Ave Gãwo Me Yetso

Ave Gãwo Me Yetso

Nyɔnu nublanuitɔ aɖe.

Ave gãwo me yetso;

Yedo ɖe dzogbe hã tsi le ye ƒom.

Ame siwo nye dadavitɔwo,

Woyɔ wo ɖe xɔ me nya gbem na wo.

Ku, wò nya menyo o!

Miganɔ ewɔm o;

Minyae be Mawugãe dzim.

Mebe, maxlẽ fu ɖe ha me,

Yewo tɔwo, maxlẽ fu ɖe ha me.

Wolé gbetɔ blibo dzra ɖe tsitrenu,

Wo viwo heɖu!

Nyawo katã dzɔ ɖe ye dzi.

Atsuwo nanɛ, Tsɛwo nanɛ,

Wole kpɔkpɔm alea;

Vi kple nɔ woyi awɔba.

Ave Gãwo Me Yetso Read More »

Afrikatɔ si lé blanui

Menya Be Meble Xoxo

Menya Be Meble Xoxo

Afrikatɔ si lé blanui

Nye ŋutɔ menya be meble xoxo;

Menye ame ye lagado o.

Nye ŋutɔ menye be meble xoxo;

Menye ame ye lagado o.

Amewo ƒe nu vevie, gbɔya wòtsie;

Amewo ƒe nu dimakpɔe, gbɔya wòtsie;

Kle le dzo sim ƒe dzo gaƒo kle.

Ame malɔ̃ tsitse agbadze dzi wòdɔa

Medɔ agbadze dzi; megbe tsitse dɔ agbadze dzi

Mebe manɔ ati gã ɖome ne ʋedzi meƒom o.

Mele ati gã ɖome tsie ʋedzi gaƒom.

Mitsi na adela gã kemie be,

Ne ekpɔm megatsɔ tu ɖe ŋunye o;

Nyee le avea me le wowom.

Bobofo megatsɔ tu o;

Nyee le avea me le wowom.

Menya Be Meble Xoxo Read More »

Ameyibɔ ŋutsu aɖe le kɔsɔkɔsɔ me

Aʋa Sim Loo!

Aʋa Sim Loo!

Ameyibɔ ŋutsu aɖe le kɔsɔkɔsɔ me

Aʋa si ame mesia kpɔti o.

Kpɔti nenɔ anyi duawo nava nya.

Mezu kpɔti ƒomenyewo ku gblẽm ɖi.

Mebe mado dzaléle ne aʋa magasim o.

Medo dzaléle tsie aʋa sim loo!

Aʋa sim loo! Aʋa sim loo! Aʋa sim loo!

Nya aɖe medo tsie aʋa sim loo!

Aʋa sim loo! Aʋa sim loo! Aʋa sim loo!

Anye ne nye kple ahevinyewo míado dali.

Dzɔgbenyee te num, ne mewɔ lemɔ zã?

Dzɔgbenyee te num, aga maɖo ɖa?

Ame tɔwo gale bublum si ʋedzi loo!

Si ʋedzi loo! Si ʋedzi loo! Si ʋedzi loo!

Anyigba ɖe gbe tsie mianyɛ xoxo.

Aʋa Sim Loo! Read More »

Nyɔnu aɖewo le ɣe ɖum vevie

Akpalu Ƒe Agoha

Akpalu Ƒe Agoha

Nyɔnu aɖewo le ɣe ɖum vevie

Agoha nyui le ʋua me,

Madzi na Baɖugbeawo woase.

Agoha nede ne mítso!

Keke Alada ke, Akpalu gbɔna.

Ga menɔa amewo nu o;

Sɔwo nu ga nɔna.

Gbagameʋu, ʋua, ɖu teŋge, teŋge;

Agoha nyui le ʋua me,

Madzi na Baɖugbeawo woase.

Mebena, miɖo dzi ɖe Mawu ŋu!

Migayi ha dzi ge miaɖo boŋu o

Tsyɔ̃evi vi la, Mawue kplɔnɛ.

Agoha nyui le ʋua me,

Madzi ne Baɖugbeawo woase.

Agoha nede ne mítso!

Keke Alada ke Akpalu gbɔna.

Ga menɔa amewo nu o.

Sɔwo nu ga nɔna.

Gbagameʋu, ʋua ɖu teŋge, teŋge;

Sɔwo nu ga nɔna.

Gbagameʋu, ʋua ɖu teŋge, teŋge;

Madzi na Baɖugbeawo woase.

Akpalu Ƒe Agoha Read More »

Gbɔtsu sue aɖe le ahuhɔ̃e me kpɔm

Gbɔ̃tsu Sue La

Gbɔ̃tsu Sue La

Gbɔtsu sue aɖe le ahuhɔ̃e me kpɔm

Gbe ɖeka la, gbɔ̃tsu sue aɖe va aƒe ƒe ʋɔtru, si le ʋuʋu la nu, eye wòyi ɖe aƒea me. Eti kpo ge ɖe xɔ la me, eye wòkpɔ nu nyuiwo le afi ma fũu.

Gbɔ̃tsu sue la ƒe mo wɔ yaa le nu siawo ƒe nyonyo ta eye wòke ŋku le nu kpɔ gãa. Esi wòdi be yeakpɔ nu sia nu tsitotsito ta la, ede ablegɔ dzi. Ke esia mesɔ gbɔ nɛ o, eya ta wòde kplɔ̃ dzi le xɔa me. Wotsɔ ahuhɔ̃e gã aɖe ku gli ŋu le kplɔ̃ la gbɔ lɔƒo. Nu ka gbɔ̃tsu kpɔ? Ekpɔ eɖokui le ahuhɔ̃e la me hesusu be gbɔ̃tsu bubu aɖee di be yeatu dzo ye.

Dzi ku gbɔ̃tsu sue la le gbɔ̃tsu evelia sia kpɔkpɔ me, eye wòdo ɣli be, “Gbɔ̃tsu sue, va ne mítu dzo mía nɔewo!” Gbɔ̃tsu sue la kɔ eɖokui ɖe dzi, tsi tsitre ɖe eƒe megbefɔwo dzi, eye wòtu dzo gbɔ̃tsu si wòkpɔ le ahuhɔ̃e la me. Kasia ahuhɔ̃e gã la ge va dze gbɔ̃tsu sue la dzi eye wògbã tsayaa. Enumake aƒea tɔ ge ɖe xɔa me, ede ka gbɔ̃tsu sue la, eye fefe la nu tso.

Gbɔ̃tsu Sue La Read More »

Afiwo le takpekpe me

Dadi Kple Afiwo

Dadi Kple Afiwo

Afiwo le takpekpe me

Gbe ɖeka la, afiwo va ɖo xaxa me. Dadi be yealé wo aɖu. Eya ta afiwo ƒo ƒu, eye wode aɖaŋu. Tsitsitɔ gblɔ bena, “Aleke wɔ ge mí katã míele? Mí katã míele kuku ge le ŋkeke kpui aɖe megbe.”

Afi aɖe gblɔna: “Menya aɖaŋu nyui aɖe. Mina míatsɔ nyawowoe aɖatsi ɖe kɔ na adadi la, hafi ne evaɣi naɖo. To nyuiwo li na mí katã, eye hafi ne wòava kpɔ mí la, míasi ayi ɖe míaƒe dowo me. Gake ame kae atsɔ nyawowoe la atsi kɔ nɛ? Ele na wò bena nàwɔ esia!” Egblɔ bena, “Nyea, nyemate ŋu ado dzi awɔ esia o.” Eye afi mamlɛawo hã gblɔ bena, “Míawo hã míate ŋu awɔ esia o.”

Ale dadi la gatsi anyi womete ŋu de nyawowoe kɔ nɛ o.

Dadi Kple Afiwo Read More »

Logoti kple aɖa ƒe hakpanya kpui aɖe

Logoti Kple Aɖa

Logoti Kple Aɖa

Logoti kple aɖa ƒe hakpanya kpui aɖe

Logoti gblɔ na Aɖa gbe ɖeka be:

“Tɔwò dzɔ be nàbu dzɔdzɔme;

Ne atsutsrɔe sue aɖe dze ɖe dziwò la, agba bliboe.

Ya suetɔ kekeake si ƒo miɔɔ

Hena tsi ƒe ŋkume zrɔ̃ gɔ̃ hã,

Zia dziwò nèbia kɔ ɖe anyi,

Evɔ nye ya nye ŋgonu sesẽ kplala sia,

Xea mɔ na ɣe ƒe keklẽ,

Kura gɔ̃ hã dzi le eƒo wòkpea akɔ kple ahom.

Nu sia nu nye Dzieheya ʋuduʋudu na wò, evɔ nu sia nu nye Ɣetoɖoƒeya fafɛ na nye ya.

Ke hã ne ɖe wodzi wò le ati siwo dzi

Nye vɔvɔli tsyɔna ƒe bebeƒe la,

Anye ne màkpe fu nenema gbegbe o:

Makpɔ tawò tso ahom la si me;

Gake nublanuitɔe la, ya ʋuduʋuduwo

Ƒe liƒowo dzie wodzi wò ɖo.

Nye ya mekpɔe be dzɔdzɔme mewɔ nu ɖe ŋuwò nyuie kura o.

Aɖa la ɖo eŋu be: “Meda akpe ɖe wò veveseɖeamenu la

Ŋuti ale gbegbe; gake dzimaɖeɖi sia nenɔ akpa gbɔ.

Yaƒoƒoawo menyea ŋɔdzi na nye ya wu wò o.

Mebia kɔ ɖe anyi, gake nyemeŋena o.

Mekpɔe be va se ɖe fifia

Ènɔ te ɖe yaƒoƒowo mawo nu

Mebi kɔ ɖe anyi zi ɖeka pɛ hã kpɔ o;

Gake na míalala va ɖo nuwuwua.”

Esi wònɔ nya siawo gblɔm la,

Ya ʋuduʋudu aɖe ƒo dzikutɔe tso dziehe

Ya dzi ŋɔ sia nu sẽ ale gbegbe,

Esiae nye dzieheya vɔ̃ɖitɔ si ƒo le nuto ma me kpɔ.

Logoti la galé ɖi sesĩe hetɔ afɔ to sesĩe ; Aɖa gabi kɔ ɖe anyi.

Ya la gaƒo sesĩe kple ŋusẽ teƒe eve wu tsãtɔ.

Eye ahom la nu sẽ ale gbegbe be eho logoti,

Eho logoti si ƒe ɖɔme yi ɖatɔ keke dziƒo ke,

Eye eƒe kewo de keke kukuawo de ke la kple ke wòmu gbloo.

Ale aɖa gblɔ be: “‘Akpe na Mawu.’ Mía tɔ nyo wu. Míebia kɔ ɖe anyi gake míehona kple ke o.”

Nufiame: Dada doa ŋgɔ na gbegblẽ. Tsri dada, ameɖokuikpɔkpɔ kple ame nɔvi makpɔmakpɔ ɖe ɖeke me.

Logoti Kple Aɖa Read More »

Ŋutsuvi etɔ̃awo le dɔ wɔm

AGBLEDELA KPLE VIA ETƆ̃AWO

AGBLEDELA KPLE VIA ETƆ̃AWO

Ŋutsuvi etɔ̃awo le dɔ wɔm

Agbledela aɖe nɔ anyi kpɔ gbe aɖe gbe. Eƒe ŋkɔe nye Dzeademíasɔ. Ŋutsuvi etɔ̃ nɔ esi. Tsitsitɔ ŋkɔe nye Dɔnyo, eyometɔ ƒe ŋkɔe nye Alɔkame eye dɔmlɛa ƒe ŋkɔe nye Nuteƒe.

Dzeademíasɔ dea mɔlugble. Ewɔa nuku na ame geɖe be aƒetɔ Dzeademíasɔ wɔa dɔ kple moveviɖoɖo gake viawo katã nye kuviatɔwo. Womekpena ɖe wo tɔ ŋuti le agblea me o. Aƒetɔ sia mekpɔa dzidzɔ le agbe si ƒomevi nɔm viawo le la ŋuti o.

Gbe ɖeka la Aƒetɔ Dzeademíasɔ dze dɔ kpata. Esi ŋutsu sia kpɔ be yele kuku ge la, eyɔ via etɔ̃awo ƒo ƒui eye wògblɔ na wo be yele kuku ge. Egblɔ na wo be: “Menya nyuie be mele kuku ge. Ne eva eme alea la, miɖim abe bubume ene. Metsɔ nye kesinɔnu si le asinye la ɣla ɖe mɔlugble la me. Ne miehiãe la miŋlɔ mɔlugble la me ko miake ɖe eŋuti.”

Le gaƒoƒo ʋɛ aɖewo me la, aƒetɔ Dzeademíasɔ mia nu kpoo. Dzeademíasɔ ƒe kunya sia kpe dua ɖo. Viawo yi ɖado ga eye woɖi wo tɔa abe bubume ene.

Le tsyɔ̃ la wɔwɔ vɔ megbe la, viŋutsu etɔ̃ siawo wɔ takpekpe eye woɖoe be yewoayi aɖadi kesinɔnua le mɔlugble la me. Woŋlɔ agblea me ŋkeke etɔ̃ sɔŋ gake womeke ɖe kesinɔnu aɖeke ŋu o. Woku anyigba la kple kodziwo, sofiwo kpakple ʋeɖekodziwo gake womekpɔ kesinɔnu ɣaɣla si dim wole la o.

Le kɔsiɖa ɖeka ƒe nuwuwu la, woŋlɔ agble blibo la katã me gake womeke ɖe kesinɔnua ŋu o. Mawu ɖi tsi gã aɖe dza. Esi Dɔnyo nɔ alɔ̃ dɔm le zã me la, eku drɔ̃e eye wòse ame aɖe gblɔ nɛ be: “Yi nàƒã mɔlu ɖe nu si mieŋlɔ la me abe ale si tɔwò wɔnɛ ene.”

Dɔnyo gblɔ nu si wòse la na nɔviawo. Wolɔ̃ ɖe edzi eye woyi wu mɔlukuiwo ɖe agble bliboa me. Le ŋkeke aɖewo megbe la, mɔlu la mie. Agble bliboa yɔ kple mɔlu. Le ƒe etɔ̃ megbe la, Dɔnyo kple nɔviawo zu kesinɔtɔwo.

Gbe ɖeka Dɔnyo gblɔ be: “Kesinɔnu ɣaɣla vavã. Mía tɔ nya be ne mímewɔ dɔ le ɣeƒe ku megbe o la dɔ awu mí, eya tae wòɖo aɖaŋu sia na mí ɖo. Bubu kple gãnyenye le dɔ sesẽ wɔwɔ me eye alɔ mawɔdɔ meɖua nu o.”

AGBLEDELA KPLE VIA ETƆ̃AWO Read More »

Ha va fe li ge Klo

Klo Kple Ha

Klo Kple Ha

Ha va fe li ge Klo

Mise gli loo!

Gli dzo ʋaʋaʋa va dze ha dzi.

Edze edzi.

Edze klo kple klovi dzi.

Edze wo dzi.

Le blema la, Klo kple ha wonye xɔlɔ̃ veviwo ale gbegbe be tsi hã metoa wo dome o. Ha nye agbledela, ke Klo ya mewɔa dɔ aɖeke o. Xɔlɔ̃ eveawo nɔ anyi ʋuu dɔ gã aɖe va to. Esi Klo mewɔa dɔ aɖeke o ta la, nuɖuɖu aɖeke menɔ esi o, eya ta dɔ nɔ wo kple via wum vevie.

Gbe ɖeka la, Klo dɔ via ɖo ɖe Ha gbɔ be wòadzra nuɖuɖu aɖe ɖo ɖe ye, ne ŋu ke la, yeaxe fea nɛ. Ɖevi la yi eye Ha lɔ̃ dzra nuɖuɖu la nɛ agbana. Gake esi ŋu ke la, Klo metsɔ ga la yi na ha o. Ha kpɔ mɔ nɛ ʋuu ŋkeke etɔ̃ gake meva o. Ha do dziku vevie eye eya ŋutɔ zɔ yi Klo ƒe aƒe me be yealĩ fea. Esi Ha yina aƒea me la, Klo kple via wokpɔe eye Klo gblɔ na via be, “Mele bebe ge ɖe xɔa me gake nàgblɔ nɛ be tonye ku eya ta meyi kua teƒe”.

Esi Ha va la, ɖevia gblɔ fofoa ƒe nya la nɛ. Ha do dɔmedzoe vevie hegblɔ na ɖevia be, “Ne fofowòa gbɔ la, gblɔ nɛ be, nye Ha mebe ne medi be míaƒe xɔlɔ̃wɔwɔ me negblẽ o la, ke netsɔ ga la vɛ nam etsɔ ŋdi kanya kpoo”. Ha trɔ yi aƒe me. Ke esi Ha dzo la, Klo do go le xɔa me eye wo kple via wonɔ dzidzɔ kpɔm ʋuu ŋu ke, gake metsɔ ga la yi na Ha o.

Ha ŋutɔ gayi ɖe aƒea me gake Klo gabe ɖe xɔ me, hegblɔ na via be wòagblɔ na Ha be ye lɔ̃xo dze dɔ vevie eya ta yeyi, eye yemele gbɔgbɔ ge kaba o. Esi Ha va ɖo aƒea me la, ɖevia to fofoa ƒe aɖe dzi nɛ pɛpɛpɛ. Ha ƒe dzi gbã ale gbegbe be menya nu si wòawɔ o. Ke ɖeko wògblɔ na ɖevia be, ne ye ŋutɔ yegazɔ afɔ va ɖo eye yemekpɔe o la, ke wòanya be nane le dzɔdzɔ ge ɖe ye dzi. Ha mekpɔ dzo hafi Klo do le xɔa me ganɔ dzidzɔ kpɔm o.

Esi ŋu gake la, Ha kpɔ mɔ ʋuu Klo meva o. Ke ha ɖo ta me kplikpaa be yeayi aɖatu nu kple Klo. Gbe ma gbe la, Klo gblɔ na via be wòalé ye adze ŋee, ke ne ekpɔ Ha wògbɔna la, wòanɔ atadi tum le yeƒe dɔme. Esi Ha va ɖo aƒea me la, Klo ƒe vi la dze atadi la tutu le fofoa ƒe dɔme. Ha bia fofoa ta le egbɔ. Ɖevia  ɖo eŋu be ye fofoa do go gake yemenya afi si wòyi o. Dɔ me ve Ha ale gbegbe be ɖeko wòde asi ataditukpe la te kɔ ƒu gbe do ɖe kpɔ ta enumake, bɔbɔ nɔ anyi, nɔ gbɔgbɔm fũfũfũ, henɔ klo dzɔm be wòagbɔ ne yewoado go.

Eteƒe medidi o, klo nɔ zɔzɔm tso kpɔa godo gbɔna aƒea me henɔ ha dzim be:

Klokpatsɛ menye,

Azɔlinye bu ɖe lãwo dome.

Azɔlinye bu ɖe lãwo me,

Azɔlinye bu ɖe lãwo dome…

Klo mekpɔ va ɖo aƒea me hafi Ha zɔ ɖe edzi be yeaxɔ yefe ga la o. Klo yɔ via gblɔ nɛ be nekɔ yeƒe ataditukpea vɛ na ye. Ke ɖevi la ɖo eŋu be, “Papa, Ha kɔ wò kpea ƒu gbe”.

Klo bia ha be atse kae blee be wòkɔ yeƒe ataditukpea ƒu gbe mahã. Ha ɖo eŋu nɛ be ne exe yeƒe fea na ye la, yeayi aɖakɔ kpea vɛ nɛ. Klo gblɔ nɛ be kpe ma ƒe tume koe nye yeƒe gadzraɖoƒe,  eye yedzra ga gbogbo aɖe ɖo ɖe eme, tre enu, eya ta ne mekɔe vɛ na ye o la, yemate ŋu axe eƒe fe la nɛ o. Ha tɔtɔ keŋkeŋ eye gbɔgblɔ bu ɖee. Etso yi kpɔa godo be yeaɖadi kpe la vɛ na Klo. Edii ʋuu gake mekpɔe o. Kpe la ko dim wògale va se ɖe egbe.

Esia tae ha tsɔa nu nɔa anyigba glũm ɖo.

Klo Kple Ha Read More »

Anyidi kple bɔtri

Anyidi Kple Bɔtri

Anyidi Kple Bɔtri

Anyidi kple bɔtri

Mise gli loo!
Gli neva!
Gli dzo kakaka va dze anyidi si wogayɔna be aɖiɖi dzi.
Edze edzi.
Edze bɔtri si wogayɔna be bɔe dzi.
Edze edzi.

Aɖiɖi kple bɔtri wonye xɔlɔ̃ veviwo.
Bɔtri mewɔa dɔ aɖeke o eye medzraa nuɖuɖu aɖeke ɖo le dzomeŋɔli o. Gake anyidi ya wɔa dɔ sesẽ eye wòdzraa nuɖuɖu ɖi le dzomeŋɔli. Gbe ɖeka bɔtri va anyidi gbɔ gblɔ nɛ bena: “Na nuɖuɖu vi aɖem.”
Anyidi biae bena: “Nu ka nèwɔ le dzomeŋɔli bliboa?”
Bɔtri ɖo eŋu nɛ bena: “Hae medzi.”
Anyidi yi edzi gblɔ nɛ bena: “Hae nèdzi le dzomeŋɔli le esime nye ya mele dɔ wɔm! Esia ta ele na wò be nàɖu ɣe azɔ.”
Ale wɔ anyidi la mena nanekee o.
Aɖiɖi kple bɔtri ƒe ŋutinya sia le mía fiam be ele be míawɔ dɔ eye míaganye kuviatɔwo o.

Anyidi Kple Bɔtri Read More »

error: Mɔɖeɖe meli o !!
Scroll to Top