Wotɔ dzo gbe wòle bibim vevie

EƲE LODODOWOAKPA 20

EƲE LODODOWO AKPA 20

Wotɔ dzo gbe wòle bibim vevie
Wometɔa dzo gbe tso gafana na agama o

951. Womedoa dzo yeye dea abɔbɔ eme o.
952. Womedzea xɔlɔ̃ kpɔ̃ tso gafaa lãkonyi o.
953. Womeɖea akɔ eve na lã ɖeka o.
954. Womeɖoa sisi gadɔa alɔ̃ o.
955. Womeɖoa vo tsɔ ɣlana ɖe tsileze o.
956. Womefiaa texɔ xoxo teƒe vi o.
957. Womekpɔa egbe ƒe nyonyo le etsɔ ŋu o.
958. Womekpɔa tsiɖoɖo kpaa zemetsi ƒua gbe o.
959. Womekpɔa tsiɖoɖo trɔa zɔmetɔ ƒua gbe o.
960. Womekpɔa tsiɖoɖo tsɔa xɔmetɔ ƒua gbe o.
961. Womelĩa afi ŋu le kɔ gbɔ o, ne tɔgbuia mele eme o hã, viawo le eme.
962. Womelĩa afi ŋu le kɔ gbɔ o.
963. Womenɔa tɔ me nɔa lo ƒe nu dzum o.
964. Womenyaa agaŋuxe léna o.
965. Womenyaa ame ƒe avɔ ƒoɖiwo le dutoƒo o.
966. Womesena be hãa ko wonɔa du dzi o.
967. Womesena be hawo yina, woyina o.
968. Wometɔa asi ame bubu ƒe akɔta o.
969. Wometɔa dzo gbe tso gafana na agama o.
970. Wometsɔa anyidzeƒe wɔa anyimlɔƒe o.
971. Wometsɔa miasi fia ame de o.
972. Wometsɔa ŋukpe mia delã le ame lɔ̃xo gbɔ o.
973. Wometsɔa ŋukpe noa gbe le aha me o.
974. Wometsɔa tetakpui daa gbɔ̃ o.
975. Wometsoa agble gbɔna va doa ha ɖa o.
976. Womexana ɖe ku ta gbea alɔ̃dɔdɔ o.
977. Womeyɔa dzikudzikuinɔ be konɔ o.
978. Womeyia ŋudɔƒe tso ganɔa vemehɛ dzim o.
979. Xakui ɖeka meƒoa adzɔ̃e o.
980. Xɔdrɔ̃ meɖua dzodzoʋu o.
981. Xɔmefie tsɔa ame na gbefi.
982. Xɔŋunui megbãa gli o.
[Xɔŋunui alo xɔmenyatri si wogayɔna be xɔŋini.]
983. Xe bidzi medzona kple atɔ o.
984. Xe ƒonu meƒoa tɔmelo o.
985. Xe ƒonu mesea “Tsɔ da ɖi” o.
986. Xe matsimatsi mexlɔ̃na zã o.
987. Xe wɔadã meƒoa vi le vi tɔ ŋgɔ o.
988. Xegbee xe dona.
989. Xexeme agamagbalẽe, ɖe wòtrɔna.
990. Xexeme la agamagbalẽe.
991. Xexeme le megbe le ŋgɔ.
992. Xli gidii mewua ablɔmeti o.
993. Xoxoawo nu wogbea yeyeawo ɖo.
994. Ya manyomanyo gbɔgbɔ ɖe wòƒoa ka ame ƒe lãme.
995. Ya si le kpewo tem la menye kevi gbɔ nu o.
996. Yatsie fiaa xɔ nu ame.
[Le blema hafi woatu xɔ la ɖe wokpɔna be afi kae yatsi tsona mahã, eya nue woɖea xɔ mɔnu le ale be yatsi nagage ɖe xɔ me na ame o.]
997. Yatsie fiaa xɔnuɖeƒe ame.
[Le blema hafi woatu xɔ la ɖe wokpɔna be afi kae yatsi tsona mahã, eyae nue woɖea xɔ mɔnu le ale be yatsi nagage ɖe xɔ me na ame o.]
998. Yɔyɔ gblẽa nu.
999. Yeaku, yeaku mesena tsia agbe o.
1000. Yealee, yealee, ɖe wòtsia ɖi ame.
1001. Yeewu le megbe na wò.
1002. Yiɖa mabu woabia akagã o.
[Yiɖa kee wogayɔna be aya si wotsɔ vua ɖa.]
1003. Yikpo xoxo be yewɔ dɔ wotsɔ ƒle dzadzakɔsuwoe.
1004. Yiyi be seŋɔeseŋɔe nyea ŋɔ.
1005. Yiyi be yegblɔ nya yemeyɔ ame ŋkɔ o, eya ta yemexɔa ha o.
1006. Yoo medidia nya o.
1007. Yowuyowu dee womona Ata.
1008. Zã dona hã ʋu muna.
1009. Zãtsi meƒoa ame zi eve o.
1010. Zɔmelo be yenya bublu gake zɔgbɔviawo tae.
1011. Zɔmelo be yenya bublu gake zɔgbɔviwo ta yezi diŋ.
[Yezi diŋ gɔmee nye yezi ɖoɖoe.]
1012. Ze vɔ̃ be yeɖa nu te tsi.
1013. Zego yibɔ me ye akatsa ɣi la do go tso.
1014. Zeye mekpɔa zekla kona o.
[Zeye fia ze yeye, eye zekla hã fia ze gbagbã.]
1015. Zi gã menye fia o.
1016. Zikpui be yemegblɔna be ye dzi nɔla nye ŋɔ wòkea ɖi le eŋu o.
1017. Zikpui megblɔna be wonye ŋɔ wokea ɖi o.
1018. Zu mekpea zutɔ o.

EƲE LODODOWOAKPA 20 Read More »

Golo aɖe le eƒe aziwo ŋu dzɔm

EƲE LODODOWOAKPA 19

EƲE LODODOWO AKPA 19

Golo aɖe le eƒe aziwo ŋu dzɔm
Vi dzronu medzroa golo ƒe azi o

901. Tsoɖoe medea ablɛ ƒe se o.
902. Tsoɖoe medea atadi ƒe se o.
903. Tsomo kple limoa katã ɖekae.
904. Tsukunɔ metsɔa ame ƒe godui wonyanɛ amama o.
905. Tsyɔ̃evi medɔa alɔ̃ ɖe globiƒe o.
906. Tsyɔ̃evi meɖia ŋdiƒo dzɔa dzi o.
907. Tu maɖinu nyo wu kpo.
[Elabena tu ƒe vɔvɔ̃ le eŋu kokoko.]
908. Tuasimea mefiaa dzeƒe ame o.
909. Tugbedzedze la telɔe, asie nɔa eŋu.
910. Tugbedzedze la telɔe, asie nɔa eŋu wònyona.
911. Tukpee fiaa aʋadzedze.
912. Vakpɔɖa mewua agbletɔ o.
913. Vɔ̃wɔla ƒe ŋkume metoa gbe o.
914. Ve ƒe ŋukpea lo ƒe ŋukpee.
915. Veŋukpea loŋukpee.
916. Vevee aklã ŋu wònɔna.
[Aklã ye Tɔŋutɔwo yɔna be tù.]
917. Vevee, tua ŋu wònɔna.
[Aklã ye Tɔŋutɔwo yɔna be tù.]
918. Vi dzronu medzroa golo ƒe azi o.
919. Vi ɖitɔa mewɔa tɔ nugbe o.
920. Vi kple nɔ metsɔa gbe ɖeka o.
921. Vi masenu aŋɔkae kua to nɛ.
922. Vi matsadukpɔe gblɔna be ye dada koe ƒoa detsi vivi.
923. Vi mekɔa tɔa ɖe dzi be nekpɔ nyi ɖa o.
924. Vi menyea mi ɖe ata dzi na ame wotsɔa hɛ kpanɛ o.
925. Vi menyea mi ɖe tɔa ƒe ata dzi wòtsɔa hɛ kpanɛ o.
926. Vi metsɔa miasi fiaa eƒe dedu o.
927. Vi si ke be ye nɔ madɔ alɔ̃ o la, eya hã medɔnɛ o.
928. Vi si nya asikɔklɔ lae ɖua nu kple ame tsitsiwo.
929. Vi tatɛ mekea ɖi kple bafa o.
930. Vi tsɔdɔe ɖua amesimenu.
931. Vi vɔ̃ nyo wu ko.
932. Vi vɔ̃ nyo wu kotsitsi.
933. Vinɔ ƒovi meƒoa vi ƒe dɔme o.
934. Vinɔkɔ menya ekpavɔ o.
935. Vivi mevɔna le agɔku ŋu hafi wotsɔnɛ ƒua gbe o.
936. Ʋlẽe gblɔe be aleawogbe tae ne yewɔ atɔ la, yeɖoa ga enu.
[Wolé ŋku ɖe ale si ʋlẽ wɔa atɔe be ne tsi dza eye ahom tu hã ye viwo nanɔ dedie la ŋu. Esia nye nufiame be amegbetɔ naɖo ŋu etsɔ si gbɔna hafi awɔ nu.]
937. Ʋlofiwulae sea kpododo.
938. Volui be ye dada gblɔ na ye be ne yeku la, yemegase asusɔwo ƒe ha o.
[Voluí alo voloe, akpakpagalekɔme. Asusɔwo nye xeviwo ƒe hatsotso aɖe. Asusɔwo (asiɔ̃wo) la ame geɖewoe. Wofɔ esia hã tso volui ƒe agbenɔnɔ gbadzaa me. Godoo la, volui kple srɔ̃a kpakple viawo ko nàkpɔ. Ke asiɔ̃wo ya nɔa yame vĩi. Enye nuxlɔ̃ame be “xɔlɔ̃ geɖe dzedze la, aʋlie.”]
939. Voluie gblɔ be, “Hũu hũu hũu, nya le dɔme.”
[Wofɔ esia tso volui ƒe xɔxlɔ̃ kple ale si wòdea ta to nɔa ta lɔ̃m hafi nɔa xɔxlɔ̃m la me. Enye nufiame tso ame ɖokui kple ame ƒe nugbɔléle nyuie ŋu. Nya geɖe nɔa dɔme gake womia ta ɖe edzi.]
940. Ʋu le nu me gake womia ta toa exa.
941. Ʋu meɖina fia vi yɔna o.
942. Ʋutɔtrɔ ŋue wotrɔa ɣeɖuɖu ɖo.
943. Vuvɔ mewɔa ame wodzea dzo me o.
944. Wɔ baɖaa ku baɖae wua ame.
945. Wɔ ɖe te gbɔ mewɔna ɖe ʋle gbɔ o.
[Ame si fena kple te la mate ŋu awɔe ɖe makani ƒomevi aɖe si woyɔna be ʋle si fiaa ŋuti na eɖula la ŋuti o.]
946. Wobena medea kɔrtu o.
947. Wobewobe meyia fiaƒe me o.
948. Wole tò dim hawo le bublum.
949. Womedaa kalãmi ɖe dadi gbɔ o.
950. Womedɔa nu atsusi kple nu o.

EƲE LODODOWOAKPA 19 Read More »

Totamexe aɖe le to dzi

EƲE LODODOWOAKPA 18

EƲE LODODOWO AKPA 18

Totamexe aɖe le to dzi

851. Tagãtɔ meɖɔa kuku ɣeɣe o.
852. Tagbatsu be azɔli le megbe azɔli le ŋgɔ.
853. Tagbatsu be xexeme le megbe le ŋgɔ.
[Nenye be tagbatsu dze ɖi la, eƒoa ƒu eƒe asiwo ɖe ŋgɔ abe eklɔm wòle ene. Egadoa afɔwo hã ɖe megbe nenema ke. Esia ŋue wokpa nya la ɖo. Esia nye nuxlɔ̃ame be amegbetɔ nabu etsɔ si gbɔna kple etsɔ si va yi ŋu hafi anɔ agbe, vevietɔ ɖe nɔvia kple eɖokui ŋu.]
854. Tagbatsutsu be yi mele ye si o gake yesẽa to na avu.
855. Tameyɔe kple asi ƒe godoƒe ɖeko wòle bɔbɔe.
[Eya ta mègayɔ na wò futɔ o.]
856. Tanutsɔ mekea dɔ o, eye asiɖuɖɔ meɖia ƒodo o.
[Tanutsɔ gɔmee nye agba si wodro ɖe ta.]
857. Tasiaɖam menɔa sɔ ŋgɔ o.
858. Tɔmedelae gbãa ze.
859. Tɔmekokloe be yemegblẽ tɔ ƒe nu ne tɔ nakplɔ yeƒe azi o.
[Tɔmekokloe alo tɔkoklo nye tɔdzixe ɖagbi aɖe si ɖi koklo. Efɔa ati sue eve aɖewo dana ɖe tsi dzi le tɔsisiwo me, ɖaa azi ɖe eme ƒoa vi wòtsina. Togbɔ be eƒe atɔ la meɖi atɔ aɖeke o hã la, tɔsisi alo ahomya mekplɔnɛ alo kakanɛ gbeɖe o. Esia nye nukunya eye amegbetɔ lé ŋku ɖe esia ŋu bu tame kpa nya sia de nu nɛ.]
860. Tɔmekpe be yeɖe ŋu ɖi na vuvɔ.
861. Tɔmekpe mesea vuvɔ o.
862. Tɔsisi be ne ɖe yekpɔ ye léla la, anye ne yemagaɖo aga o.
863. Tɔsisi be, ɖee yekpɔ avuléla la, anye ne yemaɖo aga o.
864. Tɔvi be zã do, nɔdzidzi be naneke mele zã me léa ame o.
[Ðo ŋku edzi be, ne avi le ɖiɖim hoo hã la nɔdzidzi ƒe aɖatsi toa vovo.]
865. Tɔvi be zã do, nɔdzidzi be zã medo o.
[Ðo ŋku edzi be, ne avi le ɖiɖim hoo hã la nɔdzidzi ƒe aɖatsi toa vovo.]
866. Tedogbee wotua ati na te.
867. Teƒlegbe tae woƒlea makani xea fea, elabena ƒlemaxe nɔvie nye dimakpɔ.
868. Teƒlegbe tae, woƒlea makani xea fe.
869. To maɖito la akunta woyɔna nɛ.
[Akunta kee wogayɔna be nyo si fia ame si ɖe ame ƒe nɔvi. Eya ta lé be na ɖoƒe si le asiwò la.]
870. To maɖito la nyo woyɔna nɛ.
[Eya ta lé be na ɖoƒe si le asiwò la.]
871. To mekpena wu ta o.
872. Togbɔ be ɖeke menyo o hã la, ɖegbeɖegbee nyo wu ɖekuɖekui.
873. Tokunɔ medea agble ɖe mɔ to o.
874. Totamexe be, yemedoa toku o, to nenɔ agbe yeafɔ axɔ̃e le eŋuti aɖu.
875. Totaxe be yemedoa to ƒe ku o, to nenɔ agbe yeafɔ axɔ̃ le eŋu.
[Totaxe alo kagãɣi, aŋɔɣi nye xevi vedidi aɖe si nɔa lãtsuwo abe lo, nyi, sɔ kple tedziwo ene ŋu nɔa nudzodzoewo kple axɔ̃wo mim le wo ŋu. Esiae wokpɔ kpa nya sia de enu.]
876. Toto mekpɔa avese ƒe dzodzo gblɔna be yeadzo o.
877. Trɔ tsi ɖe tu me na ame.
878. Tre eve le tsi dzi megbea ŋuikaka wo nɔewo o.
879. Tre eve nɔ tɔ ŋgɔ megbea gododo o.
880. Tre memlɔa anyi eƒe afɔ buna ɖe xɔ me o.
[Nuɖalawo aŋlɔe be.]
881. Tre mesaa ahiãkɛ na nɔvia o.
882. Tregbatsɔla megbea kaƒi sese o.
[Kaƒi alo kapi.]
883. Tsaɖila kpɔa nu wu dzidela.
884. Tsaɖitɔ kpɔ nu wu dziyitɔ.
885. Tsi bluhɔ nyo wu zɔ gbɔlo.
886. Tsi ƒo agba ƒo.
887. Tsi ƒo dze ami le nu kom.
888. Tsi ƒo dze ami le nu kom, ŋdɔ ʋu ami le nu xam.
889. Tsi ƒo gli mesea xɔ muna o.
890. Tsi ƒo kɔ medea kɔ tume o.
891. Tsi ƒo kpɔ mesea kpɔ muna o.
892. Tsi lɔ ɖe nu me didi la ta wòzuna.
893. Tsi le tsi tɔ nu eye agba hã le agba tɔ nu.
[Tsí fia gatsi alo atitsi kple bubuawo.]
894. Tsi meɖona wotrɔa zɔmetsi ƒua gbe o.
895. Tsi meléa adeɣenɔ wonyana o.
896. Tsi metsɔa ame gbɔ o, amee tsɔa tsi gbɔ.
897. Tsie vɔna hafi wotsɔa tagba noa wɔ.
[Eya ta ɖe wòvɔna le ame si hafi wòyenɛ. Tagba fia ta si le nu me.]
898. Tsiƒokpe medea kpe tume o.
899. Tsiƒokpe medea kpetome o.
900. Tsileƒe wonyaa aklikɔtɔ le.

EƲE LODODOWOAKPA 18 Read More »

clear glass bottle with white background

EƲE LODODOWOAKPA 17

EƲE LODODOWO AKPA 17

clear glass bottle with white background
Ŋku eve mekpɔa atukpa me o

801. Nunyoname ƒe do womeɖenɛ abɔ buna ɖe eme o.
[Ne anyo na wò la menye wò agbagbadzedze akpa me ko wòatso o.]
802. Nuŋɔnue ŋɔa nu.
803. Nutukpɔ mesea glitutu o.
[Ne nu tu kpɔ la eteƒe medidina hafi wòva tua gli hã o.]
804. Nuvinametɔ menye dzoɖuametɔ o.
805. Nuwɔzã medo o.
806. Nya baɖa menye dzonu nyui wònye wodea kɔ na ame vi o.
807. Nya dzedɔmee faa dzi.
808. Nya madzɔkpɔ kple eƒe ɖikekee.
809. Nya mewua ame dzi gakua ame o.
810. Nya wuame nɔƒe medidi o.
811. Nya gblɔmasea, ne kpɔ memu o la, glie kana.
812. Nyatsɔke menye hotsɔke o.
813. Nyɔnu si ɣea ze la, medea tɔme kaba o.
814. Nyɔnu si kpɔa nublanui na ŋutsuwo fũu akpa la, gboloe woyɔna nɛ.
815. Nyɔnuwo la ameʋuɖelawoe.
[Efia be nyɔnu gbolowo la ameʋuɖelawoe]
816. Nyi ɖiku medoa ahlɔ̃e ƒe afɔkpa o.
817. Nyi ɖiku menye tsikpo gbɔ nu o.
[Tsikpó nye nu si me wotsɔa kluviwo alo hawo le.]
818. Nyi ɖiku nyo wu lãxɔ gbɔlo.
819. Nyiŋutsie ɖaa nyi.
[Nyiŋutsi fia tsi si wotsɔ fia tsi nyilã. Lododo sia nye nufiame na amegbetɔ be magadzi nu si gbɔ eƒe ŋutete ŋu o.]
820. Nyiwutue gbãna ɖe ahlɔ̃e ŋu.
821. Nyonyo la telɔe, asi wotrɔna le eŋu hafi wòwɔna.
822. Ŋɔŋɔe mevɔna le kpɔ̃ ŋu o.
823. Ŋɔŋɔe mevɔna le kpɔ̃vi ŋu o.
824. Ŋɔti be yemele naneke dim wu gbɔgbɔ o.
825. Ŋɔvi be atadi le vevem gake yele eƒe dɔ me.
[Nenye be atadi ɖi hẽe hele vevem katakata hã la, ŋɔvi dzia vi ɖe eme eye ŋɔvi boliboli sia nɔa agbe le eme tsina. Esia wokpɔ kpa nya sia ɖe ŋɔvi ŋu. Enye nuxlɔ̃ame be dzidodoe nye nuwɔwɔ.]
826. Ŋdi menyona na ame wokoa nu o.
827. Ŋdi menyona na ame, wokoa fiẽ o.
828. Ŋkuɖekatɔ mefena le ke me o.
829. Ŋku eve mekpɔa abɔɖiabɔ me o.
830. Ŋku eve mekpɔa atukpa me o.
831. Ŋkuagbãtɔwo de la, ŋkuɖekatɔe ɖua fia.
832. Ŋukpe ta gbolowɔla toa xɔ xa.
833. Ŋukpe vi nyo wu ŋukpe gã.
834. Ŋutasẽlae dzia vi le kponɔ ƒe dɔme.
835. Ŋutsuwo be, daavi wòe zɔ menye nya aɖeke o, hedenyuie sie nyaa le.
836. Sabala le nogo, gake mɔ le eme.
837. Sabala le nogo, mɔ le eme.
838. Safui sesẽe ʋua gaʋɔ.
839. Siamea ŋlɔe be abitɔ ƒe ŋku le edzi.
840. Sika la, agakpe sesẽwo me ko wònɔna.
841. Sisi eve menɔa ame ŋu o.
842. Sonue gblɔ na zɔklalɛ be ne eti kpo yi yame hã la ye me ko dze ge wògagbɔna.
843. Ta ɖeka medea adaŋu o.
844. Ta ɖeka meɖoa aɖaŋu o.
845. Ta gbɔlo metsɔa ahlihã o.
846. Ta meɖua ame woƒoa tsi klo o.
847. Ta mekpena wu tigoe o.
848. Ta menɔa agbe klo ɖɔa kuku o.
849. Ta menɔa anyi klo ɖɔa kuku o.
850. Tababla la aƒe wotsona.

EƲE LODODOWOAKPA 17 Read More »

Nyɔnu aɖe le nu dom na vi

EƲE LODODOWO AKPA 16

EƲE LODODOWO AKPA 16

Nyɔnu aɖe le nu dom na vi

751. Ne ze ɖe wu ze la, tɔmedegbee wokpɔnɛ le.
752. Nenem mlekpui lae nènye ye nenem nakeawo le yiyim ɖe mewò.
753. Nenema-ko-wowɔnɛ medoa ame ɖe ŋgɔgbe o.
754. Nenye teɖugbee nye teƒãgbe la anye ne gbɔ̃wo hã maɖu tetsro o.
755. Nomaxee ta Xiƒeawo de ahedɔƒe me nɔ ge dokpoe.
756. Nu bubu be yedo moyɛ nudila.
757. Nu bubue na wodia gbɔnu le lubu me.
758. Nu eve mewɔa akplẽ le agba me o.
759. Nu gã kala metsia agba ɖome o.
760. Nu gãwo gbɔ vɔvɔ̃ tsoa aƒe ɖo.
761. Nu ka dim ŋɔti le wu gbɔgbɔ.
762. Nu kamafiaŋku la, ɖe wòléa ve na ame.
763. Nu kpeta menɔa abɔ o.
764. Nu li ɖi ata wu nyi.
[Nu si ƒe ata lolo wu nyi tɔ.]
765. Nu ɖi ata wu nyi.
[Nu si ƒe ata lolo wu nyi tɔ.]
766. Nu lokpo meʋlia atsu o.
767. Nu nyui ŋu asi nɔna.
[Esia fia be asixɔxɔ gã aɖe le nu nyui wɔwɔ ŋuti.]
768. Nu nyui wɔla ƒe ta metsia ba me o.
769. Nu si ame aɖe ɖu he ku la, tagbee wònɔna nɛ.
770. Nu si atso aʋa na sɔtsu la le sɔnɔ ƒe dɔme.
771. Nu si dadi kpɔ hetrɔ ŋku ɖe adzɔge la, nu mae avu kpɔna henɔa wówom.
772. Nu si le du ƒum la ye fɔa nu si le anyimlɔƒe.
773. Nu si ŋku kpɔ lae asi minyana.
774. Nu si ta agbledeawo tsi aƒe ɖo la, asideawo ɖe wogbɔna va kpɔnɛ.
775. Nu si tsoa aʋa na sɔ la sɔ ƒe dɔmee wòle.
776. Nu si wɔ akagã eƒe dzodome bɔ la, ne ewɔ lã aɖewo la, ahɔhɔ̃e ado na wo.
777. Nu si wɔ akagã ƒe ta la eya kee wɔ tegli ƒe ble.
[Tegli kee wogayɔna be ɖaɖi.]
778. Nu si wɔ klo la, ne abɔbɔe wòwɔ la, goa masusɔ o.
779. Nu si wɔ klo nenye ɖe wòwɔ abɔbɔ la eƒe go masusɔ o.
780. Nu si wɔ pete ƒe ta lae wɔ ɖaɖi ƒe ble.
[Pete kee wogayɔna be akagã eye wogayɔa ɖaɖi hã be tegli.]
781. Nu sia nu si gɔmedzedze li na la nuwuwu hã li nɛ.
[Eya ta nɔvi do dzi le xaxa me.]
782. Nu tsu ɖula xɔlɔ̃e nye akɔli.
783. Nu vɔ̃ wɔwɔ la lãnɔe, vi wòdzina fũu.
784. Nu vevi mesena tsia gbɔya o.
[Gbɔya fia yame.]
785. Nu vevi mesena tsia yame o.
[Gbɔya fia yame.]
786. Nudonamela megbea asiɖuɖɔ o.
787. Nudonamela megbea asiɖuɖɔ o, gake mègana dedzia nawu ɖoɖoa o.
788. Nuɖuɖu menɔa ame si dɔ gawua ame o.
789. Nuɖuitɔ ɖe wònyaa eɖokuiléle.
790. Nue glo kpɔ̃ wòɖu gbe.
791. Nue gloa lo wòɖua bɔlu.
792. Nue wɔ ŋɔti dze gbã.
[Nu vevi wɔ ŋɔti ame ƒe gbe me xe.]
793. Nue wɔ ŋɔti gbe gbã.
[Nu vevi wɔ ŋɔti ame ƒe gbe me xe.]
794. Nue wua lã gãwo woɖua wɔdzre.
795. Nuɣeɖutɔ menyana be dɔto o.
796. Nunametɔ ƒe ta metsia ba me o.
797. Nunya adidoe, asi metunɛ o.
798. Nunyala ɖeɖe eve memaa hotsui etɔ̃ me o.
799. Nunyala eve memaa hotsui etɔ̃ o.
800. Nunyala medzea anyi le kɔ ɖeka dzi zi eve o.

EƲE LODODOWO AKPA 16 Read More »

Lo yibɔ aɖe le tɔ to

EƲE LODODOWO AKPA 15

EƲE LODODOWO AKPA 15

Lo yibɔ aɖe le tɔ to
Ne lo lolo ʋuu hã la, azimevi ko wònye

701. Ne enya wɔna la ʋu anɔ agalãgo me.
702. Ne enyo na adela lae wògblɔna be afi si ko yenɔ dae nye esi.
703. Ne enyo na nue wògbãna ɖe ge me.
704. Ne èsukpa le amewo gbɔ la, enyo wu be nàsukpa le ɖokuiwò gbɔ.
705. Ne ètso na afi la, nàtso na adadi hã.
706. Ne ètso na afi la, nàtso na asẽvi hã.
707. Ne ètso na koklo la, nàtso na aʋako hã.
708. Ne ètsri kɔ la, nàtsri kɔtete hã.
[Kɔ́ nye anyi ƒomevi aɖe si dea ade nyuie eye wotsɔ tua xɔ, ne ame aɖe tsri kɔ la, ele be wòatsri te si wodo ɖe kɔ te hã.]
709. Ne èwɔ ɖokuiwò alẽvi la, àkpɔe be amegãxi mele didiƒe o.
710. Ne èwɔe la, wò ŋutɔe nèwɔe na.
711. Ne èyi abɔbɔwo de la, womegabiaa xɔdɔmea o.
712. Ne fu mele ame ɖum o la, womedzia vi o.
713. Ne fu mewɔ wò kpɔ o la, ne ame aɖe do fuha ɖa la, màte ŋu axee nɛ o.
714. Ne kɔ ƒe nu menyo ame ŋu o la, womebɔbɔ nɔa anyi ziɔna ɖe gli ŋuti o.
[Kɔ́ nye anyi ƒomevi aɖe si dea ade nyuie eye wotsɔ tua xɔ.]
715. Ne ku ɖi vevie la, ekema tsidzadza te tu aƒe.
716. Ne lã vevi le du dzi la du nue wodanɛ le.
717. Ne lãtɔwo meyi asi me o la, nu gbegblẽwo hã menya dzrana o.
[Lãtɔwo gɔmee nye bometsilawo, gegemewo, abunɛtɔwo.]
718. Ne lɔlɔ̃ sa kɔ la menya tuna o.
719. Ne lo lolo ʋuu hã la, azimevi ko wònye.
720. Ne lobovi le ŋuwò ɖe, agadzea?
[Lobovi nye ahatukpa sue aɖe. Eya ta lododo fia be ne èdze aha mexe fea o ɖe, àgadze bubua?]
721. Ne nèyi akpɔkplɔwo ƒe du me eye wotsyɔ akɔ la, wò hã nàtsyɔ akɔ.
722. Ne nu mewu ame o la, womayi agble agbɔ ava ɖu nukɔ o.
723. Ne nu ve akpa la, ekema ebɔɣi ɖo.
724. Ne nyɔnu ɖe wòɖoa ŋku vidzigbe dzi la, anye ne nyɔnu aɖeke madzi vi zi eve o.
725. Ne nyi ɖi ku hã tsikpo metsɔnɛ o.
[Tsikpó nye nu si me wokɔa kluviwo alo hawo le.]
726. Ne Ŋɔtsiẽfia ɖo ame ɖe aʋa la, ame ŋutɔe nyaa tsetse.
[Tsetse gɔmee nye bebe.]
727. Ne ŋku gbã hã alɔ̃ le eme.
728. Ne ŋkuagbãtɔ aɖe be yele ekpe da ge la, eƒe afɔ le kpe la dzi xoxo.
729. Ne ŋkuagbãtɔ be yeada kpe wò la, nya be eƒe afɔ le kpea dzi xoxo.
730. Ne ŋuti le fiẽwòm la, wò ŋutɔ wò avɔ mee wòtso.
731. Ne salagatsi anye nu kpɔkpleŋku ado la, xɔdrɔ̃wo hã woawɔ wo tɔ si nua.
732. Ne taɖa nyo ʋuu hã kuku koe nɔa edzi.
733. Ne tekpoɖoe mekpɔ eɖokui ƒe geme o la meɖoa nuku o.
734. Ne teti le agbea, tekae vuna ɖe eŋu.
735. Ne tsi gbɔna la, ame ƒe agbleto nu wokpɔna.
736. Ne tsi le dzadzam la, ame ƒe agble godzi wokpɔna.
737. Ne tsidzi do la, ekama fɔŋli ɖo.
738. Ne ʋuti mu la, aɖibae xɔa eteƒe.
739. Ne wobe nàkpɔ dzime nàkpɔ anyigba.
[Dzime gɔme le afi siae nye yame alo dziƒo.]
740. Ne wode avuwɔwɔ ƒe se la, avuwɔlawo ɖe wokpena.
[Wokpena gɔmee nye wosɔa gbɔ. Lododo sia fia be ne wode se be womegawɔ dzre o la, vɔvɔ̃nɔtɔwo kekeake nɔa adã kam be yewonya kɔdada.]
741. Ne woƒle koklo womexe eƒe fe vɔ o la, womedoa asi ɖe gbɔ̃ ŋuti o.
[Eya ta nɔvi wɔ nu ɖe wò ŋutete nu.]
742. Ne wole dze siam kakaka hã tsi me yi ge wòala.
743. Ne wole dze siam ʋu hã la, tsi me ko yi ge wòala.
744. Ne wole kese kom la, wole etsɔla hã kom.
745. Ne wometso tɔ vɔ o la, womeyɔa lo ƒe nu lɔbɔ dzuna o.
746. Ne woyi abɔbɔwo de la, womegabiaa xɔdɔme o.
747. Ne xexea me be yeaɖe wò afia la, àɖo kpo agaɖo vo hã akpe ɖe eŋu, ale nàtsi mavomavo dzi.
748. Ne yɔkuti metse o hã venɔviwo ɖua nu.
749. Ne zã medo o la, womebua fɔ ahakpala o.
750. Ne ze ɖe wu ze la, tɔmedeƒee wokpɔnɛ le.

EƲE LODODOWO AKPA 15 Read More »

Abɔbɔ yi klo gbɔ le eƒe me

EƲE LODODOWO AKPA 14

EƲE LODODOWO AKPA 14

Abɔbɔ yi klo gbɔ le eƒe me
Ne abɔbɔ yi nugbe la, klo gbɔ wòdzena

651. Mido baba na atamagoe, atamadolawo le avi fam kakaka.
[Efia be nenye be atama vi aɖe ko atamadola do hafi eƒe ŋkuwo le aɖatsi fam la, ke menye nu vi aɖee le atamagoe si me atama sɔ gbɔ le la tum o.]
652. Míenya be fue hafi le eyɔm be akegle.
653. Milé be na miaƒe nu xoxowo, elabena woawo hã nɔ yeyeme kpɔ.
654. Milée, ame wolénɛ na.
655. Milée, milée, amee wolénɛ na.
656. Mo globo menye ŋku toto o.
657. Naneke mele tsi si, si mele dzo si o.
658. Nanewɔtɔ megbea nyɔnyɔ o.
659. Nɔagbemíwɔe nyo wu ku.
660. Nɔamegbɔ medzea ame ŋu o.
661. Ne abɔbɔ yi nugbe la, klo gbɔ wòdzena.
662. Ne adeʋu le ɖiɖim la, menye ame sia amee ɖunɛ o.
663. Ne adzɔ̃e dze xa dzi la, eƒonu megali o.
664. Ne afi lolo hã dadi ƒe kluvi ko wònye.
665. Ne agble medidi o la, wometsɔa tsigo gã yina o.
666. Ne ahago gbã la, ahayɔvi ye nu wɔ wu.
667. Ne ako maɖi ʋu o la, kpɔ eƒe ble ɖa.
[Esi wònye be ako ƒe ble nɔa dzĩ ta la, ne ako la ŋutɔ ƒe amadede mele dzĩ abe ʋu ene o hã la, eƒe ble ƒe amadede ya ɖi ʋu.]
668. Ne ame aɖe be yeana nɔvia kuku la, ele be nɔvia nakpɔ eƒe ta ɖa.
669. Ne ame aɖe ƒe gbe vivi la, ha wòatsɔe adzi.
670. Ne ame aɖe ƒle te la tefe wòxena, eye ne ame aɖe ƒle ʋle la ʋlefe wòxena.
[Enye agblemenu aɖe si ɖona ɖe tome. Eɖi makani gake ne ame ɖui la, efia ŋuti na amea.]
671. Ne ame aɖe kpɔ nɔvia ƒe ta le dzogbe la, netsɔ etɔ yi de ave.
672. Ne ame aɖe le alɔ̃ dɔm eye nèʋuʋui wònyɔ la, wò ŋkumee wòakpɔ gbã.
673. Ne ame aɖe le ʋu tome ƒom la, egbɔna ʋu la ŋutɔ ƒo ge.
674. Ne ame aɖe wɔ aye be yeku la, aye wowɔna ɖinɛ.
675. Ne ame ƒe afɔdzideƒe nyo la, eyae wòtsɔa asi eve ɖoa anyi.
[Eya ta mègabu fɔ nɔviwò le eƒe fukpekpe ta alo nàkoe o.]
676. Ne ame ƒe asitsu dze ɖeka hã la, wokafunɛ.
677. Ne ame lɔ̃xo ɖi ku la womekonɛ.
[Lododo sia fia be ne ame ko lɔ̃xoa la èdi domegbegblẽ. Womedoa asi ɖe ame to ŋkume o, ne èdo asi ɖee la èdo asi ɖe alẽ ƒe ŋkume.]
678. Ne anyigba dze dzo la afɔ ŋutɔ lanya.
679. Ne ati aɖe le nya dim ɣesiaɣi le fiáwo ŋuti la, mumu ye le edzrom.
680. Ne ati ku la, atitae dzena.
681. Ne ati ku la, atitae ɖe wòtana.
682. Ne atukpa aɖe le ɣe ɖum le kpe dzi la, ke gbagbã ye le edzrom.
683. Ne aʋa sẽ ŋu la, ekema dziɖuɖu gogo.
684. Ne Awusawo do asi na ame hã, wogblɔna be Alabaraka.
[Alabaraka gɔmee nye ɖedzi alo abia be woaɖe gaa dzi.]
685. Ne azɔli le ame nu vivim ʋuu hã, ne woɖo mɔdogonu la, ɖeka koe wotona.
686. Ne bɔlu da ami la, sikɔ ƒe tamee.
[Sikɔ́ nye ƒumelã aɖe.]
687. Ne da ɖu ame kpɔ la ɖe wòvɔ̃na na vɔkli.
688. Ne da ɖu wò kpɔ la, ne èkpɔ vɔkli nàvɔ̃ nɛ.
[Wogayɔa vɔkli be blakutsu alo dɔkplevi.]
689. Ne da lia ŋutiti la, ekema eƒe ŋkue biã. Ne menye dzoe ɖee ɖe nu o la, ekema kpoe le eyome.
690. Ne dɔ to la, menye nu sia nu woɖuna hafi dɔ kena o.
691. Ne dzo tu le lã wɔadã ta la, ɖeviwo ɖe wolilia asi eƒe tame.
692. Ne èbe nɔvi megatso ewo o la, wò hã màtso asieke o.
693. Ne èbe yease fɔlĩ ƒe vivi la, lo ɖe wòléa ame.
694. Ne èbe yeatsɔ ame aɖe akpa eye eya be wò kɔ dzi yeanɔ evɔ màte ŋu akɔe ɖe kɔ dzi o la, ɖii da ɖe anyi.
695. Ne edidi ʋuu hã etsɔ ko woyɔnɛ.
696. Ne èdo ŋukpe ame aɖe le kuteƒe la, ado ŋukpe wò le asi me.
697. Ne èfa na koklo la, nàfa na aʋako hã.
698. Ne èkpɔ nɔviwò ƒe ta le dzogbe la, nàtsɔ tɔwò aɖo ave.
699. Ne èkpɔ nɔviwò ƒe ta le dzogbe la, nàtsɔ tɔwò asi aɖo avee.
700. Ne ènya be ye vi mebua ame o hafi nèbe yeadɔ dɔe la, mègakpɔ eƒe mo o. Mègado ɣli hã ɖe eta le ame dome o.

EƲE LODODOWO AKPA 14 Read More »

Tsidzadza le gbe dzi

EƲE LODODOWO AKPA 13

EƲE LODODOWO AKPA 13

Tsidzadza le gbe dzi
Kutekute dzana wu ʋedzi

601. Kutekute dzana wu ʋedzi.
602. Kuviatɔ ƒe agble mee da dzia vi ɖo.
603. Lã ƒudue gblɔ na nɔvia agama be nezɔ mimɔe kpɔ̃ le avea me.
[Mimɔe gɔmee nye blewuu. Lododo sia le fiafiam be ne nanewo dzɔ la, wo me tsonuwo kplɔa wo ɖo godoo.]
604. Lã ƒudui meléa nu kana na agama o, agama hã zɔna binyabinya ɖia ƒodo.
605. Lã nɔdudzie fɔa anyimlɔƒetɔ.
606. Lã ŋu wozɔna ɖo ɖua nyé.
[Nyé ye wogayɔna be ŋɔvi.]
607. Lã sɔgbɔ megblẽa detsi o.
608. Lã sileamegbɔ la, lã lolo ŋutɔe.
609. Lã tsyɔ̃evi meɖia ŋdiƒo dzɔa dzi o.
610. Lãgbo lolo mesɔa ga o.
611. Lãglã xoxo meƒoa detsi o.
612. Lãklẽ dɔmegbaba be yeda ami wu gbɔ̃.
613. Lãta xoxo meƒoa detsi o.
614. Lilĩ be degbɔdegbɔe wotua xɔ.
615. Lo ƒe ŋukpe la ve ƒe ŋukpee.
616. Lo medzia vi wòɖia abɔbɔ o.
617. Lo medzia vi wòɖia akpa o.
618. Logbloti be yegbe de, de gblɔ nɛ be: “Metre wò gbegbe.”
[Logbloti nye ati sue aɖe si medzena ɖe anyigba gbeɖe o, ati bubuwo dzi ko wòdzena ɖo kokoko eye wònoa tsi le wo me keŋkeŋ. Ke nu si wɔ nuku lae nye be medzena ɖe deti dzi gbeɖegbeɖe o. Esia ŋu wolé ŋku ɖo kpa nya sia. Nufiame si le eme la koe nye be, nenye be ame si ƒe hadede agblẽ nu le ŋuwò boŋ la gblɔ be yetsri wò la, edze be nàdze awusi nɛ alo nàkpɔ dzidzɔ elabena menye hawo katã wodena o.]
619. Lokpo ɖubli medoa kpo ava gbeɖegbeɖe o.
620. “Mawu wɔdɔ, Mawu wɔdɔ” la zi eve koe wodonɛ na ame.
621. “Mawu wɔ dɔ, Mawu wɔ dɔ” la zi eve koe wodonɛ na ame, zi etɔ̃lia anye, “Baba na wò.”
622. Maɖuimaɖui ɖe wòdɔa atsi ame.
623. Makpɔƒletɔ metsia asi me o.
624. Maleemalee ɖe wòtsia ɖi ame.
625. Maleemalee ɖie wòdɔna.
626. Manyɔfui be ŋɔdzinu aɖeke meli o.
627. Mawu doa asi na ame hã wogblɔna be aɖabraka.
[Aɖabraka gɔmee nye ɖe le dzi. Lododo sia nye aɖaŋuɖoɖo na ame si le nu gbegblẽ wɔm la be wòatrɔ nɔnɔme. Egafia hã be amegbetɔ nate nu bubuwo kpɔ eye megabu nɔnɔme madeamedziwo be wonye xɔvɛ o.]
628. Mawu medzia vi wuna o.
[Lododo sia nye nufiame na amegbetɔ be wòalɔ̃ atsɔ nɔvia si dze agɔ le edzi la ƒe nu vɔ̃ ake.]
629. Mawu ŋutɔe nyaa tagbatsu na lã matoasike.
630. Mɔ didi megbɔa du ŋu yina o.
631. Mɔ didi metoa du ŋuti yina o.
632. Mɔseƒee nye xɔ me.
633. Mɔseƒee nye xɔli me.
[Xɔli gɔmee nye xɔgã me.]
634. Mɔtoti abi megbea eŋunɔnɔ o.]
635. Mɔtoti megbea abixɔxɔ o.
636. Mɔzɔlae sea “ɖoaƒe.”
637. Mègaƒo adegbe le fofowò ƒe kalẽwɔwɔ ŋu o, elabena atadi vena gake atadiŋgba mevena o.
638. Mele ge mele gea ɖe wòtsia ɖi ame.
639. Melixoxo kple mevaxoxo mekea ɖi o.
640. Menɔa ƒã ƒe tame wòtona na adeɣe o.
641. Menye aʋatsitsi ta, woagbe aʋade o.
642. Menye da kple viawoe ɖua ame hafi wokuna o.
643. Menye hawo yina woyina o.
644. Menye tsimalemale tae adeɣe mumuna ɖo o.
645. Menyo be ŋɔti nabi dzi o, elabena esi mee agbe le.
646. Meʋãna ɖe eɖuawo ƒe agble o.
[Eɖuawo gɔmee nye eɖulawo. Ame siwo lɔ̃a nuɖuɖu fũu la, agblemenuwo mewɔna na wo. Esia sɔ kple lododo si nye be ame dahe ƒe agbo metoa kɔdza o.]
647. Mezu agutɔ tsi yame aƒe meli nam o.
648. Mezu ketiba ame mado dzaa nam o.
649. Mezu vɔklui aƒe meli nam o.
650. Mezu yameme aƒe meli nam o.

EƲE LODODOWO AKPA 13 Read More »

Koklotsu aɖe le ati dzi

EƲE LODODOWO AKPA 12

EƲE LODODOWO AKPA 12

Koklotsu aɖe le ati dzi

551. Klokpɔƒee nye klofɔƒe.
552. Klokpodzi medea dzi o.
553. Klu gã ɖi ƒodo be yewo de nyo.
554. Klu gã menye vi gã o.
555. Koklo be dzianidziani tae yebɔbɔna hafi ɖoa xɔ.
556. Koklo be fefe mele kɔ gbɔ o.
557. Koklo be ɣlidolae woxɔna na.
558. Koklo be kɔ gbɔe agbe le.
559. Koklo be yeɖo xɔ gake yeƒe ble le xexe.
560. Koklo be yeɖo xɔ tso yeƒe ble le xexe.
561. Koklo be yemele aka nyim ɖe azi nu kaka ne wòanye vi nu o.
562. Koklo be yemele nu mɔm ɖe azi nu kaka ne wòanye vi nu o.
563. Koklo be yewole dzrea wɔm hã yewole ŋku kpɔm.
564. Koklo be, “kunyae.”
565. Koklo be, menya kpɔna ganya kpɔna o, eya ta yebɔbɔa ble hafi yia kpo me.
566. Koklo ƒe nya medzɔna le aʋakowo de o.
567. Koklo ƒe nya medzɔna le aʋakowo ƒe kodzoɖoƒe o.
568. Koklo kaa akɔli dzi nɔa ƒe ataƒu ŋue wòkena ɖo.
569. Koklo kuku ƒe asixɔƒee nye aɖukpo dzi.
570. Koklo masenu kple nɔvia botsyoe zɔna.
571. Koklo metsɔa ƒu dɔme vea avu o.
572. Koklo nɔ be peteewo dome mesea ʋeʋẽ o.
573. Koklonɔ be nu vivi metsia teƒe ɖeka o, eya ta le asiyɔyɔ megbe la, yeʋuʋua xotsoxotso be wòakaka ɖe yeƒe afi sia afi.
[Ɣesiaɣi si koklotsu yɔ asi koklonɔ ko la, koklonɔ ʋuʋua eɖokui sesĩe eye fu fɔna ɖe eŋu dzeke hafi wòdzona. Esia ŋu wolé ŋku ɖo kpa nya sia de nu na koklonɔ. Esia nye nuxlɔ̃ame ɖe ŋɔkuku ŋu. Nenye be wò ɖeka nèdzea go ɖe nuwo dzi hetsyɔa akɔ ɖe wo dzi la, ekem wò dzidzemekpɔkpɔ tsi xɔ me.]
574. Koklonɔ tsitsi medea asi me dzro o.
575. Koklotsu be vɔvɔ̃e nye agbe.
576. Koklotsu be yetsi klokloklo ŋlɔ kpo be.
[Wofɔ esia tso koklotsu ƒe xɔxlɔ̃ ne ele gbe me eye nane ɖi kpee wòvɔ̃ evɔ naneke meli wòatsɔ aʋli eɖokui tae o me. Enye nuxlɔ̃ame be dzigbɔɖi hiã le nu sia nu me.]
577. Koklotsu be vɔvɔ̃e nye agbe.
578. Koklotsu eve wole dzre wɔm gake wole wo nɔewo ƒe ŋku kpɔm.
579. Koklovi mekua atɔ o.
580. Koklovi si le aɖukpo kam la nɔa ƒe ƒu dim wòle.
581. Koklowo katã meɖea gbe ko wogblɔna be ŋu ke o.
582. Kokloxɔ mekpea ŋu na koklo o.
583. Kokloxɔ vuvu mekpea ŋu na koklo o.
584. Koklozi meɖua ɣe le kpe dzi o.
585. Kotɔ ƒe alẽtsu metoa kɔdza o.
586. Kotɔ meɖua agbe o.
587. Kpakpaxe be yemenya ɣekaɣi fia ade se be ame sia ame nenɔ afɔ ɖeka dzi o, eya tae ne yeli sẽe la yedea ɖeka agu me.
588. Kpɔ vuvue dzɔa dzi na gbɔ̃.
589. Kpɔ̃vi meyɔna na azɔli o.
590. Kpe le tɔ me dzo le eme.
591. Kpegolo meƒoa ya o.
[Kpegolo fia golo si me kpe le.]
592. Kpẽ meɖina fia vi yɔna o.
593. Kpeɖala mebia dzi o.
594. Kpeɖatɔ mebia dze ta o.
595. Kpo medzea ŋgonu wobia ʋu ta o.
596. Kpo medzea ŋgonu wogabia ʋu ta sena o.
[Lododo sia le fiafiam be ne nanewo dzɔ la, wo me tsonuwo kplɔa wo ɖo godoo.]
597. Kponyo mesɔa tu o.
598. Ku fana, dɔ mefana o.
599. Ku ne maɖia agbe mee wokpɔnɛ le.
600. Kuɖiɖi nyo wu ku.

EƲE LODODOWO AKPA 12 Read More »

Adzidoti gã aɖe le dzogbe

Eʋe Lododowo Ƒe Viɖe

Eʋe Lododowo Ƒe Viɖe

Adzidoti gã aɖe le dzogbe
Nunya adidoe, asi metunɛ o

EƲEAWO gblɔna be: “Nunya adidoe, asi metunɛ o.” Eye míagblɔe kple kakaɖedzi be lododowo koŋ mee nunya bɔ le. Viɖe geɖe le lododo siawo ŋu ale gbegbe. Kpɔ nunya gbogbo si le Biblia ƒe agbalẽ si woyɔna be Lododowo me la ɖa ko!

Lododowo wɔa dɔ ɖe ame dzi eye wokpena ɖe ame ŋuti wòtrɔa eƒe agbenɔnɔ wòɖɔa ʋu wu. Lododo geɖe le Eʋeawo hã si. Nu kae nye lododo? Afi kae Eʋeawo kpɔ lododo siawo tsoe? Eye viɖe kae le lododowo ŋuti?

Nu Kae Nye Lododo?

Lododo nyea nyagbɔgblɔ kpui aɖe si dzi amewo katã lɔ̃na ɖo bɔbɔe be enye nyateƒe eye wozãnɛ tsɔ ɖoa aɖaŋu alo xlɔ̃a nu ame le agbenɔnɔ ŋuti.

Afi Kae Eʋeawo Kpɔ Lododo Siawo Tsoe?

Eʋeawo léa ŋku ɖe dzɔdzɔmenuwo ŋuti tsɔ kpaa lododo. Woléa ŋku ɖe amegbetɔwo ƒe nuwɔnawo kple wo me tsonuwo ŋu tsɔ kpaa wo. Nenema ke woléa ŋku ɖe lãwo ƒe nuwɔnawo kple atiwo ƒe nɔnɔmewo hã ŋu tsɔ kpaa woe. Lododo aɖewo toa vovo vie le Eʋedukɔ vovovoawo me, gake ne wonya do lo la ko la ame geɖe sea egɔme bɔbɔe. Eʋeawo kpaa nya dea nu na lãwo kple atiwo gɔ̃ le lododo siawo me. Le kpɔɖeŋu me, wobe “Abɔbɔ be, ne ye ɖeka tae la, anye ne tu maɖi le ave me o” evɔ wònye ɖe wolé ŋku ɖe abɔbɔ ƒe nuwɔna ŋuti kpa nya sia de enu.

Eʋedukɔ keke tso Ghana, Togo, Benin va ɖo keke Nigeria ke. Tɔtrɔ vivivi aɖewo le ale si wogblɔa Eʋegbea me le du vovovo siawo me. Eya ta ehiã be míaŋlɔ lododo aɖewo zi eve le nyati siwo nye Eʋe Lododowo, nyati ɖekaɖeka blaeve siwo ava ɖe nyati sia yome, la me. Ne èkpɔ esia la, mègasusui be vodadae o, ɖe míeɖoe koŋ wɔe nenema. Kpɔɖeŋu aɖee nye esi: “1. Avu medzia vi le asi dome o. 2. Avu medzia vi le dutoƒo o. ” Le nyateƒe me la, lododo ɖeka koe, gake wo gbɔgblɔ koe to vovo vie tae míeŋlɔ evea siaa ɖo.

Viɖe Si Le Wo Ŋuti Le Eʋegbe Me

Lododo nye Eʋegbea ƒe amike. Wozãnɛ ŋutɔ le fiaƒewo me vevietɔ ne wole kodzo ɖom. Eʋeʋi dzrowo hã zãa wo le woƒe gbe sia gbe dzeɖoɖowo me. Lododowo nana be kpekpeme nɔa nya siwo gblɔm wole la ŋuti, wonya sena na to eye wovivina hã.

Ne wole kodzoɖoƒe la, amenutsolawo, ame siwo nu wotso kple fiahawo siaa gblɔa nya geɖewo le lododo me. Le kpɔɖeŋu me, ame aɖewo siwo wona anyigba la tsɔ anyigba ƒe nyaʋiʋli aɖe yi kodzoɖoƒe. Esi woku nyaa me ʋuu la, wova kpɔe be ame siwo le anyigba ʋlim la tɔ medzɔ o, elabe ame ƒeƒlewoe wo tɔgbuiwo nye. Eya ta wodo fe na wo eye dumemetsitsi aɖe gblɔ na wo be: “Atikpo nɔ tɔ me mezua lo o.” Esia le fiafiam be togbɔ be wo tɔgbuitɔgbuiwo nɔ anyigba mawo dzi tso blema ke hã la, menye anyigba ma dzi tɔwoe wonye o. Ame ƒeƒlewoe wonye, womekpɔ mɔ aʋli anyigba o.

Esi tsitsiawo dometɔ ɖeka yi ŋugble me tso nya la ƒe yiyime ŋu ʋuu la, ekpɔe be ele be yealé avu nya la. Nya la di be yeahe domegbegblẽ va. Eya ta egblɔ le kodzoɖoƒea be: “Avu medzia vi le dutoƒo o.”
Wò hã ènya lododo aɖewo gblɔna? Wole bɔbɔe henya sena ŋutɔŋutɔ. Eʋe lododowo nye kesinɔnu blibo na Eʋeawo. Dze agbagba nàɖu tu na wo le nyatakaƒe sia.

Na Míado Boblo Míaƒe Lododo Maƒoasiawo

Viɖe geɖe le lododowo ŋu. Lododo nana be megahiãna be ame naƒo nu legbee hafi woase nya si wòdi be yeagblɔ la gɔme o. Esi wònye be ame akpa gãtɔ dea bubu lododowo ŋuti ta la, wolɔ̃na faa wɔna ɖe eƒe nuxlɔ̃amewo alo aɖaŋuɖoɖowo dzi bɔbɔe.

Míema lododoawo katã ɖe akpa 20 me eye wole lododo 1000 kple edzivɔ. Eya ta mina míado boblo lododo siawo eye míado boblo nyatakaƒe sia hã ale be wòanye viɖenu blibo na Eʋeawo.

Eʋe Lododowo Ƒe Viɖe Read More »

error: Mɔɖeɖe meli o !!
Scroll to Top