Akpaviwo Kple Tɔmelãwo

Akpaviwo Kple Tɔmelãwo Ƒe Ŋkɔwo

Akpaviwo Kple Tɔmelãwo Ƒe Ŋkɔwo

Akpaviwo Kple Tɔmelãwo

Kpoku kple akpala, kae vivina na wò wu? Ɖe nàgblɔ be abɔbi boŋua? Ame aɖewo hã melɔ̃a nu le abɔbitadi gbɔ o. Mèkpɔe be akpaviwo, tɔmelãwo kple ƒumelãwo nye viɖenu kple nuɖuɖu na amegbetɔwo oa?

Akpaviwo, tɔmelãwo kple ƒumelãwo nye nukunu siwo yɔ tsiwo me fũu. Woƒe nɔƒewoe nye ziɔwo, amuwo, dzegbesiwo, tawo, tagbamuwo, tɔgbawo kple atsiaƒuwo me. Tɔmelãwo kple ƒumelãwo dometɔ aɖewo le sue, míayɔ abɔbi  kple nɔviawo, eye ɖewo hã lolo gã dranyii, woƒe fiawoe nye  boso kple nɔvia agblolui alo dzeŋeɖunui.

Ènya akpaviwo, tɔmelãwo kple ƒumelãwo ƒe agbɔsɔsɔ alo blaeve teti ŋkɔa? Míayɔ tɔmelã kple ƒumelã 242 aɖewo ƒe ŋkɔwo le nyati sia me.

Tɔmelãwo Sɔ Gbɔ Taŋtaŋ

Xexe bubu kurae le míaƒe anyigba ƒuƒui la te, ɛ̃e, xexe bubu kurae le tsiwo, tɔsisiwo, tawo kple atsiaƒu me. Akpaviwo kple tɔmelãwo, ƒumelãwo kple nuwɔwɔ bubuwo le tsiwo gɔme ʋĩi. Nyateƒee, du bliboe le tsiwo te.

Wobu akɔnta be tɔmelã ƒomevi vovovo 33,600 kple edzivɔwoe li. Woƒe amadedewo, nɔnɔmewo kple nuwɔnawo le vovovo. Ɖewo nye nukpɔkpɔ blibo, eye ɖewo hã ne èkpɔ wo la, àbia be nu ka tae Mawu wɔ esiawo hã ɖo mahã. Ne èbu eŋuti ʋuu la, ɖeko nàgblɔ ɖokuibɔbɔtɔe be: “Mawu koe nya.” Ɛ̃e, Mawu koe nya nu si tae wòwɔ akpaviwo kple tɔmelãwo sɔ gbɔ nenema gbegbe.

Míayɔ akpaviwo, tɔmelãwo kple ƒumelãwo dometɔ aɖewo ya be kpɔkpɔmatikɔ, elabe wonye nukpɔkpɔ blibo. Nu kae nàgblɔ tso adzɔvia kple zãkofi ŋuti? Ke tɔnɔtsi ya ɖe?

Tɔmelãwo Kple Ƒumelãwo Ƒe Viɖewo

Tso gbe aɖe gbe ke la, tɔmelãwo nye nuɖuɖu na amegbetɔwo. Dɔwɔƒe gãwo li eye woƒe dɔ koe nye be woade tɔƒo aɖe tɔmelãwo alo ƒumelãwo na amegbetɔwo. Ame miliɔn geɖe kpɔa ga tso tɔƒodede alo tɔdzidɔwɔwɔ me tsɔ kpɔa woƒe ƒomewo dzi.

Ɛ̃e, tɔmelãwo nye viɖe blibo na amegbetɔwo le goawo katã me. Nublanuitɔe la, Eʋeawo mezãa wo tsɔ doa lo alo zãa wo le woƒe lododowo me abe ale si wozãa godzilãwo kple xewo ene o. Nu ka tae? Ɖewohĩ esi womekpɔa wo heléa ŋku ɖe woƒe nuwɔnawo ŋuti ale o tae.

Na Míakpɔ Tɔmelãwo Ta

Nu geɖewo nye afɔku na tɔmelãwo. Afɔku siawo ƒe ɖewoe nye yame ƒe tɔtrɔ, lãɖeɖe le tɔsisiwo kple atsiaƒuwo me fũu akpa kple yame ƒe ɖiƒoƒo. Ɖewo hã nye aŋenuwo, aŋetukpa kple aŋekpete alo rɔbakpete siwo wokɔ ɖe atsiaƒuwo kple tɔsisiwo me.

Tɔmelã aɖewo kura megali míakpɔ aɖu o. Ɖe mewɔ nublanui ŋutɔ oa? Vavãe ewɔ nublanui ŋutɔ.

Mina míanya aƒa na akpaviwo, tɔmelãwo kple ƒumelãwo. Ɛ̃e, mina míaxɔ na wo. Mina míado abɔgɛ awɔ nane tso nɔnɔme sia ŋuti.

 Wogblɔna be ati si dzi wole la, womeɖea fia ɖe edzi nɔa lalãm o. Mina míaxlɔ̃ nu mía haviwo be womegatsɔ aŋenuwo kɔ ɖe tsiwo me o. Elabe totamexe be yemedoa to ƒe ku o, to nenɔ agbe yeafɔ axɔ̃ le eŋu.

Kpɔ nyati siawo hã: Aƒemelãwo Kple Gbemalãwo Nye Suku Blibo

             Atiwo Kple Woƒe Ŋkɔwo

             Xewo Kple Woƒe Ŋkɔwo

Akpaviwo Kple Tɔmelãwo Ƒe Ŋkɔwo Read More »

Agble aɖe le Eʋenyigba dzi

Ɣletiwo Le Eʋegbe Me

Ɣletiwo Le Eʋegbe Me

Baluwɛ le Togo

Dzove 

Esiae nye ɣleti alo dzinu gbãtɔ le ƒea me. Ɣleti sia ƒe ŋkɔ tso xexea me ƒe dzoxɔxɔ si nɔa anyi le ave siwo menye ave tsu alo ave tsitsiwo o la ƒoƒo ƒe gɔmedzedze me. Le dzoxɔxɔ sia ta woyɔa ave siawo be Dzove.

Ŋkeke 31 ye le ɣleti sia me. Le ɣleti sia me la, pepi alo baluɣee dona eye gbewo hã bia dzo. Le blema la, Romatɔwo xɔe se be Ianus nye mawu na agbowo, ʋɔtruwo, gɔmedzedzewo kple nuwuwuwo. Le esia ta, wotsɔ ŋkɔ na ɣleti gbãtɔ sia be Ianuarius si tso ianua si fia ʋɔtru le Latingbe la me. Woyɔnɛ le Eŋlisigbe me be January eye woyɔnɛ le Fransegbe me be Janvier.

Dzodze 

Esiae nye ɣleti alo dzinu evelia le ƒea me. Le ɣleti sia me la, wotɔa dzo ave siwo woƒo la, eye wodzraa anyigba dzi ɖo na nuku yeyewo ƒaƒã. Xexea me xɔa dzo ŋutɔ, esia tae woyɔa ɣleti sia be Dzodze.

Ŋkeke 28 ye le ɣleti sia me, gake le ƒe ene sia ƒe ene megbe la, ezua ŋkeke 29. Woyɔnɛ le Eŋlisigbe me be February eye woyɔnɛ le Fransegbe me be Février.

Tedoxe

Esiae nye ɣleti alo dzinu etɔ̃lia le ƒea me. Adatsi gbãtɔwo dzana le ɣleti sia me, eye woxea do siwo me woku te le va yi la, esia tae wotsɔ ŋkɔ na ɣleti sia be Tedoxe.

Ŋkeke 31 ye le ɣleti sia me. Le blema la, Romatɔwo yɔa ɣleti sia be Martius si nye woƒe aʋamawu Mars ƒe ŋkɔ. Woyɔnɛ le Eŋlisigbe me be March eye woyɔnɛ le Fransegbe me Mars.

Afɔfiɛ 

Esiae nye ɣleti alo dzinu enelia le ƒea me. Anyigba xɔa dzo gbãgbãgbã hefia afɔ na ame le ɣleti sia me, esia tae woyɔe be afɔfiɛ.

Ŋkeke 30 ye le ɣleti sia me. Ɣleti sia ƒe ŋkɔ anya tso nya eve aɖewo me. Gbãtɔe nye Latingbe me nya Aprilis si fia seƒoƒo ƒe ʋuʋu, elabena ɣleti sia mee atiwo ƒoa se hetsena le nuto mawo me.

Eveliae nye Aprilis si tso Helatɔwo ƒe lɔlɔ̃mawu Afrodite ƒe ŋkɔ me. Anglosasontɔwo tsɔ ŋkɔ na ɣleti sia be Oster-monat alo Eostur-monat si nye woƒe mawu Eostre alo Ostara ƒe ŋkɔ. Ŋkɔ sia me Easter alo Pâques tso. Woyɔnɛ le Eŋlisigbe me be April eye woyɔnɛ le Fransegbe me be Avril.

Damɛ 

Esiae nye ɣleti alo dzinu atɔ̃lia le ƒea me. Tsidzadza nana be atiwo kple gbewo dea ama nyuie le ɣletia me. Esia tae wona ŋkɔ ɣleti sia be Damɛ.

Ŋkeke 31 ye le ɣleti sia me. Le blema la, Helatɔwo tsɔ woƒe mawu Maia ƒe ŋkɔ na ɣleti sia. Romatɔwo bui be enye vidzidzi ƒe mawu. Woyɔnɛ le Eŋlisigbe me be May eye woyɔnɛ le Fransegbe me be Mai.

Masa 

Esiae nye ɣleti alo dzinu adelia le ƒea me. Le ɣleti sia me la, ati aɖe si woyɔna be Masɛ la ƒoa se eye wohea kpeƒoame, taɖuame kple vuvɔdzeamedzi vanɛ. Esia tae wona ŋkɔ ɣleti sia be Masa.

Ŋkeke 30 ye le ɣletia me. Le blema la, Romatɔwo tsɔ Yuno si nye woƒe mawu aɖe ƒe ŋkɔ na ɣleti sia. Woyɔnɛ le Eŋlisigbe me be June eye woyɔnɛ le Fransegbe me be Juin.

Siamlɔm

Esiae nye ɣleti alo dzinu adrelia le ƒea me. Le ɣleti sia me la, sẽ ko tsi kɔna ɖi, sẽ ko ŋdɔ ʋuna. Esia wɔnɛ be sẽ ko woɖe nunyanyawo le nusiaka dzi sẽ ko wogasia nuwo le ka dzi, wowɔa esia zi geɖe le ŋkekea me. Esia tae wona ŋkɔ ɣleti sia be Siamlɔm.

Ŋkeke 31 ye le ɣletia me. Le blema la, Romatɔwo tsɔ ŋkɔ na ɣleti sia be Yuli, elabe eya mee wodzi Romatɔwo ƒe Fiagã Yulio Kaisaro le. Woyɔnɛ le Eŋlisigbe me be July eye woyɔnɛ le Fransegbe me be Juillet.

Dasiamime

Esiae nye ɣleti alo dzinu enyilia le ƒea me. Te yeye dona le ɣleti sia me, eye esi wònye be ɖeviwo tsia dzi ɖe nuɖuɖu ŋuti ta la, ne wobe yewoaklɔ asi aɖu koliko la, wodea asi ami dzodzo me hebuna xaa be tsi mee. Esia tae wona ŋkɔ ɣleti sia be Dasiamime.

Ŋkeke 31 ye le ɣletia me. Le blema la, Romatɔwo tsɔ ŋkɔ na ɣleti sia be Augustus, elabe eya mee wodzi Romatɔwo ƒe Fiagã Augustus le. Woyɔnɛ le Eŋlisigbe me be August eye woyɔnɛ le Fransegbe me be Août.

Anyɔnyɔ

Esiae nye ɣleti alo dzinu asiekelia le ƒea me. Ɣleti sia nye kelegbledeɣi, eye tsi nɔa nyɔnyɔm. Esia tae wona ŋkɔ ɣletia be Anyɔnyɔ.

Ŋkeke 30 ye le ɣletia me. Le Latingbe me la, septi gɔme enye adre eye septem gɔme enye adrelia. Le Romatɔwo gbɔ la, ɣleti siae nye adrelia. Woyɔnɛ le Eŋlisigbe me be September eye woyɔnɛ le Fransegbe me be Septembre.

Kele

Esiae nye ɣleti alo dzinu
ewolia le ƒea me. Gbe aɖe si woyɔna be Kele bɔna le ɣleti sia me.

Ame aɖewo hã susu be ɣeaɖewoɣi tsi dzana le ame eve siwo do agbleliƒo la dometɔ ɖeka ƒe agble me eye medzana le ame evelia ya tɔ me o. Esia nana be ke alo keléle ɖoa agbletɔ eveawo dome. Esia tae wona ŋkɔ ɣleti sia be Kele.

Ŋkeke 31 ye le ɣletia me. Le blema la, ɣleti siae nye enyilia le Romatɔwo gbɔ. Woyɔnɛ le Eŋlisigbe me be October eye woyɔnɛ le Fransegbe me be Octobre.

Ademakpɔxe

Ademakpɔxe alo Adeɛmekpɔxe nye ɣleti alo dzinu wuiɖekɛlia le ƒea me. Le ɣleti sia me la, afu alo ahũ xɔa xexea me litii eye esia wɔnɛ be adelawo alo adeawo metea ŋu kpɔa xewo alo lãwo dzea si kaba o. Esia tae wona ŋkɔ ɣleti sia be Adeɛmekpɔxe.

Ŋkeke 30 ye le ɣletia me. Le blema la, ɣleti siae nye asiekelia le Romatɔwo gbɔ. Woyɔnɛ le Eŋlisigbe me be November eye woyɔnɛ le Fransegbe me be Novembre.

Dzome

Esiae nye ɣleti alo dzinu wuievelia le ƒea me. Le ɣleti sia me la, xexea me xɔa dzo vivivo, vevietɔ le ŋdɔ me. Esia tae wona ŋkɔ ɣleti sia be Dzome.

Ŋkeke 31 ye le ɣletia me. Le ɣleti sia me la, pepi dona. Le blema la, ɣleti siae nye ewolia le Romatɔwo gbɔ. Woyɔnɛ le Eŋlisigbe me be December eye woyɔnɛ le Fransegbe me be Décembre.

Ƒoave

Esiae nye ɣleti alo dzinu wuietɔ̃lia le ƒea me. Le ɣleti sia me la, pepi si do le dzome la nu sẽna ɖe edzi eye esia wɔnɛ be atiwo lũa xe, tɔsisiwo kple tɔʋuwo miena, ale wɔ tsiku ɖina.

Xexea me ƒe dzoxɔxɔ si nu sẽ wɔnɛ be ave dodowo kekeake gɔ̃ hã me kɔna abe ɖe woƒo wo ene. Esiae ta wona ŋkɔ ɣleti sia be Ƒoave. Gake ewɔ abe womegale exlẽm de ɣletiawo me o ene. Esia ta megadzena le agbalẽ geɖeawo me o.

Eʋeawo Ma Ƒea Alo Ɣleti Wuieveawo Ɖe Akpa Ene Me

Adame: (Tedoxe, Afɔfiɛ, Damɛ). Tsidzaɣi gã, agblemenukuwɔɣi.

Afome alo Fofome: (Masa, Siamlɔm, Dasiamime). Kuɖiɣi sue, agblemenukuŋeɣi.

Keleme: (Anyɔnyɔ, Kele, Ademakpɔxe). Tsidzaɣi sue, agblemenukuwɔɣi.

Pepime: (Dzome, Dzove, Dzodze). Kuɖiɣi gã, agblemenukuŋeɣi. o

Ɣletiwo Le Eʋegbe Me Read More »

Nyɔnu aɖe le tsi dem nu

Kɔsiɖa Ƒe Ŋkekewo

Kɔsiɖa Ƒe Ŋkekewo

Nyɔnu aɖe le tsi dem nu

LE Eʋeawo dome la, womaa kɔsiɖa alo kwasiɖa ɖe hatsotso vovovowo me. Le kpɔɖeŋu me, aɖaŋkekewo (Dzoɖa, Braɖa, Kuɖa), agbleŋkekewo (Agblamigbe, Aƒenɔegbe, Asitoegbe, Domegbe), eye asimedegbewo (Adzanusigbe, Tseviesigbe, Akatsisigbe, Hosigbe). Wodzea kɔsiɖa la gɔme le Eʋeawo gbɔ tso Dzoɖagbe.
Gake míaƒo nu tso aɖaŋkekewo ko ŋu le nyati sia me.

 Dzoɖa (Dzoɖagbe)

Enye ŋkeke si le Kɔsiɖagbe kple Braɖagbe dome.
Le Eʋe-dukɔwo me la, Dzoɖagbee nye ŋkeke gbãtɔ le kɔsiɖaa me. Eye le dukɔ siwo dzea kɔsiɖa gɔme tso Kɔsiɖagbe dzi me la, eyae nye kɔsiɖa ƒe ŋkeke evelia. Woyɔnɛ le Eŋlisigbe me be Monday si fia “Ɣleti Ƒe Ŋkeke.” Morsetɔ siwo nɔ anyi le blema bua ɣleti alo dzinu be enye mawu aɖe. Woyɔnɛ le Fransegbe me be Lundi, esia hã fia “Ɣleti ƒe Ŋkeke.”

Braɖa (Braɖagbe)

Enye ŋkeke si le Dzoɖagbe kple Kuɖagbe dome.
Le Eʋe-dukɔwo me la, Braɖagbee nye ŋkeke evelia le kɔsiɖaa me. Eye le dukɔ siwo dzea kɔsiɖa gɔme tso Kɔsiɖagbe dzi ya me la, eyae nye kɔsiɖa ƒe ŋkeke etɔ̃lia. Le Eŋlisigbe me la, woyɔnɛ be Tuesday, si tso Skandinavia-mawu si woyɔna be Tyr ƒe ŋkɔ me, eye wòfia “Tyr Ƒe Ŋkeke.” Franseawo yɔnɛ be Mardi, si tso anyigbaƒome (planet alo planète) Mars ƒe ŋkɔ me. Eya ta ŋkɔa fia “Mars Ƒe Ŋkeke.” 

Kuɖa (Kuɖagbe)

Enye ŋkeke si le Braɖagbe kple Yawoɖagbe dome.
Le Eʋe-dukɔwo me la, Kuɖagbee nye ŋkeke etɔ̃lia le kɔsiɖaa me. Eye le dukɔ siwo dzea kɔsiɖa gɔme tso Kɔsiɖagbe dzi ya me la, eyae nye kɔsiɖa ƒe ŋkeke enelia. Le Eŋlisigbe me la, woyɔnɛ be Wednesday, si tso Dzamawo ƒe mawu si woyɔna be Woden ƒe ŋkɔ me. Franseawo yɔnɛ be Mercredi, esia hã tso anyigbaƒome Merkuri ƒe ŋkɔ me, eye wòfia “Merkuri Ƒe Ŋkeke.” Merkuri ganye Romatɔwo ƒe mawu aɖe hã. 

Yawoɖa (Yawoɖagbe)

Enye ŋkeke si le Kuɖagbe kple Fiɖagbe dome.
Le Eʋe-dukɔwo me la, Yawoɖagbee nye ŋkeke enelia le kɔsiɖaa me. Eye le dukɔ siwo dzea kɔsiɖa gɔme tso Kɔsiɖagbe dzi ya me la, eyae nye kɔsiɖa ƒe ŋkeke atɔ̃lia. Le Eŋlisigbe me la, woyɔnɛ be Thursday, si tso Skandinaviatɔwo ƒe mawu si woyɔna be Thor ƒe ŋkɔ me. Egɔmee nye “Thor Ƒe Ŋkeke.” Franseawo yɔnɛ be Jeudi esia hã tso anyigbaƒome Yupiter ƒe ŋkɔ me, eye wòfia “Yupiter Ƒe Ŋkeke.” Yupiter ganye Romatɔwo ƒe mawu aɖe hã.

Fiɖa (Fiɖagbe)

Enye ŋkeke si le Yawoɖagbe kple Memleɖagbe dome.
Le Eʋe-dukɔwo me la, Fiɖagbee nye ŋkeke atɔ̃lia le kɔsiɖaa me. Eye le dukɔ siwo dzea kɔsiɖa gɔme tso Kɔsiɖagbe dzi ya me la, eyae nye kɔsiɖa ƒe ŋkeke adelia. Le Eŋlisigbe me la, woyɔnɛ be Friday, si tso Norsewo (Skandinavia ƒe to aɖe) ƒe mawu si woyɔna be Fregya alo Friga ƒe ŋkɔ me. Franseawo yɔnɛ be Vendredi, esia hã tso anyigbaƒome Venus ƒe ŋkɔ me, eye wòfia “Venus Ƒe Ŋkeke.” Venus ganye Romatɔwo ƒe mawu aɖe hã. 

Memleɖa (Memleɖagbe)

Enye ŋkeke si le Fiɖagbe kple Kɔsiɖagbe dome.
Le Eʋe-dukɔwo me la, Memleɖagbee nye ŋkeke adelia le kɔsiɖaa me. Eye le dukɔ siwo dzea kɔsiɖa gɔme tso Kɔsiɖagbe dzi ya me la, eyae nye kɔsiɖa ƒe ŋkeke adrelia. Le Eŋlisigbe me la, woyɔnɛ be Saturday, si tso Romatɔwo ƒe agbledede ƒe mawu si woyɔna be Saturn ƒe ŋkɔ me. Saturn ganye anyigbaƒome hã. Franseawo yɔnɛ be Samedi, esia hã tso anyigbaƒome Saturn ƒe ŋkɔ me, eye wòfia “Saturn Ƒe Ŋkeke.”

Kɔsiɖa (Kɔsiɖagbe) Alo Kwasiɖagbe

Enye ŋkeke si le Memleɖagbe kple Dzoɖagbe dome.
Le Eʋe-dukɔwo me la, Kɔsiɖagbee nye ŋkeke adrelia le kɔsiɖaa me. Eye le dukɔ siwo dzea kɔsiɖa gɔme tso Kɔsiɖagbe dzi ya me la, eyae nye kɔsiɖa ƒe ŋkeke gbãtɔ. Le Eŋlisigbe me la, woyɔnɛ be Sunday, si fia “Ɣe Ƒe Ŋkeke.” Ɣe ganye Romatɔwo ƒe mawu aɖe hã. Franseawo yɔnɛ be Dimanche, esia fia “Aƒetɔ La Ƒe Ŋkeke.”

Kɔsiɖa Ƒe Ŋkekewo Read More »

error: Mɔɖeɖe meli o !!
Scroll to Top