Habɔ aɖe si amewo le dzidzɔ kpɔm le

Eʋeawo Ƒe Lãɖemɔnuwo—Fɔlifɔfɔ Kple Tekalitete

Eʋeawo Ƒe Lãɖemɔnuwo
Fɔlifɔfɔ Kple Tekalitete

Habɔ aɖe si amewo le dzidzɔ kpɔm le

Asabudada, fɔlifɔfɔ, xaɖoɖo kple tekalitete míatsɔ aƒo Eʋeawo ƒe lãɖemɔnuwo ƒe nyati doŋgɔawo ta le nyati sia me.

Le nyati siwo do ŋgɔ me la, míeƒo nu tso lãɖemɔnu vovovowo ŋu. Anɔ eme be èganya bubuwo abe ʋãdada ene. Ne ènya ɖe la, ke na míanya ale be míaŋlɔe ɖe afi sia ale be wòaɖe vi na ame bubuwo.

Azɔ na míakpɔ lãɖemɔnu ene mamlɛawo. Woawoe nye asabudada, fɔlifɔfɔ, xaɖoɖo kple tekalitete.

Asabudada

Asabu nye ɖɔ tɔxɛ si nu asabukpewo le si wodana wòtsyɔa tɔmelãwo dzi. Asabukpeawo ƒe kpekpe na ɖɔ la yia to hetsyɔa lãwo dzi. Ale si wowɔe na woyɔe be asabu.

Tɔƒodela aɖe le asabu dam.

Fɔlifɔfɔ Alo Mikpafɔfɔ

Tɔdɔ bubue nye afɔli, aɖɔɖe kple mikpa fɔfɔ. Woyɔa aɖɔɖe si le tagbamu me be mikpa eye woyɔa esi wofɔna le amugã kple atsiaƒu me be fɔli alo afɔli. Gake míagayɔ wo katã kpuie le nyati sia me ko be afɔli, fɔli, aɖɔɖe alo mikpa.

Ele na fɔlifɔla be wòado ɖi aɖo tsia gɔme ke afi si mikpa alo afɔliwo le. Atsa asi le anyigba le tsia me adi wo. Ne eƒe asi ka wo ko la, efɔnɛ abe etɔ̃ ene alo wu nenema hehona vaa dzi. Edaa wo ɖe gagba alo nugoe si le tsia dzi me. Egadoa ɖi la ake yia tɔa gɔme fɔnɛ. Enɔa esia wɔwɔ dzi va se ɖe esime nugoea yɔ. Egbɔna vaa aƒe ɖadzanɛ ho gbogboe.

Mikpa kple afɔli ɖe wòvivina ŋutɔ. Ƒu mele wo me o, eya ta wolɔ̃a tagbamu me tɔ yɔyɔ be mikpa, àte ŋu aɖui ahami zi ɖeka. Wotsɔnɛ tɔa kalamii alo ɖanɛ mumui. Evivina ŋutɔ.

Xaɖoɖo

Lãɖemɔnu bubue nye xaɖoɖo. Wotsɔa fɔ lɔ̃nɛ eye woɖea mɔnu ɖe eŋu afi si lãwo ato age ɖe eme. Woɖonɛ ɖe afi si lãwo le totom le tɔsisi nu eye ne woge ɖe eme ko la womegatea ŋu dona o.

Ɣeaɖewoɣi la woɖonɛ ɖe gbe te le tɔsisi nu. Adeɣewo, akpawo, ƒãwo, gbolonuwo, klofiwo, adekɛwo te ŋu gena ɖe eme. Ɣeaɖewoɣi la dawo nyàa tɔmelãwo ɖe enu gena ɖe eme. Edzɔ ɖe dzinye kpɔ. Ɖeko mesi le xà la gbɔ.

Tekalitete

Lãɖemɔnu bubue nye tekalitete. Nyɔnuwo koŋue wɔa dɔ sia le tagbamu me. Wolãa deʋaya ƒe ɖɔmee sana ɖe wo nɔewo nu wòdidina, abe afɔ 80 ene. Ame evee tenɛ, ame ɖeka léa eƒe kɔtoe le afii eye ame evelia léa kɔtoe kemɛ. Wokplɔnɛ abe ale si wokplɔa ɖɔ le tagbamu me ene. Lãléla geɖe siwo ade 20 alo wu nenema nɔa tekalia yome. Ne lãwo abe akpa ene kpɔ tekalia gbɔna ko la, wovɔ̃na heɖoa agbi alo ba. Afi si woɖo agbia ɖo la ɖea dzesi, ale ame si ƒe akɔme wòɖo agbia ɖo la léa wo. Le nuto aɖewo hã me la, nyɔnuawo zãa ɖɔwo abe ale si wòdze le fotoa me ene.

Ame aɖeke mekpɔ mɔ ava nɔvia ƒe akɔme alé lã o. Wodea ka kusi si nu wode ɖɔkae sana ɖe woƒe ali le tsia me. Kaka nyɔnuawo nagbɔ le ɣetrɔ me la, woƒe kusiawo yɔna dzinadzina alo taŋtaŋ. Wonaa lã gbogbo ame eve siwo te tekali la. Woawo hã kpɔa wo tɔ gome sɔsɔe. Menye ga vie wokpɔna le dɔ sia me o.

Woléa akpa, abɔyi, kple gbɔvilolo. Tekalikpawo nya kpɔna ŋutɔ.

Akpa siwo nèɖuna ƒe geɖeawo nye tekalikpawo.

Ɖo Ŋku Wo Dzi

Lãɖemɔnu ʋɛ siwo ŋuti míeƒo nu tsoe le nyati etɔ̃ siawo me gakpɔtɔ le vi ɖem na amewo le Eʋenyigba dzi eye ame kae nya ne wò hã àva hiã mɔnu siawo etsɔ. Esi wònye be ave dodo mesea dzogbe zuna o, eye amenɔƒe mesea glikpo zuna o ta la, anyo be nànya lãɖemɔnu vovovo siwo ŋuti míeƒo nu tsoe.

Tu xo na viwòwo alo nɔviwòwo. Na woanya nu tso Eʋeawo ƒe asinudɔwo kple dɔwɔnawo ŋu. Kokloxɔ xoxo mekpea ŋu na koklo o.

Lãɖemɔnu  siwo ŋuti míeƒo nu tso la woe nye: (1) ƒudodo alo akpoŋdada, (2) agalãxɛɖoɖo alo agalãxaɖoɖo, (3) gbebublu alo tsibublu. (4) kpãɖoɖo, (5) atukpaxaɖoɖo, (6) asabudada, (7) ɖɔkpɔkplɔ, (8) fɔlifɔfɔ, (9) xaɖoɖo kple (10) tekalitete.

Míava ƒo nu tso tɔsisi kple bubuawo ŋu le nyati bubuwo me.

Numekula si ku nu me heƒo nyati siawo nu ƒu lae nye aƒetɔ Ɖela Dankwah, si nye Eʋegbeŋutinunyala kple gbegɔmeɖela bibi.

Eʋeawo Ƒe Lãɖemɔnuwo—Fɔlifɔfɔ Kple Tekalitete Read More »

Afrikanyɔnuvi aɖe lé lã ɖe asi

Eʋeawo Ƒe Lãɖemɔnuwo Agalãledzi Kple Atukpaxa

Eʋeawo Ƒe Lãɖemɔnuwo
Agalãledzi Kple Atukpaxa

Afrikanyɔnuvi aɖe lé lã ɖe asi

Atukpaxa alo atukpaxɛ anya ɖi nya yeye na wò. Nu kae wònye? Lãɖemɔnu hamehame siwo ŋu dɔ Eʋeawo wɔna la dometɔ ɖekae. Míeƒo nu tso lãɖemɔnu etɔ̃ ŋuti le nyati si nye Eʋeawo Ƒe Lãɖemɔnuwo me va yi. Míesrɔ̃ nu vevi aɖewo le nyati ma me ku ɖe lãɖemɔnu vovovoawo ŋuti. Ke nu kae míakpɔ le nyati sia me?

Míagaƒo nu tso lãɖemɔnu etɔ̃ bubu aɖewo ŋuti le nyati sia me. Mɔnu siawoe nye agalãledziɖoɖo alo kpãɖoɖo kple atukpaxɛɖoɖo alo atukpaxaɖoɖo kple ɖɔkpɔkplɔ.

Agalãledziɖoɖo Alo Kpãɖoɖo

Lãɖemɔnu bubue nye esi woyɔna be kpãɖoɖo. Wotsɔa milogoe xoxo eye woɖea nutuvia le enu. Wokpaa ʋuƒo gbabɛ dea enu. Wotsɔa sabala, negboe alo agbeli mumu kakɛ dea milogoe xoxoa me ɖoa kpãmɔ̀ lae. Woɖonɛ ɖe gota ke menye tɔ me o. Tɔwo, dzegbesi, alo tagbamu ƒe gowo dzie woɖonɛ ɖo. Woɖonɛ le afi si agalãledziwo alo agoglãwo ɖe do ɖo le me. (Agalã siwo ƒe nɔƒe nye tɔwo ƒe gowo dzie woyɔna be agalãledziwo.)

Agalãledzi

Woɖoa kpã la ɖe doawo nu. Ne wodo ko la wogena ɖe goea me be yewoaɖu nuawo. Tete mɔ̀ la fena alo tuna ɖe wo nu kpla. Kpãɖolaa vana trɔnɛ ɖe golo, kevi, tɔka alo tɔkpo tɔxɛ aɖe me.

Adã nɔa mo na wo wu tɔmegalãwo. Woƒe aɖugbowo sesẽ ŋutɔ. Woawoe wotsɔna ʋlia wo ɖokui tae. Gake agalãledziwo vivina ŋutɔ!

Nuɖuɖu vevie wònye. Wotsɔnɛ ɖaa dzeŋkplẽ alo akplẽdzĩi. Wo ɖuɖu ɖe wònana be ame ƒe lãmeƒuwo sẽna gla.

Ne ègaƒle ɖe le asi me alo èle eƒe detsi vivi aɖe ɖum la, ɖo ŋku edzi be menye aɖaŋu vie agalãledzilélawo wɔna o. Ɛ̃e, kafu wo ɖe woƒe agbagbadzedzea ta.

Atukpaxɛɖoɖo Alo Atukpaxaɖoɖo

Ne tsi ɖɔ teti la tɔmelãwo abe akpa ene tea dzidzi. Esia ganyea dɔ na tɔƒodelawo. Woɖoa nu si woyɔna be atukpaxa alo atukpaxɛ. Wozãa biya alo wisiki ƒe atukpa gãwo na lãɖemɔnu sia. Woɖea tukpaa gɔme, ke woxea eƒe nugbɔ sue la. Woɖaa akplẽ hekaa vi aɖe dea eme. Woɖonɛ ɖe tɔ me afi si megoglo o, hetua ati tsɔ dea dzesi afi siwo woɖo atukpaxɛawo ɖo. Akpaviwo gena ɖe atukpaa me be yewoaɖu nuɖuɖua. Wogena ɖe eme bibibi ŋutɔ. Anɔ gaƒoƒo eve megbe la atukpaxɛɖolaa trɔna gbɔna. Ewɔna dzaadzaadzaa tsɔa asi bua alo tsyɔa atukpaa nu. Etrɔa lãwo ɖe kusi me eye wògaɖea zɔ ɖe atukpaxa bubuwo dzi. Le ɣeyiɣi aɖe megbe la, eƒe kusi la yɔna taŋ.

Etsɔa nudogba dzidzenɛ dzrana. Atukpaxɛkpawo melolona o, eye wobɔbɔna ŋutɔ. Taflatsɛ míaƒe nyagãɖeɖi siwo aɖu tu le nu me na gɔ̃ hã lɔ̃a eɖuɖu le esi wole wluiwluiwlui hebɔbɔ ta.

Ame aɖewo yɔa atukpaxɛkpa be “ɖukpleƒui” elabena eƒe ƒuwo bɔbɔ ŋutɔ. Eƒe detsi ɖe wòvivina ŋutɔ.

Ɖɔkpɔkplɔ

Lãɖemɔnu ɖekae nye ɖɔkpɔkplɔ. Wokplɔa ɖɔ le atsiaƒu kple tɔsisi kpakple tagbamu me. Ɖɔ la didina ŋutɔ. Ame ɖeka nɔa kɔtoe le afii eye ame evelia nɔa kɔtoe le afimɛ. Wodea kpakpɛ alo kɔrke ɖɔa tame be wòaho ɖe dzi ne wole ɖɔa kplɔm eye wodea sabukpe viviviwo ɖɔa nu le ete be wòayi to ne lãwo nagato egɔme asi o. Wohea ɖɔa ɖɔɖɔɖɔ va gotae alo tɔdziʋua me heɖea lã siwo ɖo ɖɔa me le eme.

Te Lãɖemɔnu Siawo Kpɔ

Eya ta ne mo be yeadzaka wò la di milogoe alo atukpa aɖe nàdze mɔ. Ame aɖewo doa lo be anyigba meblea ame o. Nenema ke tɔsisi hã meblea ame o. Yi nàte lãɖemɔnu atɔ̃ siwo míekpɔ va yi dometɔ ɖeka kpɔ.

Míekpɔ ƒudodo alo akpoŋdada, agalãxaɖoɖo alo agalãxɛɖoɖo kple gbebublu alo tsibublu. Eye míekpɔ agalãledziɖoɖo alo kpãɖoɖo kple atukpaxɛɖoɖo alo atukpaxaɖoɖo.

Le nyati si akplɔ esia ɖo me la, míagakpɔ lãɖemɔnu ene aɖewo: Tekalitete, asabudada, fɔŋlifɔfɔ kple xaɖoɖo.

Numekula si ku nu me heƒo nyati siawo nu ƒu lae nye aƒetɔ Ɖela Dankwah, si nye Eʋegbeŋutinunyala kple gbegɔmeɖela bibi.

 

Eʋeawo Ƒe Lãɖemɔnuwo Agalãledzi Kple Atukpaxa Read More »

Afrikatɔ aɖe le akpoŋ dam

EƲEAWO ƑE LÃƉEMƆNUWO

EƲEAWO ƑE LÃƉEMƆNUWO

Afrikatɔ aɖe le akpoŋ dam

Akpoŋ alo ƒe si woda nyuie la ƒe viɖewoe nye kpoku, adeɣe, ƒã, abɔbi, deɣi kple tsiyi! Kae vivia nuwò ŋutɔ? Ɛ̃, Eʋeawo kpɔa dzidzɔ ɖe tɔmelã ŋuti eye tɔmelã aɖewo ya megbea zea me nɔnɔ o. Esia katã na míekpɔ lãɖelawo ƒe asixɔxɔ.

Lãɖelawo ɖea lã le tsi viviwo kple atsiaƒu siaa me le Eʋe-nyigba dzi. Ke lãɖemɔnu kawoe wozãna? Le nyati sia me la, míakpɔ lãɖemɔnu etɔ̃, woawoe nye ƒudodo, agalãxɛɖoɖo kple gbebublu. Eye nyati siwo akplɔ esia ɖo hã ado dzidzɔ na wò elabe míagakpɔ lãɖemɔnu bubu siwo dometɔ aɖewoe nye kpãɖoɖo, tɔsisi kple atukpaxɛɖoɖo. Ne ènya lãɖemɔnu aɖe si míeyɔ le afi sia o la, míeɖe kuku na míanya.

ƑUDODO ALO AKPOŊDADA

Ƒu, ƒe alo akpoŋ nye gavi si nu woxa tsɔ̃e hena lãɖeɖe. Woyɔa ƒutsɔtsɔ ɖe lã be ƒudodo, ƒedada alo akpoŋdada. Ƒudodo doa dzidzɔ na ame ŋutɔ. Nu ka tae? Elabe menye dɔ sesẽ wònye o, ɖeko wòle abe fefe ene eye míagblɔ ko be modzakaɖeɖee.

AKpoŋ le ame aɖe ƒe asi me

Eʋe aɖewo gblɔna be ƒea tsɔ lã, ɖewo be akpoŋ la tsi lã eye bubuwo hã be ƒu la ɖe lã. Míate ŋu agblɔ wo katã le ale si míedoa míaƒe gbetagbe lae nu. Gake aleke wodoa ƒu?

Wosaa ka ɖe ati nu eye wotsia ƒu ɖe ka la nu. Wosaa ati sue aɖe, si fona abe futufutu ene ɖe ka la ŋu si woyɔna be kpokpoli. Ne lã aɖe tsɔ ƒua la, kpokpoli la buna ɖe tsia me zi ɖeka eye ƒudola alo akpoŋdala nyana enumake be yelé tɔmelã aɖe. Ele na ƒudolaa be wòahe ƒua zi ɖeka. Kusi si nu wode ɖɔkae nɔa ƒudolaa xa le tsia me si me wòdea lã siwo wòɖe lae. Woɖea lã votavota siwo ƒe ɖewoe nye akpa, abɔyi, adeɣe, klofi, ŋɔtsi, adekɛ. Kaka ɣetrɔ naɖo la, ƒudolaa ƒe kusia yɔna taŋ kple lã ɖeɖe sɔŋ. Sɔhɛwo kple ame tsitsiwo siaa mefena le lãɖedɔ sia ŋu o. Nyɔnuwo nɔa lalam le tɔa to be yewoaƒle lã adzra.

Lãɖelawo dzraa wo na nyɔnuawo eye woawo ŋutɔ tsɔa ɖewo yia aƒe me ɖamena. Ne èto mɔ sia dzi la, àte ŋu alé ƒã, adeɣe kple ŋɔti gɔ̃ hã, gake ele be nàbla godzi nyuie. Ne mèbla go dzi nyuie o la, ƒã ade wò tɔ.

AGALÃXƐ ALO AGALÃXA

Lãɖemɔnu bubu si ŋuti dɔ Eʋeawo wɔna le nuto aɖewo mee nye agalãxɛ alo agalãxa ɖoɖo. Aɖaŋu ka gbegbee lãɖemɔnu sia hã lɔ ɖe eme? Na míakpɔe ɖa.

Agalãxɛ aɖe

Agalãxɛɖoɖo mesesẽ kura o. Lãɖela la dzea defɔ alo pãmplo lɛlɛlɛ tsɔ lɔ̃a agalãxae. Woɖea mɔnu ɖe xa la ŋuti, afi si agalãwo ato age ɖe eme. Azɔ wotɔa lãviwo alo akpa siwo wofli kakɛkakɛe la ɖe ka nu sana ɖe eme. Woɖoa xa la ɖe tagbamu, atsiaƒu alo tɔsisi me. Ne agalãwo kpɔ lãviawo le xaa me ko la, wodia xaa ƒe mɔnu gena ɖe eme. Kaka woanya la, wotsi atsyã me. Womagate ŋu ado go le xaa me. Aglã siawo wɔa avu ʋuu nu koe tia kɔ na wo. Tsitsiawo gblɔna be, ne enyo na adela lae wògblɔna be afi si ko yenɔ dae nye esi. Ɛ̃, lãɖelaa ate ŋu ako alɔgbɔnu aʋuʋu ta. Elabe ɖuɖu va aƒe.

Ne ègakpɔ agalã le fetridetsi me la, nàɖo ŋku aɖaŋu si gbegbe lãɖela wɔ hafi te ŋu lé agalã ma la dzi eye nàda akpe nɛ ɖe eƒe kutrikukua ta. Vevietɔ la, míada akpe na Yehowa Mawu ame si wɔ agalã be wòado dzidzɔ na amegbetɔwo.

GBEBUBLU ALO TSIBUBLU

Míeva ɖo lãɖemɔnu etɔ̃lia dzi. Eyae nye gbebublu alo tsibublu. Lãɖemɔnu sia te kame vie, gake dɔdɔameɖokuitɔ meyɔa mo eye ɖɔɖɔɖɔe woɖaa kpe wòbina. Nyateƒeae nye be lãɖemɔnu sia ɖea vi geɖe. Gake aleke wowɔnɛ?Lãɖelawo nɔa ha me ƒoa xlã gbekɔe si me tsi le, eye wogbodoa tsia alo blunɛ. Wotsɔa asi kua ba le tɔa gɔme nɔ dadam ɖe gbea me le tsia me. Esia wɔnɛ be dzidzi ƒoa lãwo wotɔtɔna henɔa bebeƒe dim. Vavãe, womeɖoa sisi gadɔa alɔ̃ o. Tɔmelãwo kpɔe be nu si ko yewoate ŋu awɔe nye be yewoaɖo agbi alo aɖo ba, si fia be woasi abe ɖe ba me. Ke aleke lãɖelawo wɔna léa wo? Lãɖela siawo nɔa asi tsam le tsia me kple tɔa gɔme eye woléa tɔmelã bebela siawo asiasii.

Nu si nyo le lãɖemɔnu sia ŋutie nye be lãɖelawo tea ŋu léa lã gã siwo be ɖe gbea te. Wò ŋutɔ àte ŋu akpɔ lã siwo woaɖe le Ziɔ alo Amu me la ɖaa le susu me. Ɖewohĩ àyɔ ƒã. Ƒãa! Ɖe wòvivina loo! Ke ɖeko míagblɔ be, “Nezɔ.”

NA WÒAƉE VI NA WÒ

Lãɖemɔnu siawo katã dometɔ aɖe ate ŋu aɖe vi na wò, eye míeka ɖe edzi be àtsɔ aɖaŋu blibo awɔ esiae.

Lãɖemɔnu etɔ̃ siawo kpe ɖe mía ŋuti míekpɔ agbagba siwo Eʋeawo dzena hafi tea ŋu kpɔa tɔmelã ɖuna. Le dukɔ aɖewo me la, tɔdziʋu gãwo kple ɖɔ ŋkuvi kpakple ɖɔ ŋkugãwoe wozãna. Míagakpɔ lãɖemɔnu bubu siwo yia edzi le Eʋeawo de le nyati siwo akplɔ esia ɖo la me.

Numekula si ku nu me heƒo nyati siawo nu ƒu lae nye aƒetɔ Ɖela Dankwah, si nye Eʋegbeŋutinunyala kple gbegɔmeɖela bibi.

 

EƲEAWO ƑE LÃƉEMƆNUWO Read More »

Ketevɔ siwo li egbea

Bubumewo Ƒe Kete La!

Bubumewo Ƒe Kete La!

Avɔlɔ̃la ƒe afɔ eveawo le anyi yim le gbɔgbɔm. Ka aɖewo to eƒe afɔbidɛwo me wòtsɔ le avɔkawo hem le dzi yim le gbɔgbɔm. Kaka nàkpɔ la, elɔ̃ avɔ nyui aɖe si le atsyɔ̃ blibo me. Eƒe amadedewo nya kpɔ eteƒe mekɔ o. Ɛ̃, bubumewo ƒe avɔ lɔ̃m wòle! Avɔ mae woyɔna be kete alo kente.

Afi kae kete alo kente lɔlɔ̃ dzɔ tso? Ame kawoe zãa avɔ sia egbea? Le nyati sia me la, míatee kpɔ be míakpɔ afi si kete dzɔ tso, ame siwo zãnɛ le gɔmedzedzea me kple ame siwo va le ezãm egbea.

Afi Si Kete Dzɔ Tso

Xotutu aɖewo gblɔ be Asanteawoe dze ketelɔlɔ̃ gɔme. Wotua xo be Kurugu kple Ameyaw siwo nye nɔvi eve aɖewo le kɔƒe si woyɔna be Bonwire me la yi adegbe gbe ɖeka le ŋdɔ aɖe me. Le gbea me la, wokpɔ Yiyi alo Yevigolotoe wòle yiyiɖɔ lɔ̃m. Yiyiɖɔ la nya kpɔ na wo ale gbegbe be woɖoe be yewo hã yewoawɔ etɔgbi. Esi wotrɔ yi aƒe me la, wotsɔ ka yibɔ kple ɣi lɔ̃ avɔ si wova na ŋkɔ be kete.

Evɔ ne èva Eʋenyigba dzi la, woagblɔ na wò be edzɔ tso Eʋeawo gbɔ. Woawo hã woagblɔ xotutu ma tɔgbi ke na wò be Eʋevi aɖewoe yi adegbe le Agɔtime ɖakpɔ Yiyi ƒe nuwɔna ma teƒe. Eya ta míate ŋu agblɔ afi si tututu ketelɔlɔ̃ dzɔ tso kple kakaɖedzi o. Nu si ko míenyae nye be nuto eve siwo woyɔna le xotutu mawo me Bonwire kple Agɔtime gakpɔtɔ xɔ ŋkɔ kokoko le ketelɔlɔ̃ me.

Aɖaŋudɔ Aɖe Ŋutɔe Ketelɔlɔ̃ Nye

Ketelɔ̃la tsɔ ɖeti, seda kple nu bubuwo trea ka siwo wòatsɔ alɔ̃ avɔbɛwoe. Avɔbɛwoe nye avɔ lebelebe siwo wova kpena wòzua avɔ blibo.

Le nuto aɖewo me la, wodea goma ɖetia hesianɛ. Ne eƒu la, woxatsanɛ ɖe ʋumedi suesuewo ŋu. Wodea goma ɖetikɛ la be wòasesẽ na elɔlɔ̃. Wotsiãa ɖetikɛawo eye wodenɛ xa me. Ne wode ɖetikɛwo xa me vɔ la, wodenɛ agbati me hedzea elɔlɔ̃ gɔme. Avɔlɔ̃la dzea agbagba wɔa dzesi si wòdi la ɖe avɔbɛ la me. Avɔlɔ̃la sẽa avɔbɛawo eye wòtɔnɛ wòzua avɔ tata blibo.

Ale Si Kete Dzroa Amewoe

Nyɔnu aɖe kple srɔ̃a le kete me Ketewo 

Ƒe alafa geɖe va yi la, Ɣetoɖoƒe Afrika fiawo ɖu anyigba si dzi tomenu xɔasiwo bɔ ɖo, si Europatɔ anyigbadilawo yɔ be Sikaƒuta la dzi. Afi siae wokua sika gbogbo aɖe le na Asanti-fiawo kple woƒe fiaƒomewo si na wozua hotsuitɔwo. Wotsɔa sikanu xɔasiwo kple avɔ siwo wolɔ̃ etɔxɛe ɖoa atsyɔ̃e na fiagã siawo kple fia siwo le wo te tsɔ ɖea woƒe hokpɔkpɔ, ŋusẽ, kple amegãnyenye fiana le wo teviwo ŋkume. Wova tsɔ ŋkɔ na avɔ tɔxɛ si fiawo tana be kete. Ɖewohĩ Twigbe me nya si nye kɛntɛn si fia kusi le Eʋegbe mee wowɔnɛ, elabe avɔ sia lɔlɔ̃ ɖi kusilɔlɔ̃. Gbe bubu dolawo hã lɔ̃a avɔ sia le Ɣetoɖoƒe Afrika. Le Asante-fiawo gome la, kete va zu dzesi tɔxɛ si le tsitre ɖi na amegãnyenye kple fianyenye.

Womeɖe mɔ le fiawo ƒe kete ƒe atsyã nyui lɔlɔ̃ ŋu na ame sia ame o. Woɖo fiawo ƒe avɔlɔ̃la bibiwo ƒe ƒuƒoƒo ɖi be woalɔ̃ avɔ xɔasi siawo. Wokpɔa kete siawo ƒomeviwo lɔlɔ̃ ta be wòanɔ ɣaɣla. Wode se na avɔlɔ̃la bubuwo katã be womegalɔ̃ atsyã siwo wolɔ̃na na fiawo kple fiaŋumewo ɖeɖe ko la na ame bubu aɖeke o. Fia la dzraa avɔ alafa geɖe ɖo, ɖe sia ɖe kple ale si wolɔ̃e kple eƒe atsyã tɔxɛ. Le kɔnu nu la, fia metaa avɔ ɖeka tɔgbi le dutoƒo ɣesiaɣi o.

Kete Ƒe Amadedewo Didi

Le ƒe alafa 16 lia me la, avɔ ƒomevi bubuwo te dodo le Ɣetoɖoƒe Afrika. Womelɔ̃ avɔ yeye siawo le Afrikatɔwo ƒe agbati dzi o, ke boŋ anyigba didi aɖe dzie wowɔe le. Europatɔ ƒudzimɔzɔla siwo nɔ nyiɖu, sika, kple kluviwo dim lae tsɔ avɔ siawo va Afrika. Ka siwo le amadede dzeani vovovo mee wotsɔ lɔ̃ dutavɔ siawoe. Eteƒe medidi o, dutavɔ siwo wolɔ̃ kple ka dzẽ, aŋutiɖiɖi, kple gbemu va zu adzɔnu vevi aɖe le asitsatsa me. Ame ʋɛ aɖewo ko sie ga le be woate ŋu aƒle avɔ xɔasi siawo tso Europatɔ asitsalawo gbɔ. Le kpɔɖeŋu me le Sikaƒuta la, Asanteawo ƒe kesinɔtɔ siwo kpɔa sika, nyiɖu, kple kluviwo koe tea ŋu ƒlea wo. Gake menye avɔae nye nu si dim wole o.

Ne avɔa nya ka avɔlɔ̃lawo si ko la, wotsɔa dzigbɔɖi tua ka dzeaniawo eye wogblẽa avɔa ƒe akpa susɔea ɖi. Emegbe wogbugbɔ lɔ̃a ka xɔasi siawo le fiavɔlɔ̃lawo ƒe agbatiwo dzi. Esi woƒe amadede vovovoawo nɔ agbɔ sɔm ɖe edzi la, nenema kee atsyã siwo asinudɔwɔlawo wɔna hã nɔ nyonyom ɖe edzi. Esia na be woƒe avɔlɔlɔ̃ gava nyo sãsãsã wu tsã.

Wotaa tɔmelã, xevi, atikutsetse, aŋgba, ɣeɖoto, anyieʋɔ, kple dzɔdzɔmenu siwo nya kpɔna la ɖe avɔawo me. Gɔmesese tɔxɛ aɖe nɔa wo dometɔ ɖe sia ɖe ŋu na wo. Avɔ siwo me wolɔ̃ ka si le abe sika ene ɖo la le tsitre ɖi na hokpɔkpɔ, gbemua hea susu yia nu yeye dzi, yibɔa le tsitre ɖi na blanuiléle, dzĩa fia dziku, eye klosaloa le tsitre ɖi na dzadzɛnyenye kple dzidzɔ.

Kete Si Li Egbea

Esi ɣeyiɣiawo va le yiyim la, fia sesẽwo ƒe ŋusẽ va nɔ to yim. Megava hiã be woade vovototo avɔ si fiawo zãna kple esi dumevi dzrowo zãna dome o. Avɔ dzeani sia ƒlelawo va dzi ɖe edzi esime wova te ezazã le wɔna dzrowo me. Esi wova lɔ̃a kete kabakaba be woakpɔ avɔ geɖe wu na amewo ta la, eƒe atsyɔ̃ɖoɖo, nyonyo kple asixɔxɔ dzi va ɖe kpɔtɔ.

Ketekpo aɖe Ketevɔ siwo li egbea

Egbea wolɔ̃a kete akpa gãtɔ kple ka siwo menye akuakuawo o. Wotsɔa ketevɔ tɔa akplowo, kɔmeblanu, alidziblanuwo, kukuwo kple nudodo bubuwo le agbɔsɔsɔ gã aɖe me. Avɔlɔ̃la ʋɛ aɖewo koe gawɔa ketelɔlɔ̃ ƒe mɔnu si wozãna le blema la ŋu dɔ. Wobua kete akuaku xoxoa kesinɔnui fifia eye wònye domenyinu na dzidzimeviwo le ƒomea me. Nyateƒee, kete nyuitɔ si wolɔ̃ le agbati dzi siwo wobuna fiawo ƒe avɔe tsã la megale nenema egbea o.

Eya ta ne èbe yeaƒle kete la, lé ŋku ɖe eŋu nyuie, nya du si me nàdɔe le, ɖewohĩ àdi be yeadɔe tso Bonwire, alo Agɔtime loo alo Agbozume. Elabe woxɔ ŋkɔ ŋutɔ le ketelɔlɔ̃ me. Gake kpɔ nyuie, ke ŋku, eye nàƒle kete adodoea, elabena bubumewo ƒe avɔe wònye tsã.

Bubumewo Ƒe Kete La! Read More »

error: Mɔɖeɖe meli o !!
Scroll to Top