Gbɔtsu sue aɖe le ahuhɔ̃e me kpɔm

Gbɔ̃tsu Sue La

Gbɔ̃tsu Sue La

Gbɔtsu sue aɖe le ahuhɔ̃e me kpɔm

Gbe ɖeka la, gbɔ̃tsu sue aɖe va aƒe ƒe ʋɔtru, si le ʋuʋu la nu, eye wòyi ɖe aƒea me. Eti kpo ge ɖe xɔ la me, eye wòkpɔ nu nyuiwo le afi ma fũu.

Gbɔ̃tsu sue la ƒe mo wɔ yaa le nu siawo ƒe nyonyo ta eye wòke ŋku le nu kpɔ gãa. Esi wòdi be yeakpɔ nu sia nu tsitotsito ta la, ede ablegɔ dzi. Ke esia mesɔ gbɔ nɛ o, eya ta wòde kplɔ̃ dzi le xɔa me. Wotsɔ ahuhɔ̃e gã aɖe ku gli ŋu le kplɔ̃ la gbɔ lɔƒo. Nu ka gbɔ̃tsu kpɔ? Ekpɔ eɖokui le ahuhɔ̃e la me hesusu be gbɔ̃tsu bubu aɖee di be yeatu dzo ye.

Dzi ku gbɔ̃tsu sue la le gbɔ̃tsu evelia sia kpɔkpɔ me, eye wòdo ɣli be, “Gbɔ̃tsu sue, va ne mítu dzo mía nɔewo!” Gbɔ̃tsu sue la kɔ eɖokui ɖe dzi, tsi tsitre ɖe eƒe megbefɔwo dzi, eye wòtu dzo gbɔ̃tsu si wòkpɔ le ahuhɔ̃e la me. Kasia ahuhɔ̃e gã la ge va dze gbɔ̃tsu sue la dzi eye wògbã tsayaa. Enumake aƒea tɔ ge ɖe xɔa me, ede ka gbɔ̃tsu sue la, eye fefe la nu tso.

Gbɔ̃tsu Sue La Read More »

Afiwo le takpekpe me

Dadi Kple Afiwo

Dadi Kple Afiwo

Afiwo le takpekpe me

Gbe ɖeka la, afiwo va ɖo xaxa me. Dadi be yealé wo aɖu. Eya ta afiwo ƒo ƒu, eye wode aɖaŋu. Tsitsitɔ gblɔ bena, “Aleke wɔ ge mí katã míele? Mí katã míele kuku ge le ŋkeke kpui aɖe megbe.”

Afi aɖe gblɔna: “Menya aɖaŋu nyui aɖe. Mina míatsɔ nyawowoe aɖatsi ɖe kɔ na adadi la, hafi ne evaɣi naɖo. To nyuiwo li na mí katã, eye hafi ne wòava kpɔ mí la, míasi ayi ɖe míaƒe dowo me. Gake ame kae atsɔ nyawowoe la atsi kɔ nɛ? Ele na wò bena nàwɔ esia!” Egblɔ bena, “Nyea, nyemate ŋu ado dzi awɔ esia o.” Eye afi mamlɛawo hã gblɔ bena, “Míawo hã míate ŋu awɔ esia o.”

Ale dadi la gatsi anyi womete ŋu de nyawowoe kɔ nɛ o.

Dadi Kple Afiwo Read More »

Papa aɖe le gli tom na eƒe ƒomea

GLITOTO LE EƲE ME

GLITOTO LE EƲE ME

Papa aɖe le gli tom na eƒe ƒomea

Dzinu le ɖiɖim nyuie le kɔƒea me fiẽ sia. Tɔgbui Kɔmedza kple ɖeviwo le xexe le dzidzɔ kpɔm ŋutɔŋutɔ. Nu kae na be ɖeviawo ƒo xlã Tɔgbui Kɔmedza le dzidzɔ kpɔm alea? Ènya nu si wɔm wolea? Wole gli tom.

Le nyati sia me la, míakpɔ nu si nye gli, glitoto kple ale si woƒoa glitoto tae. Nu siwo míagblɔ tso glitoto ŋuti le nyati sia me la ƒe akpa aɖewo ate ŋu ato vovo le Eʋe-nyigba ƒe nuto vovovoawo me. Eya ta mègaxɔe vevie nenye be ale si wogblɔe le nyati sia me mesɔ kple mia gbɔ tɔwo tututu o. Àte ŋu aŋlɔ ale si wogblɔnɛ le mia gbɔ la ɖo ɖe mí faa. Le nyati siwo ava ɖe esia yome me la, míagava dzro se siwo kplɔa glitoto kple ale si míawɔ be glitoto naɖe vi na míawo ŋutɔ kple mía viwo la me.

NU KAE NYE GLI?

Gli nye ŋutinya aɖe si wokpa aɖaŋutɔe hetsɔ nya de nu na xexemenuwo alo kpaa nuwɔna aɖe dea wo ŋuti be woatsɔ afia nu vevi aɖe amegbetɔ tso agbenɔnɔ ŋuti.

Le kpɔɖeŋu me, wogblɔna be Yevi Golotoe alo Yiyi kple srɔ̃a Funɔ wode agbeligble evɔ míenya nyuie be lãwo medea agble o.

NU KAE NYE GLITOTO?

Glitoto nye mɔ si nu wogblɔa ŋutinya kpakpa siwo woyɔna be gli la le. Wogayɔa glitoto be glitete. Efia be woate ŋu agblɔ hã be te gli.

ALE SI GLITOTO YINAE

Glitola alo glitela naa kaklã gliselawo gbã be woanɔ to dzi hena gli la sese. Egblɔna be: “Mise gli loo!” alo “Gli kpem!” Ke nenye be gliselawo le to dzi la, woawo hã gblɔna be: “Gli neva!”, “Neva míase!” alo “Gli zem!”

Glitola yia edzi yɔa nuwɔla vevi siwo le gli si to ge wòala me la ɖekaɖeka. Le kpɔɖeŋu me, “Gli zɔ glãmaglãma yi ɖadze Yiyi dzi!”, “Wòyi ɖadze srɔ̃a Funɔ dzi!”, “Wòyi ɖadze Tsikakɛ dzi!”, “Wòyi ɖadze gbemelãwo katã dzi!” Nenye be glitola le glimenuwɔlawo yɔm ɖekaɖeka be gli dze wo dzi la, gliselawo ƒona dea edzi nɛ be, “Edze edzi!”, “Wòdze edzi zem!”, “Wòdze edzi gli!”, “Wòdze wo dzi gblayi!”

Le nuwɔla veviawo yɔyɔ vɔ megbe la, glitola gblɔa ŋutinya kpakpa la kple aɖaŋu, kpakple atsiã ɖe sia ɖe si ko awɔe be eƒe nya la navivi eselawo nu.

ATSIÃ SIWO YIA EDZI LE GLITOTO ME

Ɣeaɖewoɣi la, glisela aɖe ate ŋu ade gli la me, to ha aɖe dodo ɖa kple edzidzi me. Hafi wòado haa ɖa la, egblɔna be, “Gbe ma gbe mele eteƒe.” Esia wɔnɛ be amewo dina be yewoaxɔe se be nya siwo gblɔm glitola le la anya dzɔ vavã. Glitola xɔnɛ nɛ be, “Neva míase.” Ne ha la nye ha nyanyɛ la, teƒea nɔlawo katã xenɛ hedzina hoo. Ame aɖewo kura dea kpo eme alo ɖua ɣe ɖe ha la dzi.

Ne haa wu enu la, glimedelaa gblɔna na glitola be, “Kpɔ aɖe!” Esia naa mɔnukpɔkpɔ glitola be wòayi gli la toto dzi. Gake hafi wòayi edzi la, eyɔa glimenuwɔla aɖe ɖe glimedela la ŋu be eyae nye nuwɔla ma le gliwo de gbe ma gbe. Nuwɔla si woyɔna ɖe glimedelaa ŋu la nyea glimenuwɔla siwo dzi glitola tɔ asii le glia ƒe gɔmedzeƒe la dometɔ ɖeka kokoko. Kpɔɖeŋu, “Gbe ma gbe la, wòe nye Yevi Golotoe la.” Wɔna siawo katã wɔnɛ be teƒea nɔlawo katã kloe ŋlɔna be be menye kodzogbe siae nuawo le dzɔdzɔm le o. Nenye be gli la didi la, wotea ŋu dea eme wòwua zi ɖeka.

Glitola gayia eƒe dɔ dzi le adzoa dede eme alo ha la dzidzi vɔ megbe.

GLITOTO LA TA ƑOƑO

Zi geɖe la, glitola ƒoa glia ta to xexemenu aɖe ƒe nɔnɔme alo nuwɔna aɖe me ɖeɖe me. Le kpɔɖeŋu me, “Nu sia tae akagã meto ɖa o ɖo,” alo “Nu ma tae ha nɔa nu glũm ɖe ke me ɖo.” Esia wɔnɛ be gliselawo yia ŋugble me ʋĩi, hedina be yewoaxɔe se be glimenuwɔna aɖe mee xexemenu aɖe ƒe nɔnɔme alo nuwɔna dzɔ tso.

Ɣeaɖewoɣi la, glitola trɔna ɖea eme be ŋutinya si katã yegblɔ la nye nya kpakpa ko, ale be magatsɔ eɖokui ado aʋatsokalae le gliselawo ŋkume o. Egblɔna be, “Esiae nyagã aɖe tsɔ blem eye nye hã metsɔ ble mie.” Afi mae gliselawo hã nyɔna le be menye nyateƒe ŋutɔ tom glitola le kã o. Gliselawo nyɔna tso léameɖebome si lé wo le glia katã toɣi la me azɔ.

Le esia megbe la, gliselawo kafua glitola ƒe numewɔwɔ alo nyaɖaŋuwɔwɔ hegblɔna nɛ be, “Adzonume wò.” alo “Dzenume wò.” Esia gɔme koe nye be eya ƒe nu mee adzo alo fefe vivi le wòwɔ na yewo loo, alo eya ƒe nu mee dze vivi le wòɖo na yewo. Ke eya hã kaa hatsɛ le wo ŋu le ale si wogbɔ dzi ɖi se eƒe nyaawo la ta, hegblɔna na wo be, “Adzoseto globogloboe mi,” alo “Dzeseto globoe wò.” Le teƒe aɖewo la, glitola gahea ame bubu dea toa me be eya hã nava to gli. Egblɔna be, “Ame si be atia medzɔ o la neva dzɔe!”

Wotu nyati sia ɖe Aƒetɔ S. K. Amegashie ƒe agbalẽ si nye Gligbalẽ la dzi.

GLITOTO LE EƲE ME Read More »

Ha va fe li ge Klo

Klo Kple Ha

Klo Kple Ha

Ha va fe li ge Klo

Mise gli loo!

Gli dzo ʋaʋaʋa va dze ha dzi.

Edze edzi.

Edze klo kple klovi dzi.

Edze wo dzi.

Le blema la, Klo kple ha wonye xɔlɔ̃ veviwo ale gbegbe be tsi hã metoa wo dome o. Ha nye agbledela, ke Klo ya mewɔa dɔ aɖeke o. Xɔlɔ̃ eveawo nɔ anyi ʋuu dɔ gã aɖe va to. Esi Klo mewɔa dɔ aɖeke o ta la, nuɖuɖu aɖeke menɔ esi o, eya ta dɔ nɔ wo kple via wum vevie.

Gbe ɖeka la, Klo dɔ via ɖo ɖe Ha gbɔ be wòadzra nuɖuɖu aɖe ɖo ɖe ye, ne ŋu ke la, yeaxe fea nɛ. Ɖevi la yi eye Ha lɔ̃ dzra nuɖuɖu la nɛ agbana. Gake esi ŋu ke la, Klo metsɔ ga la yi na ha o. Ha kpɔ mɔ nɛ ʋuu ŋkeke etɔ̃ gake meva o. Ha do dziku vevie eye eya ŋutɔ zɔ yi Klo ƒe aƒe me be yealĩ fea. Esi Ha yina aƒea me la, Klo kple via wokpɔe eye Klo gblɔ na via be, “Mele bebe ge ɖe xɔa me gake nàgblɔ nɛ be tonye ku eya ta meyi kua teƒe”.

Esi Ha va la, ɖevia gblɔ fofoa ƒe nya la nɛ. Ha do dɔmedzoe vevie hegblɔ na ɖevia be, “Ne fofowòa gbɔ la, gblɔ nɛ be, nye Ha mebe ne medi be míaƒe xɔlɔ̃wɔwɔ me negblẽ o la, ke netsɔ ga la vɛ nam etsɔ ŋdi kanya kpoo”. Ha trɔ yi aƒe me. Ke esi Ha dzo la, Klo do go le xɔa me eye wo kple via wonɔ dzidzɔ kpɔm ʋuu ŋu ke, gake metsɔ ga la yi na Ha o.

Ha ŋutɔ gayi ɖe aƒea me gake Klo gabe ɖe xɔ me, hegblɔ na via be wòagblɔ na Ha be ye lɔ̃xo dze dɔ vevie eya ta yeyi, eye yemele gbɔgbɔ ge kaba o. Esi Ha va ɖo aƒea me la, ɖevia to fofoa ƒe aɖe dzi nɛ pɛpɛpɛ. Ha ƒe dzi gbã ale gbegbe be menya nu si wòawɔ o. Ke ɖeko wògblɔ na ɖevia be, ne ye ŋutɔ yegazɔ afɔ va ɖo eye yemekpɔe o la, ke wòanya be nane le dzɔdzɔ ge ɖe ye dzi. Ha mekpɔ dzo hafi Klo do le xɔa me ganɔ dzidzɔ kpɔm o.

Esi ŋu gake la, Ha kpɔ mɔ ʋuu Klo meva o. Ke ha ɖo ta me kplikpaa be yeayi aɖatu nu kple Klo. Gbe ma gbe la, Klo gblɔ na via be wòalé ye adze ŋee, ke ne ekpɔ Ha wògbɔna la, wòanɔ atadi tum le yeƒe dɔme. Esi Ha va ɖo aƒea me la, Klo ƒe vi la dze atadi la tutu le fofoa ƒe dɔme. Ha bia fofoa ta le egbɔ. Ɖevia  ɖo eŋu be ye fofoa do go gake yemenya afi si wòyi o. Dɔ me ve Ha ale gbegbe be ɖeko wòde asi ataditukpe la te kɔ ƒu gbe do ɖe kpɔ ta enumake, bɔbɔ nɔ anyi, nɔ gbɔgbɔm fũfũfũ, henɔ klo dzɔm be wòagbɔ ne yewoado go.

Eteƒe medidi o, klo nɔ zɔzɔm tso kpɔa godo gbɔna aƒea me henɔ ha dzim be:

Klokpatsɛ menye,

Azɔlinye bu ɖe lãwo dome.

Azɔlinye bu ɖe lãwo me,

Azɔlinye bu ɖe lãwo dome…

Klo mekpɔ va ɖo aƒea me hafi Ha zɔ ɖe edzi be yeaxɔ yefe ga la o. Klo yɔ via gblɔ nɛ be nekɔ yeƒe ataditukpea vɛ na ye. Ke ɖevi la ɖo eŋu be, “Papa, Ha kɔ wò kpea ƒu gbe”.

Klo bia ha be atse kae blee be wòkɔ yeƒe ataditukpea ƒu gbe mahã. Ha ɖo eŋu nɛ be ne exe yeƒe fea na ye la, yeayi aɖakɔ kpea vɛ nɛ. Klo gblɔ nɛ be kpe ma ƒe tume koe nye yeƒe gadzraɖoƒe,  eye yedzra ga gbogbo aɖe ɖo ɖe eme, tre enu, eya ta ne mekɔe vɛ na ye o la, yemate ŋu axe eƒe fe la nɛ o. Ha tɔtɔ keŋkeŋ eye gbɔgblɔ bu ɖee. Etso yi kpɔa godo be yeaɖadi kpe la vɛ na Klo. Edii ʋuu gake mekpɔe o. Kpe la ko dim wògale va se ɖe egbe.

Esia tae ha tsɔa nu nɔa anyigba glũm ɖo.

Klo Kple Ha Read More »

Anyidi kple bɔtri

Anyidi Kple Bɔtri

Anyidi Kple Bɔtri

Anyidi kple bɔtri

Mise gli loo!
Gli neva!
Gli dzo kakaka va dze anyidi si wogayɔna be aɖiɖi dzi.
Edze edzi.
Edze bɔtri si wogayɔna be bɔe dzi.
Edze edzi.

Aɖiɖi kple bɔtri wonye xɔlɔ̃ veviwo.
Bɔtri mewɔa dɔ aɖeke o eye medzraa nuɖuɖu aɖeke ɖo le dzomeŋɔli o. Gake anyidi ya wɔa dɔ sesẽ eye wòdzraa nuɖuɖu ɖi le dzomeŋɔli. Gbe ɖeka bɔtri va anyidi gbɔ gblɔ nɛ bena: “Na nuɖuɖu vi aɖem.”
Anyidi biae bena: “Nu ka nèwɔ le dzomeŋɔli bliboa?”
Bɔtri ɖo eŋu nɛ bena: “Hae medzi.”
Anyidi yi edzi gblɔ nɛ bena: “Hae nèdzi le dzomeŋɔli le esime nye ya mele dɔ wɔm! Esia ta ele na wò be nàɖu ɣe azɔ.”
Ale wɔ anyidi la mena nanekee o.
Aɖiɖi kple bɔtri ƒe ŋutinya sia le mía fiam be ele be míawɔ dɔ eye míaganye kuviatɔwo o.

Anyidi Kple Bɔtri Read More »

Amegãxi nye lã wɔadã aɖe si lɔ̃a alẽviwo ɖuɖu.

Amegãxi Kple Alẽvi

Amegãxi Kple Alẽvi

Amegãxi nye lã wɔadã aɖe si lɔ̃a alẽviwo ɖuɖu.

Ŋusẽtɔ la ƒe nya koe dzɔna ɣesiaɣi:

Míaɖo kpe edzi fifi laa.

Alẽvi aɖe le tsi nom

Le tɔsisi zɔzrɔ̃e aɖe me;

Amegãxi dɔwuitɔ aɖe si le nuɖuɖu dim la va do,

Dɔ si to le nuto mawo mee ɖee ɖe enu.

Amegãxi gblɔ kple dziku be,

“Ame ka ƒe dzie tri nenema gbegbe be wòva le nye tsi nono blum?

Ele be woahe to na wò godoo ɖe wò amemabumabu sia ta.”

Alẽvia ɖo eŋu be: “Nye Aƒetɔ Bubutɔ.

Megado dziku o;

Ke boŋ nekpɔe be,

Afi si mele tsia nom le la le anyime

Eye wòdidi tso egbɔ afɔ blaeve sɔŋ;

Le esia ta mate ŋu adzɔ gbeɖe be,

Mablu eƒe tsi nono la o.

Amegãxia xɔ nya le enu be: “Èblui.

Eye menya be ègblɔ busunya ɖe ŋunye ƒe si va yi me.”

Alẽvia gblɔ be: “Aleke mate ŋu awɔ nu sia esi womekpɔ dzim haɖe ɣemaɣi o?

Megakpɔtɔ nɔ nɔnye ƒe no nom ɣemaɣi.”

Amegãxia ɖo eŋu be: “Ne menye wòe o la, ekema nɔviwò aɖee.”

Alẽvia ɖo eŋu be: “Nɔvi aɖeke mele asinye o.”

Amegãxia gblɔ be: “Ke wò ƒometɔ aɖee.

Elabena miawo ŋutɔwo, miaƒe alẽkplɔlawo kple miaƒe avuwo

Miekpɔa nublanui nam gbeɖe o.

Wogblɔ nam be: ‘Ele be mabia hlɔ̃ mi.’”

Ale amegãxi dze alẽvi la dzi eye wòlée yi avea titina,

Eɖui le afi ma

Megaɖe mɔ nɛ be wòagagblɔ nya aɖeke atsɔ aʋli eɖokui ta o.

Amegãxi Kple Alẽvi Read More »

error: Mɔɖeɖe meli o !!
Scroll to Top