema kee wòxɔ ŋkɔ le Anyiehe Asia kple Bismark Ƒukpohatsotso la hã dzi. Woda asi ɖe gbe sia dzi le Polinesia, Hawaii, Brazil, Panama, Karib-duwo kple Mexiko be ezu yewo de ƒe gbe koŋ.

Míayɔ gbe sia be amagbe hã, elabena amewo ɖanɛ ɖuna abe amagbe ene. Amewo nyanɛ ɖuna abe ale si wonyaa gboma ene. Defetsui alo degbesui nɔa anyi ƒea katã. Wodonɛ le aƒe me eye egatea ŋu nɔa gbe me hã. Degbesui ʋẽna lilili, wozãnɛ abe nu ʋeʋĩ ene le dukɔ aɖewo me.

Gake menye amagbe koe defetsui nye o, enye dɔdagbe alo atike hã. Degbesui tea ŋu wua dɔlékui vovovowo aleke kee wo nu sẽe o. Amenyinu vovovowo le defetsui me. Amenyinu siawo dometɔ aɖewoe nye tannin, fenɔl, kalsium, fɔsfor, ayɔn, vitamin A kple bubuwo. Nu siawo katã nyo ŋutɔ na ame ƒe lãmesẽ.

Susu siawo tae míedi vevie be míaƒo nu tso vi siwo amagbe sia ɖena ŋu.

Enana Be Ŋku Kpɔa Nu Nyuie

Vitamin A sɔ gbɔ ɖe defetsui me, eye esia nana be ŋku tea ŋu kpɔa nu nyuie. Le nyateƒe me la, Vitamin A hiã be ŋkuvi alo ŋku ƒe gadaglamakui nawɔ dɔ nyuie. Eya tae degbesui ate ŋu akpe ɖe ŋutiwò ŋutɔ le ŋku ƒe fuɖenamewo gome.

Ne vitamin A mesɔ gbɔ le lãme na wò o la, ate ŋu ana be nàlé dɔ aɖe si nana be ame ƒe ŋkuwo megawɔa aɖatsi o. Ame siwo le dɔ sia lém megatea ŋu faa aɖatsi o. Eya ta degbesui ƒe aŋgbawo ɖuɖu ate ŋu awɔe be ame naƒo asa na dɔléle sia.

Funɔwo nakpɔ nyuie: Ne funɔ aɖe ɖua amagbe sia fũu akpa la ate ŋu agblẽ nu le vi nɔdɔme la ŋu. Nyɔnu siwo le no nam vi hã nakpɔ nyuie le amagbe sia ŋuti.

Enana Be Nuɖuɖu Wɔa Dɔ Nyuie Le Dɔ Me

Defetsui tea ŋu nana be ame medea atsi alo eƒe ƒodo hlana o, eye wònana hã be nuɖuɖu wɔa dɔ le dɔ me na ame ɖe ɣeyiɣi dzi. Degbesui ƒe tii nana be ame ƒe dɔ me dzea akɔ anyi ne eƒe dɔ me mele wɔwɔm nyuie o, eye enana hã be wodea afɔdzi nyuie. Defetsui ƒe tii léa dzixɔdzo alo dzifiafiã hã nu.

Eɖea Sukli Dzi Kpɔtɔna Le Ʋu Me

Ŋutete manyagblɔ aɖe le defetsui si be wòaɖe sukli dzi kpɔtɔ le ʋu me. Defetsui kpɔa ame ƒe ƒomeɖe si nye ŋutinu si wɔa lãmetsi si woyɔna be ƒomeɖetsi (insulin) la ta. Numekuku tso afiwo ŋu ɖo kpe nyataƒoƒo sia dzi. Esi wona defetsui afiwo la, eɖe sukli ƒe agbɔsɔsɔ dzi kpɔtɔ le woƒe ʋu me. Eye esi wodo esia kpɔ le suklidɔléla aɖewo ŋu la, eɖe sukli dzi kpɔtɔ le woƒe ʋu me.

Enana Be Dzi Wɔa Dɔ Nyuie

Amenyinu siwo nye kalsiɔm kple magnesiɔm le defetsui me, eye amenyinu eve siawo ɖea ami alo kolesterɔl manyomanyo dzi kpɔtɔ le lãme. Enana be ʋu tea ŋu sina le lãme na ame nyuie. Kolesterɔl manyomanyo tea ŋu nana be ame xɔa dzidɔ. Eya ta ne ame tsitsiwo le defetsui ɖum la, ate ŋu aɖe dzidɔ ƒe afɔkua dzi kpɔtɔ.

Míate ŋu axe mɔ ɖe dzidɔwo kple ʋukamedɔwo ƒe akpa gãtɔ nu ne míeɖua defetsuiŋgbawo.

Xlẽ esia hã: Hɔ̃sugogo Be Aklãdɔwo Neɖe Ke!

Enyaa Nudzodzoeviwo Kple Muwo

Dzɔdzɔmetike ƒokpli siwo woyɔna be kãfɔr, sineole, kple limonene le defetsui ƒe aŋgbawo me. Esiawo wɔe be defetsui tea ŋu nyaa nudzodzoeviwo kple muwo. Ne muwo kple tagbatsuwo ɖe kpe na mi la, miate ŋu ade defetsui ze alo adoe ɖe ze me alo adoe ɖe aƒea me ƒe teƒeteƒewo. Esia ana nudzodzoeviawo katã nasi dzo.

Eye ne enya nudzodzoeviwo dzoe la, ke ɖe mievo tso asrãdɔ alo atikesi hã si mee nye ekem.

Ewua Dɔléle Siwo Tsoa Ʋlo Ƒomevi Aɖewo Gbɔ

Numekukuwo ɖee fia be degbesuimakpa wua dɔlékui siwo tsoa ʋlo alo hlo ƒomevi aɖewo gbɔ. Eya ta le ŋutigbalẽdɔ aɖewo gome la, ne wotu degbesuimakpawo tsɔ ɖo teƒea la, wokuna.

Defetsui Léa Tete Nu

Defetsui hã tea ŋu ɖea tete dzi kpɔtɔna abe ale si yevutike siwo woyɔna be aspirin kple ibuprofen hã ɖea tete dzi kpɔtɔna ene. Defetsuiŋgbawo nyo na ame siwo aŋɔmeɖui le dzinukpɔɣi, dɔmeɖui, toɖui kple asrãdɔ alo atsikesi ɖea fu na la ŋutɔ. Ele be woaɖa amagbe sia ƒe aŋgbawo anɔ nonom eye woakpɔ gbɔdzɔe.

Etsia Mitsinyenye Alo Miŋɔŋɔ Nu

Le dukɔ geɖewo me la, wozãa defetsui tsɔ tsia mitsinyenye alo miŋɔŋɔ nu. Eya ta defetsui ƒe aŋgbawo tea ŋu tsia mitsinyenye alo miŋɔŋɔ nu ale gbegbe. Ne ame aɖe le mitsi nyem alo ŋɔ mi la, ele be wòatu defetsuia ahade dze vi aɖe eme eye wòanoe.

Nu si na be defetsui tea ŋu tsia mitsinyenyee nue nye ami aɖe si le eme si wɔa dɔ ɖe dɔgbovia dzi tẽe.

Gbɔgbɔtsiameƒo Kple Gbɔgbɔmasuame

Ne ame aɖe ƒe ŋɔti me xe alo amea mele gbɔgbɔm nyuie o la, ate ŋu atugu defetsuiŋgbawo le asiƒome eye wòanɔ egbɔm.

Enana Be Nu Me Meʋẽna Na Ame O

Ne ame aɖe ɖua defetsui ƒe ati abe ati ɖuɖu ene la, awu dɔlékuiwo le nu me nɛ eye wòana hã be eƒe aɖuwo magblẽ o. Eya ta àte ŋu aŋe defetsui ƒe ati anɔ ɖuɖum edziedzi. Àte ŋu ade defetsui ƒe ke aha sesẽ me anɔ nonom, ana be ŋusẽ naɖo ŋuwò eye ɖeɖi manɔ ŋuwò tem kabakaba o. Nenema kee àte ŋu atsɔ eƒe ke la aɖo tii atsɔ anɔ nu me ƒosom ne wò vetome ƒlɔ alo ewɔ abi.

Defetsui Wua Abi

Wotsɔa defetsui bla abi hã. Ame aɖewo hã tsɔnɛ blaa agbɔgbɔ alo ahɔ̃vi na vidzĩ si wodzi eteƒe medidi o. Wozãa defetsui ƒe ami le abiwutike aɖewo wɔwɔ me.

Enana Be Taɖa Tsina Nyuie

Ne wowɔ kansatike na ame aɖewo la, ɖa nyɔna le ta na wo. Numekukuwo ɖee fia be defetsuiŋgbawo ƒe ami tea ŋu nana be ame siwo wozã dɔdamɔnu siawo tɔgbi na la ƒe ɖa gatona.

Edoa Ŋusẽ Ame Le Gbɔdɔdɔ Gome

Amenyinu aɖewo le defetsui me siwo nana be ŋutsu tea ŋu lĩna alo tsona nyuie. Eye amenyinu sia tea ŋu nana hã be ŋutsuwo ƒe aʋa tea ŋu nɔa lãmesẽ me. Enana hã be ŋusẽ nɔa lẽvi siwo nɔa woƒe tsinyènye me la hã ŋu.

Le go bubu me la, dzɔdzɔmetike siwo woyɔna be anetol kple boron hã le defetsuiŋgbawo me. Dzɔdzɔmenu siawo nana be lãmetsi si woyɔna be estrodzen dzina ɖe edzi le nyɔnuwo ƒe lãme. Eye dzɔdzɔmenu siawo ke nana be lãmetsi si woyɔna be eudzenol dzina ɖe edzi le ŋutsuwo me. Eudzenol sia wua dɔlékui siwo nɔa tsi siwo dona le nyɔnuwo ŋu me.

Defetsui Kpɔa Nuɖuɖuwo Ta

Wotea ŋu tsɔa defetsui kpɔa nukuwo kple nuɖuɖuwo ta. Ɖeko wòle abe ale si wozãa atikewo kple sabalatiwo alo kinigbewo tsɔ kpɔa nuɖuɖuwo tae ene.

Ami Ʋeʋĩwo kple Ami Ɖuɖuwo

Woate ŋu azã defetsui ƒe amiwo awɔ adzalẽwo, ami ʋeʋĩwo, ami sisiwo kple dɔmiwo.

Na Wòaɖe Vi Na Wò Kple Wò Ame Malɔ̃nugbɔawo

Míekpɔe le nyati sia me be defetsui wɔa dɔ geɖe ŋutɔ. Eɖea vi geɖe. Ewua dɔlékuiwo, woate ŋu atsɔe aɖo tii, woate ŋu aɖae abe gbe ene ano, woate ŋu atsɔe aɖo abi, woate ŋu aɖae abe amagbe ene aɖu, eye woate ŋu atugui agbɔ hã.

Ke hã tsitsiawo gblɔna be nunya la adidoe, asi ɖeka metunɛ o. Eya ta ne wò hã èganya nu bubu aɖe si defetsui wɔna evɔ míeŋlɔe ɖe nyati sia me o la, ke ŋlɔe ɖe susuŋlɔɖi ƒe aɖaka si le nyatia te la me naɖo ɖe mí. Ne ènya nu tso gbe bubu aɖewo ŋu nàdi be yeana míanya alo nàdi be míaƒo nu tso eŋu na ye la, na míanya le susuŋlɔɖi ƒe aɖakaa me le nyatia ƒe nuwuwu.

Defetsui Ƒe Viɖewo Sɔ Gbɔ Loo! Read More »

Hɔ̃sugogo alo xetro

Hɔ̃sugogo Be Aklãdɔwo Neɖe Ke!

Hɔ̃sugogo Be Aklãdɔwo Neɖe Ke!

Hɔ̃sugogo alo xetro

Hɔ̃sugogo alo xetro alo yetro nye gbe aɖe si nɔa anyi ƒea katã, ekɔkɔ vie, eŋuti le glidzaglidza eye ŋudzawo le eŋuti. Gbe sia ƒe alɔwo le sue nogoenogoe lebelebe, fu kedzekedzewo le eŋuti eye wole dzĩe. Gbe sia kɔkɔna abe meta ɖeka ene. Eƒe amakpawo alo aŋgbawo le bɔlɔbɔlɔe. Eƒe kuwo le suesue nogonogoe eye wole yibɔ. Nu siwo le abe fu ene le ati bliboa ŋu. Wozãa ati sia ƒe akpa sia akpa le atikewɔwɔ me, vevietɔ eƒe amakpawo kple kewo.

Ami vevi aɖe le hɔ̃sugogo ƒe kewo me. Eƒe kuwo le yibɔe eye ami ŋutiɖiɖi aɖe si ƒuna afã kple afã nɔa wo me. Azɔ hã amenyinu geɖe le wo me.

Xlẽ esia hã: Defetsui Ƒe Viɖewo Sɔ Gbɔ Loo!

Hɔ̃sugogo Zazã Le Atikewɔwɔ Me

Hɔ̃sugogo doa ŋusẽ ame eye wònana ame ƒe susu nɔa ŋute. Enana be aɖuɖɔ dzina ɖe aɖuɖɔtoe me kabakaba eye woɖɔa aɖuɖɔ kabakaba. Enana hã be gbɔdɔdɔ ƒe dzodzro nu sẽna ɖe srɔ̃tɔwo me. Eƒe tsi (alo afi) nana be woɖɔa aɖuɖɔ kabakaba. Enana ame ƒe ayi alo ŋutigbalẽ alo agbadze me fana miɔɔ.

Hɔ̃sugogo Daa Tetedɔ Ƒomevi Aɖewo

Gbe sia ƒe tsi (afi) tea ŋu daa tetedɔ ƒomevi aɖewo ŋutɔ, vevietɔ tetedɔ si tsoa tsilɔlɔ ɖe lãme na ame gbɔ. Woatsɔ nyi ƒe aɖuɖɔ atsaka gbe sia ƒe tsi ano. Woate ŋu ano gram 1.5  va ɖo gram 3.

Hɔ̃sugogo Daa Aɖuɖɔtoemedɔwo

Wozãa hɔ̃sugogo ƒe ke tsɔ daa agbadza kple aɖuɖɔtoemedɔléle kpakple asikɔmedɔlélewo. Dɔ siawo dometɔ aɖewoe nye aɖuɖɔtoemetetedɔ kple ayikumekpedɔ (kidney stone alo calcul rénal). Woate ŋu aɖa gbe sia ƒe ke na dɔnɔa wòanɔ gram 30 alo gram 60 nom zi eve alo zi etɔ̃ gbe sia gbe. Woɖaa eƒe aŋgbawo alo amakpawo hã na agbadzadɔléla alo babadɔlélawo. Esiawo nye dɔ siwo amewo xɔna zi geɖe to gbɔdɔdɔ me. Àte ŋu akɔ tsi dzodzoe ɖe eƒe kuwo dzi ahatu nu ɖe wo nu wòanɔ anyi vie, eye nàkui ano. Esia hã wɔa dɔ ŋutɔ le agbadzadɔ, babadɔ kple aɖuɖɔtoemedɔléle bubuwo gome.

Hɔ̃sugogo Daa Aklãdɔlélewo

Hɔ̃sugogo ƒe ke tea ŋu wɔa dɔ ŋutɔ le aklãdɔlélewo abe asrãdzẽ (atikesidzẽ) kple aklãtetedɔ (hepatitis alo hépatite) hã gome. Ewɔa dɔ ŋutɔ le aklãtetedɔwo gome. Woaɖa gbe sia ƒe ke gram 60 le tsi lita afã me, wòanɔ dzoa dzi miniti 20 va ɖo 30. Dɔnɔa nano gbe ɖaɖa sia mililita 30 va ɖo mililita 60 zi eve alo zi etɔ̃ gbe sia gbe.

Hɔ̃sugogo Daa Ʋumasɔgbɔdɔ Alo Ʋuvɔlelãmenamedɔ

Xetro klɔa ʋu me na ame eye wòtea ŋu nana be ʋu dzina ɖe lãme na ame siwo ʋu mesɔ gbɔ le lãme na o. Woaɖa gbe sia ƒe ke gram 60 le tsi lita afã me, wòanɔ dzoa dzi miniti 20 va ɖo 30. Dɔnɔa nano gbe ɖaɖa sia mililita 30 va ɖo mililita 60 zi eve alo zi etɔ̃ gbe sia gbe.

Hɔ̃sugogo Daa Kpeƒedɔlélewo

Hɔ̃sugogo wɔa dɔ ŋutɔ le lãmevee kple kpeƒedɔlélewo gome. Kpeƒedɔléle siawo dometɔ aɖewoe nye ŋuɖui, dɔkɔ (alo klikɔ) [dɔléle aɖe si nana be ame ƒe alɔnu kple kpeƒewo tena] ene gome.

Vivi tɔxɛ aɖeke mele hɔ̃sugogo ƒe amakpa me o. Woate ŋu azã eƒe aŋgba ɖeɖe ko alo atsakae kple ahamɛ ƒe aŋgbawo. Woate ŋu atugu gbe sia ƒe aŋgbawo (alo gbe eve siawo ƒe aŋgbawo) ahafia tsia kɔ ɖe nu me. Azɔ woatsɔ nyinotsi, adrotsi (adrutsi alo yevune si wɔ adru ƒe tsi) alo atikutsetsemetsi (juis de fruit alo fruit juice) atsaka xetro ƒe tsi si wofia ƒe gram 20. Eye woate ŋu atsɔ gbe sia ƒe aŋgba si wotu la gativi eve ahatsɔ nyinotsi mililita 120 va ɖo 180 alo tsi mililita 100 atsakae ano hã.

Kpeƒoame Sesẽwo Kple Gbɔxi Ƒomevi Aɖewo

Woatugu yetro ƒe aŋgbawo, ade yɔkumi vi aɖe eme ano. Ne wotugu gbea alea no la, etea ŋu kpea kpeƒoame sesẽwo kple gbɔxi ƒomevi aɖewo dzi ŋutɔ.

Hɔ̃sugogo Be Aklãdɔwo Neɖe Ke! Read More »

error: Mɔɖeɖe meli o !!
Scroll to Top